Tantara ao amin’ny soratra masina
Nosamborina i Jesoa—Fitsarana ny Zanak’ Andriamanitra

Marka 14–15; Lioka 22–23; Jaona 18–19

Nosamborina i Jesoa

Fitsarana ny Zanak’ Andriamanitra

Tonga tao Getsemane i Jodasy sy ireo mpiambina sasany.

Rehefa avy nivavaka sy nijaly tao Getsemane i Jesoa dia tonga niaraka tamin’ny andiana mpiambina Jiosy maro i Jodasy. Iray tamin’ireo Apôstôly i Jodasy. Fantany fa mankany amin’io saha io matetika i Jesoa. Nandoa vola tamin’i Jodasy ireo mpitarika Jiosy hanampiana azy ireo hahita an’i Jesoa mba hahafahan’izy ireo misambotra Azy.

Jaona 18:2–3

I Petera mamely ny mpanompon’ilay mpisoronabe.

Rehefa niezaka nisambotra an’i Jesoa ireo mpiambina dia namoaka sabatra i Petera. Nokapainy ny sofin’ny mpanompon’ilay mpisoronabe.

Jaona 18:10

I Jesoa milaza amin’i Petera mba hampirina ny sabany.

Nilaza tamin’i Petera i Jesoa mba hampirina ny sabany. Nilaza i Jesoa fa mila manao izay tian’ny Rainy ho ataony Izy.

Jaona 18:11

I Jesoa manasitrana ny sofin’ilay mpanompo.

Nikasika ny sofin’ilay mpanompo i Jesoa ary nanasitrana izany.

Lioka 22:51

Nentina tany an-tranon’ny mpisoronabe i Jesoa.

Nentin’ireo mpiambina tany an-tranon’ny mpisoronabe iray i Jesoa. Nisy mpitarika Jiosy hafa koa teo. Naniry ny hitady antony hamonoana an’i Jesoa ho faty izy ireo. Nitondra olona hilaza lainga momba Azy izy ireo.

Marka 14:53–61

Ilay mpisoronabe manontany an’i Jesoa raha Izy no Zanak’ Andriamanitra.

Farany dia nanontany an’i Jesoa ilay mpisoronabe raha Izy no Zanak’ Andriamanitra. Hoy i Jesoa: “Izaho no Izy.”

Marka 14:61–62

Tezitra amin’i Jesoa ny mpisoronabe sy ireo mpitarika hafa.

Nahatonga ny mpisoronabe sy ireo mpitarika hafa ho tezitra izany. Nokapohan’izy ireo i Jesoa sy nororainy ary norabirabian’izy ireo. Nifanaiky izy ireo fa tokony hovonoina Izy.

Marka 14:63–65

I Petera milaza amin’ny olona hoe tsy mahafantatra an’i Jesoa izy.

Raha tao an-tranon’ny mpisoronabe i Jesoa dia niandry tany ivelany i Petera. Nipetraka nitanin’ afo izy mba hahazo hafanana. Intelo ireo olona no nilaza fa nahafantatra an’i Petera hoe iray tamin’ireo mpianatr’i Jesoa. Saingy isaky ny mandeha dia nilaza i Petera fa tsy fantany i Jesoa.

Marka 14:54, 66–71

I Petera nandeha nitomany.

Avy eo dia naneno ny akoho, ary tsaroan’i Petera ny zavatra nolazain’i Jesoa hoe handà Azy intelo izy. Nandeha nitomany i Petera.

Marka 14:72

Ireo mpitarika Jiosy mitondra an’i Jesoa any amin’i Pilato.

Nentin’ireo mpitarika Jiosy tany amin’i Pilato, governora Romana i Jesoa. Nisy olona maro be koa tonga tany. Tian’ireo mpitarika hamono an’i Jesoa ho faty i Pilato. Nilaza tamin’i Pilato izy ireo fa niantso ny tenany ho mpanjakan’ny Jiosy i Jesoa.

Marka 15:1–3; Lioka 23:2; Jaona 18:28–31

I Jesoa miresaka amin’i Pilato.

Nanontany an’i Jesoa i Pilato raha Izy no mpanjakan’ny Jiosy. Namaly i Jesoa hoe: “Ny fanjakako tsy avy amin’izao tontolo izao.” Nohazavainy fa tonga teto amin’izao tontolo izao Izy mba hampianatra ny olona ny fahamarinana.

Jaona 18:33–37

I Jesoa sy Pilato mijoro eo anoloan’ny vahoaka.

Nilaza i Pilato fa tsy nino hoe nanao zavatra ratsy i Jesoa. Saingy maro tamin’ireo vahoaka no nihiaka hoe: “Homboy Izy.” Nanapa-kevitra ny hanao izay tian’izy ireo i Pilato ary namono an’i Jesoa.

Marka 15:12–14; Lioka 23:14–24