Tantara ao amin’ny soratra masina
I Jesoa mifidy ireo Apôstôliny—Fanasana mba ho “mpanarato olona”

Matio 10; Lioka 5:1–11; 6:12–16

I Jesoa mifidy ireo Apôstôliny

Fanasana mba ho “mpanarato olona”

I Jesoa mampianatra vahoaka eo amin’ny Ranomasin’i Galilia

Indray andro dia tonga teo amin’ny Ranomasin’i Galilia ny olona mba hihaino an’i Jesoa mampianatra. Nampianatra azy ireo avy teo an-tsambokely i Jesoa raha izy ireo kosa nihaino teny amin’ny morona. An’ny lehilahy mpanjono iray antsoina hoe Simona ilay sambokely.

Lioka 5:1–3

I Jesoa miresaka amin’i Simona

Rehefa avy nampianatra i Jesoa dia nangataka an’i Simona Izy hitondra ilay sambokely ho any amin’ny faritra lalina amin’ny ranomasina. Nasainy nalatsak’i Simona tao anaty rano ny haratony mba hahazoana hazandrano. Nilaza i Simona fa efa nanjono nandritra ny alina izy ary tsy nahazo na inona nainona. Kanefa noho ny tenin’i Jesoa dia hanandrana indray izy.

Lioka 5:4–5

I Simona sy ireo namany, nahazo hazandrano betsaka.

Nahazo hazandrano be dia be i Simona ka efa nisy triatra ny haratony! Niantso ireo namany tamin’ny sambokely hafa izy mba hanampy azy. Vetivety dia feno hazandrano ireo sambo ka efa nanomboka nilentika izy ireo. Talanjona i Petera sy ireo namany!

Lioka 5:6–7, 9

I Simona miankohoka amin’ny tongotr’i Jesoa.

Niankohoka tamin’ny tongotr’i Jesoa i Simona. Hoy izy hoe: “Tompoko, [mialà amiko,] fa olo-meloka aho”. Fantany fa nirahin’ Andriamanitra i Jesoa. Dia nilaza taminy i Jesoa mba tsy hatahotra.

Lioka 5:8

I Jesoa manasa an’i Simona, Andrea, Jakoba ary Jaona mba hanaraka Azy.

Nanasa an’i Simona sy i Andrea rahalahiny, ary ireo namany, i Jakoba sy i Jaona mba hanaraka Azy i Jesoa. Ho solon’ny fanaratoana trondro dia hanampy ny olona hanatona an’i Jesoa izy ireo.

Marka 1:16–17; Lioka 5:10–11

I Jesoa manome ny fahefan’ny fisoronana ireo Apôstôliny mba hitarihana ny Fiangonana.

Nandao ny sambokely fanjonoana i Simona sy i Jakoba ary i Jaona ary lasa Apôstôlin’i Jesoa. Taty aoriana dia nomen’i Jesoa ny anarana hoe Petera i Simona. Ny Apôstôly dia vavolombelona manokan’i Jesoa Kristy. Niantso lehilahy 12 i Jesoa mba ho Apôstôliny. Nivavaka Izy mba hahafantarany izay tokony hantsoina. Nomeny ny Apôstôliny ny fahefan’ny fisoronana mba hitarihana ny Fiangonany.

Matio 10; Lioka 6:12–16; 9:1–2

Apôstôly manasitrana zaza iray.

Satria nanana ny herin’ Andriamanitra ireo Apôstôly dia afaka manasitrana ireo olona marary ihany koa izy ireo, sy manangana ny olona amin’ny maty, ary manao fahagagana hafa.

Matio 10:8

I Jesoa Kristy mampianatra andian’olona. Tezitra amin’ny fampianarany ny olona sasany.

Nalefan’i Jesoa tany amin’ny tanàna maro ireo Apôstôliny mba hampianatra ny olona ny filazantsarany. Nilaza izy fa ny Fanahy Masina no hanampy azy ireo hahafantatra izay tokony holazaina. Nilaza i Jesoa fa tsy tia ny zavatra nampianarin’izy ireo ny olona sasany, saingy rehefa nanompo tamim-pahatokiana izy ireo dia hiaraka amin’izy ireo Andriamanitra.

Matio 10:5–7, 19–22