ພຣະເຢຊູຄຣິດຈະສະເດັດມາອີກຄັ້ງ

ພາບນິມິດຂອງໂຢຮັນກ່ຽວກັບຄວາມຫວັງໃນພຣະເຢຊູຄຣິດ

ອັກຄະສາວົກໂຢຮັນໄດ້ເຫັນພາບນິມິດພິເສດຢ່າງໜຶ່ງ. ເພິ່ນໄດ້ເຫັນພຣະເຢຊູຄຣິດ, ຜູ້ທີ່ສະແດງໃຫ້ໂຢຮັນເຫັນຫລາຍສິ່ງຫລາຍຢ່າງກ່ຽວກັບອະດີດ ແລະ ອະນາຄົດ. ພຣະອົງໄດ້ບອກໃຫ້ໂຢຮັນຂຽນສິ່ງທີ່ເພິ່ນເຫັນ. ພຣະເຢຊູໄດ້ຮັບຮູ້ວ່າໄພ່ພົນກຳລັງພະຍາຍາມທີ່ສຸດໃນການຕິດຕາມພຣະອົງ. ພຣະເຢຊູຢາກໃຫ້ເຂົາເຈົ້າມີຄວາມຫວັງວ່າພຣະອົງນັ້ນມີອຳນາດເໜືອກວ່າຄວາມຊົ່ວໃນໂລກນີ້.

ພຣະນິມິດ 1:1–2, 9–11, 13–15, 19; 2–3

ພຣະບິດາເທິງສະຫວັນໂດຍມີພຣະຫັດຂອງພຣະອົງຢູ່ເທິງບ່າໄຫລ່ຂອງພຣະເຢຊູຄຣິດ.

ໃນພາບນິມິດຂອງເພິ່ນ, ໂຢຮັນໄດ້ເຫັນປຶ້ມທີ່ບໍ່ມີໃຜສາມາດເປີດໄດ້. ແລ້ວໂຢຮັນໄດ້ເຫັນລູກແກະໂຕໜຶ່ງທີ່ເປັນຕົວແທນຂອງພຣະເຢຊູຄຣິດ; ພຣະອົງສາມາດເປີດປຶ້ມນັ້ນໄດ້. ໂຢຮັນໄດ້ຮຽນຮູ້ວ່າກ່ອນໂລກໄດ້ຖືກສ້າງຂຶ້ນ, ພຣະບິດາເທິງສະຫວັນໄດ້ເລືອກເອົາພຣະເຢຊູໃຫ້ເປັນພຣະຜູ້ຊ່ວຍໃຫ້ລອດຂອງເຮົາ. ນີ້ແມ່ນພາກສ່ວນທີ່ສຳຄັນທີ່ສຸດໃນແຜນຂອງພຣະເຈົ້າ, ແລະ ມີພຽງແຕ່ພຣະເຢຊູເທົ່ານັ້ນທີ່ສາມາດເຮັດໄດ້.

ພຣະນິມິດ 5

ຊາຕານ ແລະ ລູກໆທາງວິນຍານກຸ່ມໜຶ່ງກຳລັງໜີຈາກສະຫວັນ.

ໂຢຮັນຍັງໄດ້ເຫັນມັງກອນໂຕໜຶ່ງທີ່ເປັນຕົວແທນຂອງຊາຕານ. ຊາຕານບໍ່ມັກແຜນຂອງພຣະເຈົ້າ. ມັນໄດ້ເລີ່ມຕົ້ນເຮັດສົງຄາມໃນສະຫວັນ. ລູກທາງວິນຍານຂອງພຣະບິດາເທິງສະຫວັນສ່ວນຫລາຍແມ່ນມີສັດທາໃນພຣະເຢຊູຄຣິດ ແລະ ໄດ້ເລືອກທີ່ຈະຕິດຕາມພຣະອົງ. ແຕ່ບາງຄົນກໍໄດ້ເລືອກທີ່ຈະຕິດຕາມຊາຕານ. ຍ້ອນການເລືອກຂອງເຂົາເຈົ້າ, ເຂົາເຈົ້າຈະຕ້ອງໜີອອກຈາກສະຫວັນໄປ.

ພຣະນິມິດ 12:3–11

ຮູບພາບລວມກັນສະແດງໃຫ້ເຫັນທະຫານເດີນຂະບວນ, ຜູ້ຄົນທີ່ຂັດສົນ, ແລະ ຄວາມອຶດຢາກ.

ໂຢຮັນໄດ້ເຫັນຊາຕານ ແລະ ຜູ້ຕິດຕາມຂອງມັນຍັງສືບຕໍ່ຕໍ່ສູ້ກັບພຣະເຢຊູ ແລະ ຜູ້ຕິດຕາມຂອງພຣະອົງຢູ່ເທິງແຜ່ນດິນໂລກ. ພວກມັນໄດ້ພະຍາຍາມຫລອກລວງຜູ້ຄົນບໍ່ໃຫ້ເຊື່ອໃນພຣະກິດຕິຄຸນຂອງພຣະຜູ້ຊ່ວຍໃຫ້ລອດ. ໄດ້ເກີດມີສົງຄາມ, ການທຳລາຍລ້າງ, ແລະ ຄວາມເຈັບປ່ວຍຢ່າງຫລວງຫລາຍ.

ພຣະນິມິດ 6; 8–9; 12:17; 13:11–18; 17–18

ທູດໂມໂຣໄນກຳລັງນຳພາໂຈເຊັບສະມິດໄປຫາແຜ່ນຈາລຶກຄຳ.

ແຕ່ພຣະບິດາເທິງສະຫວັນໄດ້ສົ່ງທູດມາຈາກສະຫວັນພ້ອມກັບພຣະກິດຕິຄຸນຂອງພຣະເຢຊູຄຣິດ, ເພື່ອວ່າພຣະກິດຕິຄຸນນັ້ນຈະຖືກແບ່ງປັນກັບທຸກຄົນທີ່ຢູ່ເທິງໂລກນີ້.

ພຣະນິມິດ 14:6–7

ຜູ້ຄົນຈຳນວນໜຶ່ງເຊື່ອໃນພຣະເຢຊູ ແລະ ຮັກສາພຣະບັນຍັດຂອງພຣະອົງ, ຄືກັນກັບທີ່ເຂົາເຈົ້າໄດ້ເຮັດໃນສະຫວັນ. ປະຈັກພະຍານເຖິງພຣະເຢຊູຂອງເຂົາເຈົ້າຈະຊ່ວຍໃຫ້ເຂົາເຈົ້າຊະນະສົງຄາມຕໍ່ຕ້ານກັບຊາຕານ.

ພຣະນິມິດ 12:11; 19:8–10

ພຣະເຢຊູກຳລັງສະເດັດລົງມາຈາກສະຫວັນ, ໂດຍມີເຫລົ່າທູດຢູ່ດ້ານຫລັງຂອງພຣະອົງ.

ໂຢຮັນໄດ້ເຫັນວ່າພຣະເຢຊູຄຣິດຈະສະເດັດລົງມາເທິງໂລກນີ້ອີກຄັ້ງ. ພຣະອົງຈະເປັນຈອມກະສັດຂອງທັງແຜ່ນດິນໂລກ. ຊາຕານຈະບໍ່ມີອຳນາດອີກຕໍ່ໄປ. ເພາະຍ້ອນພຣະເຢຊູ, ຈະບໍ່ມີຄວາມໂສກເສົ້າ ຫລື ຄວາມເຈັບປວດອີກຕໍ່ໄປ. ທຸກຄົນທີ່ເຊື່ອໃນພຣະເຢຊູ ແລະ ຮັກສາພັນທະສັນຍາກັບພຣະອົງຈະມີຊີວິດຢູ່ກັບພຣະອົງ ແລະ ພຣະບິດາເທິງສະຫວັນຕະຫລອດໄປ.

ພຣະນິມິດ 19:11–16; 20:1–2; 21:1–7