ລູກາ 19:1–10
ຊັກຂ່າຍຜູ້ເກັບພາສີ
ປີນຕົ້ນໄມ້ເພື່ອເບິ່ງພຣະເຢຊູ
ພຣະເຢຊູໄດ້ໄປຢ້ຽມຢາມເມືອງເຢຣີໂກ. ຊາຍຄົນໜຶ່ງຊື່ວ່າຊັກຂ່າຍອາໄສຢູ່ທີ່ນັ້ນ. ຊັກຂ່າຍເປັນຄົນເກັບພາສີທີ່ຮັ່ງມີ. ຄົນສ່ວນໃຫຍ່ບໍ່ມັກຄົນເກັບພາສີ. ພວກເຂົາຄິດວ່າຄົນເກັບພາສີເອົາເງິນຈາກປະຊາຊົນຫລາຍເກີນໄປ.
ລູກາ 19:1–2
ຊັກຂ່າຍໄດ້ຍິນວ່າພຣະເຢຊູຢູ່ໃນເມືອງ. ລາວຢາກຮຽນຮູ້ເພີ່ມເຕີມກ່ຽວກັບພຣະອົງ. ລາວພະຍາຍາມໄປເບິ່ງພຣະເຢຊູ, ແຕ່ລາວບໍ່ສາມາດເຮັດໄດ້ ເພາະວ່າມີຜູ້ຄົນຢ່າງຫລວງຫລາຍຢູ່ອ້ອມຮອບພຣະອົງ, ແລະ ຊັກຂ່າຍກໍເຕ້ຍເກີນໄປທີ່ຈະເບິ່ງຜ່ານກາຍພວກເຂົາ. ລາວຈະເຫັນພຣະເຢຊູໄດ້ແນວໃດ?
ລູກາ 19:3–4
ຊັກຂ່າຍແລ່ນໄປທາງໜ້າ ແລະ ປີນຕົ້ນໄມ້ເພື່ອລາວຈະໄດ້ເຫັນພຣະເຢຊູ. ເມື່ອພຣະເຢຊູຜ່ານມາ, ພຣະອົງໄດ້ເງີຍພຣະພັກຂຶ້ນ ແລະ ເຫັນຊັກຂ່າຍຢູ່ເທິງຕົ້ນໄມ້. ພຣະເຢຊູຮ້ອງຊື່ຂອງລາວ ແລະ ກ່າວວ່າ “ຮີບລົງມາ.” ພຣະເຢຊູຢາກໄປຢ້ຽມຢາມລາວທີ່ເຮືອນຂອງລາວ. ຊັກຂ່າຍຟ້າວລົງມາຈາກຕົ້ນໄມ້. ລາວດີໃຈຫລາຍທີ່ພຣະເຢຊູມາເຮືອນຂອງລາວ.
ລູກາ 19:4–6
ຜູ້ຄົນໃນເມືອງເຢຣີໂກສົງໄສວ່າເປັນຫຍັງພຣະເຢຊູຈຶ່ງໄປເຮືອນຂອງຊັກຂ່າຍ. ພວກເຂົາຄິດວ່າຊັກຂ່າຍເປັນຄົນບາບເພາະວ່າລາວເປັນຄົນເກັບພາສີ.
ລູກາ 19:7
ຊັກຂ່າຍໄດ້ບອກພຣະເຢຊູວ່າ “ຂ້ານ້ອຍຂໍມອບເຂົ້າຂອງທີ່ມີຢູ່ໃຫ້ແກ່ຄົນຍາກຈົນເຄິ່ງໜຶ່ງ.” ລາວເວົ້າວ່າຖ້າລາວໄດ້ສໍ້ໂກງຜູ້ໃດຜູ້ໜຶ່ງ, ລາວກໍຂໍສົ່ງຄືນໃຫ້ຫລາຍກວ່ານັ້ນ. ພຣະເຢຊູບອກຊັກຂ່າຍວ່າ, “ໃນວັນນີ້ ຄວາມພົ້ນມາເຖິງເຮືອນຫລັງນີ້ແລ້ວ.” ພຣະເຢຊູກ່າວວ່າພຣະອົງໄດ້ມາເພື່ອຊອກຫາ ແລະ ຊ່ວຍຄົນທີ່ຫລົງທາງ.
ລູກາ 19:6, 8–10