ມັດທາຍ 4:1–10
ຊາຕານລໍ້ລວງພຣະເຢຊູ
ຕົວຢ່າງຂອງການເອົາຊະນະການລໍ້ລວງ
ຫລັງຈາກການບັບຕິສະມາຂອງພຣະອົງ, ພຣະເຢຊູໄດ້ເຂົ້າໄປໃນຖິ່ນແຫ້ງແລ້ງກັນດານເພື່ອໄປຢູ່ກັບພຣະເຈົ້າ. ພຣະອົງບໍ່ໄດ້ຮັບປະທານອາຫານເປັນເວລາສີ່ສິບວັນ. ພຣະອົງໄດ້ຖືສິນອົດເຂົ້າ ແລະ ໄດ້ອະທິຖານເພື່ອກຽມພ້ອມສຳລັບພາລະກິດຂອງພຣະອົງ.
ມັດທາຍ 4:1–2; ເບິ່ງ ການແປຂອງໂຈເຊັບ ສະມິດ ໃນໝາຍເຫດ 1ຂ ແລະ 2ຄ
ພຣະເຢຊູກໍຫິວເຂົ້າ. ຊາຕານກໍໄດ້ເຂົ້າມາ ແລະ ລໍ້ລວງພຣະອົງ. ມັນໄດ້ເວົ້າວ່າ ຖ້າພຣະເຢຊູເປັນພຣະບຸດຂອງພຣະເຈົ້າ, ພຣະອົງຈະສາມາດປ່ຽນກ້ອນຫີນໃຫ້ເປັນເຂົ້າຈີ່ໄດ້. ພຣະອົງບໍ່ເຮັດສິ່ງນັ້ນ. ພຣະອົງໄດ້ອ້າງຂໍ້ພຣະຄຳພີເພື່ອກ່າວວ່າ ພຣະອົງລ້ຽງພຣະຊົນຊີບດ້ວຍພຣະຄຳຂອງພຣະເຈົ້າ, ບໍ່ແມ່ນພຽງແຕ່ດ້ວຍເຂົ້າຈີ່ເທົ່ານັ້ນ.
ມັດທາຍ 4:2–4
ແລ້ວພຣະວິນຍານບໍລິສຸດໄດ້ນຳພຣະເຢຊູໄປທີ່ກຳແພງຂອງພຣະວິຫານ. ຊາຕານໄດ້ລໍ້ລວງພຣະເຢຊູໃຫ້ໂດດລົງ. ມັນໄດ້ເວົ້າວ່າ ຖ້າພຣະເຢຊູເປັນພຣະບຸດຂອງພຣະເຈົ້າ, ເຫລົ່າທູດຈະບໍ່ປ່ອຍໃຫ້ພຣະອົງໄດ້ຮັບບາດເຈັບ. ພຣະເຢຊູບໍ່ໄດ້ໂດດລົງ. ພຣະອົງໄດ້ບອກຊາຕານວ່າ ພຣະຄຳພີກ່າວໄວ້ວ່າ ເຮົາບໍ່ຄວນທົດລອງພຣະເຈົ້າ.
ມັດທາຍ 4:5–7; ເບິ່ງ ການແປຂອງໂຈເຊັບ ສະມິດ ໃນໝາຍເຫດ 5ກ ແລະ 6ກ
ຕໍ່ໄປ, ພຣະວິນຍານບໍລິສຸດໄດ້ນຳພຣະເຢຊູຂຶ້ນໄປເທິງຍອດພູແຫ່ງໜຶ່ງ. ຈາກທີ່ນັ້ນ, ພຣະເຢຊູໄດ້ເຫັນອານາຈັກແຫ່ງໂລກທັງໝົດ. ຊາຕານໄດ້ມາ ແລະ ໄດ້ກ່າວວ່າ ມັນຈະມອບອານາຈັກທັງໝົດເຫລົ່ານີ້ໃຫ້ພຣະເຢຊູ ຖ້າຫາກພຣະອົງຈະກົ້ມຂາບນະມັດສະການມັນ.
ມັດທາຍ 4:8–10; ເບິ່ງ ການແປຂອງໂຈເຊັບ ສະມິດ 8ກ
ພຣະເຢຊູໄດ້ບອກຊາຕານວ່າ ພຣະຄຳພີກ່າວໄວ້ວ່າ ເຮົາຄວນນະມັດສະການພຽງແຕ່ພຣະເຈົ້າເທົ່ານັ້ນ. ພຣະເຢຊູໄດ້ບອກໃຫ້ຊາຕານໜີໄປ. ພຣະເຢຊູໄດ້ໄປທີ່ຄາລີເລເພື່ອສິດສອນພຣະກິດຕິຄຸນຂອງພຣະອົງ. ພຣະອົງໄດ້ເຕັມໄປດ້ວຍອຳນາດຂອງພຣະວິນຍານບໍລິສຸດ.
ລູກາ 4:13–14