ມາຣະໂກ 14–15; ລູກາ 22–23; ໂຢຮັນ 18–19
ພຣະເຢຊູຖືກຈັບ
ການຕັດສິນພຣະບຸດຂອງພຣະເຈົ້າ
ຫລັງຈາກພຣະເຢຊູອະທິຖານ ແລະ ທົນທຸກທໍລະມານໃນເຄັດເຊມາເນແລ້ວ, ຢູດາກໍມາຮອດພ້ອມກັບທະຫານຍາມຊາວຢິວກຸ່ມໃຫຍ່. ຢູດາເປັນອັກຄະສາວົກຄົນໜຶ່ງ. ລາວຮູ້ວ່າພຣະເຢຊູມັກໄປທີ່ສວນນີ້ເລື້ອຍໆ. ຜູ້ນຳຊາວຢິວໄດ້ຈ່າຍເງິນໃຫ້ຢູດາເພື່ອຊ່ວຍພວກເຂົາຊອກຫາພຣະເຢຊູ ເພື່ອພວກເຂົາຈະສາມາດເອົາພຣະອົງໄປ.
ໂຢຮັນ 18:2–3
ໃນຂະນະທີ່ທະຫານຍາມພະຍາຍາມເອົາພຣະເຢຊູໄປ, ເປໂຕໄດ້ດຶງດາບອອກມາ. ເພິ່ນໄດ້ຕັດຫູຂອງຄົນຮັບໃຊ້ຂອງມະຫາປະໂລຫິດ.
ໂຢຮັນ 18:10
ພຣະເຢຊູໄດ້ບອກເປໂຕໃຫ້ເອົາດາບຂອງລາວເກັບໄວ້. ພຣະເຢຊູໄດ້ກ່າວວ່າພຣະອົງຕ້ອງເຮັດຕາມທີ່ພຣະບິດາຂອງພຣະອົງຕ້ອງການ.
ໂຢຮັນ 18:11
ພຣະເຢຊູໄດ້ແຕະຕ້ອງຫູຂອງຜູ້ຮັບໃຊ້ ແລະ ປິ່ນປົວມັນ.
ລູກາ 22:51
ພວກທະຫານໄດ້ພາພຣະເຢຊູໄປເຮືອນຂອງມະຫາປະໂລຫິດ. ຜູ້ນຳຊາວຢິວຄົນອື່ນໆກໍຢູ່ທີ່ນັ້ນຄືກັນ. ພວກເຂົາຕ້ອງການຊອກຫາເຫດຜົນທີ່ຈະປະຫານພຣະເຢຊູ. ພວກເຂົານຳຄົນເຂົ້າມາເພື່ອເວົ້າຕົວະກ່ຽວກັບພຣະອົງ.
ມາຣະໂກ 14:53–61
ໃນທີ່ສຸດ, ມະຫາປະໂລຫິດໄດ້ຖາມພຣະເຢຊູວ່າ ພຣະອົງເປັນພຣະບຸດຂອງພຣະເຈົ້າຫລືບໍ່. ພຣະເຢຊູໄດ້ກ່າວວ່າ, “ເຮົາເປັນ.”
ມາຣະໂກ 14:61–62
ສິ່ງນີ້ເຮັດໃຫ້ມະຫາປະໂລຫິດ ແລະ ຜູ້ນຳຄົນອື່ນໆໃຈຮ້າຍ. ພວກເຂົາໄດ້ຕີພຣະເຢຊູ, ຖົ່ມນໍ້າລາຍໃສ່ພຣະອົງ, ແລະ ເຍາະເຍີ້ຍພຣະອົງ. ພວກເຂົາຕົກລົງກັນວ່າ ພຣະອົງຄວນຈະຖືກປະຫານ.
ມາຣະໂກ 14:63–65
ຂະນະທີ່ພຣະເຢຊູຢູ່ໃນເຮືອນຂອງມະຫາປະໂລຫິດ, ເປໂຕໄດ້ລໍຖ້າຢູ່ຂ້າງນອກ. ເພິ່ນນັ່ງຢູ່ຂ້າງກອງໄຟເພື່ອຄວາມອົບອຸ່ນ. ສາມຄັ້ງ, ຜູ້ຄົນເວົ້າວ່າພວກເຂົາຈື່ເປໂຕວ່າເປັນສາວົກຄົນໜຶ່ງຂອງພຣະເຢຊູ. ແຕ່ໃນແຕ່ລະຄັ້ງ, ເປໂຕກ່າວວ່າເພິ່ນບໍ່ຮູ້ຈັກພຣະເຢຊູ.
ມາຣະໂກ 14:54, 66–71
ແລ້ວໄກ່ກໍຂັນ, ແລະ ເປໂຕກໍຈື່ໄດ້ວ່າພຣະເຢຊູໄດ້ກ່າວຫຍັງໄວ້: ວ່າເປໂຕຈະປະຕິເສດພຣະອົງສາມເທື່ອ. ເປໂຕຍ່າງໜີໄປດ້ວຍນໍ້າຕາ
ມາຣະໂກ 14:72
ຜູ້ນຳຊາວຢິວພາພຣະເຢຊູໄປຫາປີລາດ, ຜູ້ປົກຄອງຊາວໂຣມ. ຝູງຊົນກໍມານຳເຊັ່ນກັນ. ພວກຜູ້ນຳຕ້ອງການໃຫ້ປີລາດປະຫານພຣະເຢຊູ. ພວກເຂົາບອກປີລາດວ່າ ພຣະເຢຊູເອີ້ນຕົວເອງວ່າເປັນກະສັດຂອງຊາວຢິວ.
ມາຣະໂກ 15:1–3; ລູກາ 23:2; ໂຢຮັນ 18:28–31
ປີລາດໄດ້ຖາມພຣະເຢຊູວ່າ ພຣະອົງເປັນກະສັດຂອງຊາວຢິວຫລືບໍ່? ພຣະເຢຊູກ່າວວ່າ: “ອານາຈັກຂອງເຮົາບໍ່ເປັນຂອງໂລກນີ້. ພຣະອົງໄດ້ອະທິບາຍວ່າ ພຣະອົງໄດ້ມາສູ່ໂລກເພື່ອສິດສອນຄວາມຈິງໃຫ້ຜູ້ຄົນ.
ໂຢຮັນ 18:33–37
ປີລາດກ່າວວ່າເພິ່ນບໍ່ເຊື່ອວ່າພຣະເຢຊູໄດ້ເຮັດຫຍັງຜິດ. ແຕ່ຫລາຍຄົນໄດ້ຮ້ອງຂຶ້ນວ່າ, “ຄຶງມັນ.” ປີລາດໄດ້ຕັດສິນໃຈເຮັດໃນສິ່ງທີ່ພວກເຂົາຕ້ອງການ ແລະ ໃຫ້ສັງຫານພຣະເຢຊູ.
ມາຣະໂກ 15:12–14; ລູກາ 23:14–24