ມັດທາຍ 27; ລູກາ 23; ໂຢຮັນ 19
ພຣະເຢຊູສະລະພຣະຊົນຊີບຂອງພຣະອົງເພື່ອເຮົາ
ການເສຍສະລະເພື່ອຊ່ວຍເຮົາໃຫ້ລອດຈາກບາບ ແລະ ຄວາມຕາຍ
ຫລັງຈາກປີລາດໄດ້ຕັດສິນວ່າ ພຣະເຢຊູຄວນຖືກຄຶງ, ເພິ່ນໄດ້ບອກທະຫານຂອງເພິ່ນວ່າໃຫ້ເອົາພຣະເຢຊູອອກໄປ. ພວກເຂົາໄດ້ຂ້ຽນຕີພຣະອົງ, ໄດ້ຖົ່ມນ້ຳລາຍໃສ່ພຣະອົງ, ໄດ້ເອົາມົງກຸດທີ່ເຮັດດ້ວຍເຄືອໜາມສຸບໃສ່ຫົວຂອງພຣະອົງ, ແລະ ໄດ້ເຍາະເຍີ້ຍພຣະອົງ.
ມາຣະໂກ 15:15–20
ພວກທະຫານໄດ້ບັງຄັບໃຫ້ພຣະເຢຊູແບກໄມ້ກາງແຂນໜັກ. ພວກເຂົາໄດ້ພາພຣະອົງໄປບ່ອນໜຶ່ງຢູ່ນອກເຢຣູຊາເລັມທີ່ເອີ້ນວ່າ, ໂຄລະໂຄທາ.
ໂຢຮັນ 19:17
ພວກທະຫານໄດ້ຕອກຕະປູພຣະຫັດ ແລະ ພຣະບາດຂອງພຣະເຢຊູໃສ່ກັບໄມ້ກາງແຂນ. ພຣະເຢຊູໄດ້ຂໍໃຫ້ພຣະບິດາເທິງສະຫວັນຂອງພຣະອົງອະໄພໃຫ້ແກ່ພວກທະຫານ, ເພາະພວກເຂົາບໍ່ຮູ້ວ່າພວກເຂົາກຳລັງຄຶງພຣະບຸດຂອງພຣະເຈົ້າ.
ລູກາ 23:33–34; ເບິ່ງ ການແປຂອງໂຈເຊັບ ສະມິດ ໃນໝາຍເຫດຢູ່ທາງລຸ່ມໜ້າປຶ້ມ 34ຄ ນຳອີກ
ຜູ້ຮ້າຍສອງຄົນກໍຖືກຄຶງກັບພຣະເຢຊູໃນມື້ນັ້ນ. ຄົນໜຶ່ງໄດ້ເວົ້າກັບພຣະອົງວ່າ, “ເຈົ້າເປັນພຣະຄຣິດບໍ່ແມ່ນບໍ, ຈົ່ງຊ່ວຍຕົນເອງກັບຊ່ວຍເຮົາໃຫ້ພົ້ນເສຍ.”
ລູກາ 23:39
ຜູ້ຮ້າຍອີກຄົນໄດ້ເວົ້າວ່າພວກເຂົາສົມຄວນກັບໂທດຂອງຕົນ, ແຕ່ພຣະເຢຊູບໍ່ໄດ້ເຮັດຫຍັງຜິດ. ລາວໄດ້ທູນຂໍໃຫ້ພຣະເຢຊູຈື່ຈຳລາວໃນອານາຈັກຂອງພຣະອົງ. ພຣະເຢຊູໄດ້ບອກລາວວ່າ ບໍ່ດົນພວກເຂົາກັບພຣະອົງຈະໄດ້ຢູ່ນຳກັນໃນໂລກວິນຍານ.
ລູກາ 23:40–43
ແມ່ຍິງຫລາຍຄົນທີ່ໄດ້ຕິດຕາມພຣະເຢຊູຄຣິດໄດ້ມາທີ່ໄມ້ກາງແຂນເພື່ອຢູ່ກັບພຣະອົງ. ຄົນໜຶ່ງໃນບັນດາແມ່ຍິງກໍແມ່ນມານດາຂອງພຣະເຢຊູ, ນາງມາຣີ. ພຣະເຢຊູໄດ້ເຫັນນາງ ແລະ ໄດ້ບອກໂຢຮັນ, ຄົນໜຶ່ງໃນບັນດາອັກຄະສາວົກຂອງພຣະອົງວ່າ, ໃຫ້ດູແລນາງ.
ໂຢຮັນ 19:25–27; ເບິ່ງ ລູກາ 8:1–3; ມາຣະໂກ 15:40–41 ນຳອີກ.
ເປັນເວລາສາມຊົ່ວໂມງ, ຄວາມມືດໄດ້ປົກຄຸມແຜ່ນດິນ. ພຣະເຢຊູໄດ້ຮູ້ສຶກໂດດດ່ຽວຫລາຍ. ພຣະອົງໄດ້ຮູ້ສຶກຄືກັບວ່າພຣະບິດາຜູ້ສະຖິດຢູ່ໃນສະຫວັນຂອງພຣະອົງໄດ້ປະຖິ້ມພຣະອົງ.
ມັດທາຍ 27:45–46
ໃນທີ່ສຸດ, ພຣະເຢຊູກໍໄດ້ຮູ້ວ່າພຣະອົງໄດ້ສຳເລັດການທົນທຸກທໍລະມານຂອງພຣະອົງ. ພຣະອົງໄດ້ກ່າວວ່າ, “ພຣະບິດາເຈົ້າເອີຍ, ສຳເລັດແລ້ວ, ເປັນໄປຕາມພຣະປະສົງຂອງພຣະອົງ” ແລ້ວ. ແລ້ວພຣະເຢຊູກໍໄດ້ກົ້ມພຣະສຽນລົງ ແລະ ໄດ້ສະລະພຣະຊົນຊີບຂອງພຣະອົງ. ເພື່ອຈະເຫັນໄດ້ວ່າພຣະອົງໄດ້ສິ້ນພຣະຊົນແລ້ວແທ້ໆ, ທະຫານຄົນໜຶ່ງໄດ້ໃຊ້ຫອກແທງຂ້າງຂອງພຣະອົງ.
ການແປຂອງໂຈເຊັບ ສະມິດ, ມັດທາຍ 27:54 (ໃນ ມັດທາຍ 27:50, ໝາຍເຫດຢູ່ທາງລຸ່ມໜ້າປຶ້ມ ກ); ໂຢຮັນ 19:28–30, 34
ເມື່ອພຣະເຢຊູໄດ້ສິ້ນພຣະຊົນ, ແຜ່ນດິນໄດ້ສັ່ນສະເທືອນ. ໂງ່ນຫີນກໍແຕກອອກເປັນປ່ຽງໆ. ຜ້າກັ້ງໃນພຣະວິຫານ, ຜ້າກັ້ງທີ່ປົກຄຸມສະຖານທີ່ສັກສິດທີ່ສຸດໃນພຣະວິຫານ, ກໍໄດ້ຈີກອອກເປັນສອງຕ່ອນ.
ມັດທາຍ 27:51
ພວກທະຫານໄດ້ຢ້ານກົວ. “ເພິ່ນແມ່ນພຣະບຸດຂອງພຣະເຈົ້າແທ້ຈິງ,” ພວກເຂົາໄດ້ກ່າວ.
ມັດທາຍ 27:54
ສາວົກຂອງພຣະເຢຊູໄດ້ຫໍ່ພຣະສົບຂອງພຣະອົງດ້ວຍຜ້າປ່ານ ແລະ ໄດ້ວາງພຣະອົງໄວ້ໃນອຸບມຸງໃນສວນ. ຕໍ່ມາ, ພວກເພິ່ນໄດ້ກຶ່ງຫີນຂະໜາດໃຫຍ່ກ້ອນໜຶ່ງອັດປາກອຸບມຸງໄວ້.
ມັດທາຍ 27:57–61; ໂຢຮັນ 19:38–41