ມັດທາຍ 26; ລູກາ 22; ໂຢຮັນ 13–14
ເຂົ້າແລງຄາບສຸດທ້າຍ
ພຣະເຢຊູແນະນຳສິນລະລຶກ
ພຣະເຢຊູ ແລະ ອັກຄະສາວົກຂອງພຣະອົງຢູ່ໃນເຢຣູຊາເລັມເພື່ອສະຫລອງປັດສະຄາ. ປະຊາຊົນຊາວຢິວໄດ້ສະຫລອງປັດສະຄາທຸກໆປີ. ມັນຊ່ວຍໃຫ້ພວກເຂົາຈື່ຈຳວ່າ, ຫລາຍປີກ່ອນ, ຄອບຄົວຂອງພວກເຂົາໄດ້ເປັນທາດຢູ່ໃນປະເທດເອຢິບ, ແລະ ພຣະເຈົ້າໄດ້ຊ່ວຍພວກເຂົາໃຫ້ໜີໄປ.
ອົບພະຍົບ 12:27
ຂະນະທີ່ພວກເພິ່ນຢູ່ໃນເຢຣູຊາເລັມ, ພຣະເຢຊູ ແລະ ອັກຄະສາວົກຂອງພຣະອົງໄດ້ຈັດງານລ້ຽງພິເສດຮ່ວມກັນ. ພຣະເຢຊູໄດ້ລໍຄອຍທີ່ຈະແບ່ງປັນອາຫານຄ່ຳນີ້ກັບພວກເພິ່ນ.
ລູກາ 22:7–15
ຫລັງຈາກພວກເພິ່ນກິນເຂົ້າແລ້ວ, ພຣະເຢຊູໄດ້ເທນ້ຳໃສ່ຊາມ. ພຣະອົງເລີ່ມລ້າງຕີນຂອງອັກຄະສາວົກຂອງພຣະອົງ.
ໂຢຮັນ 13:4–5
ເມື່ອເຖິງຄິວຂອງເປໂຕ, ເພິ່ນໄດ້ຖາມວ່າເປັນຫຍັງພຣະເຢຊູຈຶ່ງເຮັດສິ່ງນີ້. ການລ້າງຕີນແມ່ນສິ່ງປົກກະຕິທີ່ພຽງແຕ່ຜູ້ຮັບໃຊ້ເທົ່ານັ້ນທີ່ເຮັດ.
ໂຢຮັນ 13:6
ພຣະເຢຊູກ່າວວ່າພຣະອົງກຳລັງລ້າງຕີນຂອງພວກເພິ່ນເພື່ອເປັນຕົວຢ່າງໃຫ້ພວກເພິ່ນ. ພຣະອົງຢາກໃຫ້ພວກເພິ່ນຮັບໃຊ້ ແລະ ຮັກຊຶ່ງກັນແລະກັນຄືກັບທີ່ພຣະອົງໄດ້ຮັກພວກເພິ່ນ. ຖ້າພວກເພິ່ນເຮັດສິ່ງນີ້, ຜູ້ຄົນຈະຮູ້ວ່າພວກເພິ່ນເປັນສານຸສິດຂອງພຣະອົງ.
ໂຢຮັນ 13:14–16, 34–35
ພຣະເຢຊູໄດ້ບອກສາວົກຂອງພຣະອົງວ່າ ພຣະອົງຈະສິ້ນພຣະຊົນໃນໄວໆນີ້. ເປໂຕກ່າວວ່າເພິ່ນເຕັມໃຈທີ່ຈະຕາຍເພື່ອພຣະເຢຊູ.
ໂຢຮັນ 13:36–38
ແຕ່ພຣະເຢຊູຮູ້ວ່າເວລາທີ່ຫຍຸ້ງຍາກກຳລັງຈະມາເຖິງ. ພຣະອົງໄດ້ບອກເປໂຕວ່າ ກ່ອນທີ່ໄກ່ຈະຂັນໃນມື້ອື່ນເຊົ້າ ເປໂຕຈະເວົ້າສາມເທື່ອວ່າເພິ່ນບໍ່ຮູ້ຈັກພຣະເຢຊູ.
ໂຢຮັນ 13:38
ພຣະເຢຊູຮູ້ວ່າອັກຄະສາວົກຂອງພຣະອົງອາດຈະກັງວົນ ແລະ ຢ້ານກົວ. ພຣະອົງໄດ້ສັນຍາວ່າພຣະເຈົ້າຈະສົ່ງພຣະວິນຍານບໍລິສຸດມາໃຫ້ພວກເພິ່ນ. ພຣະວິນຍານບໍລິສຸດຈະປອບໂຍນພວກເພິ່ນ, ສິດສອນພວກເພິ່ນ, ແລະ ຊ່ວຍພວກເພິ່ນໃຫ້ຈື່ຈຳສິ່ງທີ່ພຣະເຢຊູໄດ້ສິດສອນພວກເພິ່ນ. ພຣະອົງໄດ້ບອກພວກເພິ່ນວ່າຢ່າກັງວົນ ຫລື ຢ້ານກົວ. ພຣະອົງໄດ້ກ່າວວ່າ, “ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ.”
ໂຢຮັນ 14:1, 15–16, 26–27
ຈາກນັ້ນພຣະເຢຊູໄດ້ເຮັດບາງສິ່ງບາງຢ່າງທີ່ພິເສດຫລາຍ ເພື່ອຊ່ວຍໃຫ້ອັກຄະສາວົກຂອງພຣະອົງລະນຶກເຖິງພຣະອົງຕະຫລອດເວລາ. ພຣະອົງໄດ້ມອບສິນລະລຶກໃຫ້ພວກເພິ່ນ. ທຳອິດ, ພຣະອົງໄດ້ອວຍພອນເຂົ້າຈີ່, ຫັກມັນເປັນຕ່ອນໆ, ແລະ ມອບໃຫ້ອັກຄະສາວົກຂອງພຣະອົງ. ພຣະເຢຊູບອກພວກເພິ່ນໃຫ້ຄິດເຖິງພຣະກາຍຂອງພຣະອົງເມື່ອພວກເພິ່ນກິນເຂົ້າຈີ່. ພຣະອົງໄດ້ຂໍໃຫ້ພວກເພິ່ນຈື່ຈຳວ່າ ພຣະອົງຈະສິ້ນພຣະຊົນເພື່ອພວກເພິ່ນ.
ມັດທາຍ 26:26; ລູກາ 22:19
ແລ້ວພຣະເຢຊູໄດ້ຖອກເຫລົ້າອະງຸ່ນໃສ່ຈອກ. ພຣະອົງໄດ້ອວຍພອນເຫລົ້າອະງຸ່ນ ແລະ ບອກໃຫ້ອັກຄະສາວົກດື່ມມັນ. ພຣະເຢຊູໄດ້ບອກພວກເພິ່ນໃຫ້ຄິດເຖິງໂລຫິດຂອງພຣະອົງເມື່ອພວກເພິ່ນດື່ມເຫລົ້າອະງຸ່ນ. ພຣະອົງໄດ້ຂໍໃຫ້ພວກເພິ່ນຈື່ຈຳວ່າ ພຣະອົງຈະທົນທຸກທໍລະມານ, ຫລັ່ງໂລຫິດ, ແລະ ສິ້ນພຣະຊົນເພື່ອຄວາມເຈັບປວດ ແລະ ບາບຂອງຄົນທັງປວງ ເພື່ອວ່າເຮົາຈະສາມາດກັບໃຈ ແລະ ໄດ້ຮັບການໃຫ້ອະໄພ.
ມັດທາຍ 26:27–28; ລູກາ 22:20
ຈາກນັ້ນພຣະເຢຊູໄດ້ອະທິບາຍວ່າ ພຣະອົງເປັນຄືກັບເຄືອອະງຸ່ນ, ແລະ ສານຸສິດຂອງພຣະອົງເປັນຄືກັບກິ່ງງ່າ. ຖ້າກິ່ງງ່າຕິດກັບເຄືອອະງຸ່ນ, ມັນຈະເກີດຜົນ. ກິ່ງງ່າທີ່ບໍ່ເຊື່ອມຕໍ່ກັບເຄືອອະງຸ່ນຈະຕາຍ ແລະ ບໍ່ສາມາດເກີດຜົນໄດ້. ພຣະເຢຊູຢາກໃຫ້ສາວົກຂອງພຣະອົງຢູ່ໃກ້ພຣະອົງສະເໝີ ໂດຍການຮັກຊຶ່ງກັນແລະກັນ ແລະ ຮັກສາພຣະບັນຍັດຂອງພຣະອົງ.
ໂຢຮັນ 15:4–12
ຫລັງຈາກສິດສອນສິ່ງເຫລົ່ານີ້ແລ້ວ, ພຣະເຢຊູ ແລະ ອັກຄະສາວົກຂອງພຣະອົງໄດ້ຮ້ອງເພງສວດເພງໜຶ່ງ. ພວກເພິ່ນໄດ້ຍ່າງໄປຫາສວນທີ່ເອີ້ນວ່າ ເຄັດເຊມາເນ.
ມັດທາຍ 26:30