ລູກາ 4:16–31
ພຣະເຢຊູເປັນພະຍານເຖິງພາລະກິດຂອງພຣະອົງ
ຖືກປະຕິເສດໃນເມືອງນາຊາເຣັດ
ພຣະເຢຊູໄດ້ລົງເມືອສູ່ເມືອງນາຊາເຣັດ, ບ່ອນທີ່ຄອບຄົວ ແລະ ໝູ່ເພື່ອນຂອງພຣະອົງໄດ້ອາໄສຢູ່. ນັ້ນຄືບ່ອນທີ່ພຣະອົງໄດ້ຈະເລີນເຕີບໂຕຂຶ້ນມາ. ໃນວັນຊະບາໂຕ, ພຣະອົງໄດ້ໄປທີ່ທຳມະສາລາ, ບ່ອນທີ່ຜູ້ຄົນໄດ້ໄປເພື່ອສຶກສາພຣະຄຳພີ ແລະ ນະມັດສະການພຣະເຈົ້າ.
ລູກາ 4:16–17
ຢູ່ທີ່ທຳມະສາລາ, ພຣະເຢຊູໄດ້ຢືນຂຶ້ນ ແລະ ອ່ານພຣະຄຳພີຈາກສາດສະດາເອຊາຢາ. ພຣະຄຳພີໄດ້ເວົ້າວ່າ ມື້ໜຶ່ງພຣະຜູ້ຊ່ວຍໃຫ້ລອດຈະສະເດັດມາ. ພຣະອົງຈະສັ່ງສອນພຣະກິດຕິຄຸນໃຫ້ແກ່ຄົນຍາກຈົນ ແລະ ປິ່ນປົວໃຈທີ່ແຕກສະຫລາຍ. ພຣະອົງຈະຊ່ວຍຄົນຕາບອດໃຫ້ເຫັນຮຸ່ງ ແລະ ຜູ້ຄົນທີ່ເຈັບປວດ.
ເອຊາຢາ 61:1–2; ລູກາ 4:17–19
ພຣະເຢຊູໄດ້ອ່ານຈົບແລ້ວ ແລະ ໄດ້ນັ່ງລົງ. ທຸກຄົນກໍໄດ້ຈ້ອງຕາເບິ່ງພຣະອົງ. ພຣະອົງໄດ້ບອກເຂົາເຈົ້າວ່າ ໃນມື້ນັ້ນເອງ, ພຣະຄຳພີທີ່ພຣະອົງໄດ້ອ່ານກຳລັງຈະເກີດເປັນຈິງ. ພຣະອົງຄືພຣະຜູ້ຊ່ວຍໃຫ້ລອດ.
ລູກາ 4:21
ຜູ້ຄົນໃນເມືອງນາຊາເຣັດກໍປະຫລາດໃຈກັບສິ່ງທີ່ພຣະເຢຊູໄດ້ກ່າວ. ພຣະເຢຊູຈະເປັນພຣະຜູ້ຊ່ວຍໃຫ້ລອດໄດ້ແນວໃດ? ເຂົາເຈົ້າໄດ້ຄິດວ່າ ພຣະອົງກໍເປັນພຽງແຕ່ລູກຊາຍຂອງນາງມາຣີ ແລະ ໂຢເຊັບເທົ່ານັ້ນ, ບໍ່ແມ່ນພຣະບຸດຂອງພຣະເຈົ້າ. ຕໍ່ເຂົາເຈົ້າແລ້ວ, ພຣະອົງເບິ່ງຄືເປັນວ່າຄົນທຳມະດາ.
ລູກາ 4:22
ພຣະເຢຊູກໍຮູ້ວ່າ ຜູ້ຄົນຢາກໃຫ້ພຣະອົງກະທຳການມະຫັດສະຈັນເພື່ອພິສູດວ່າ ພຣະອົງຄືພຣະຜູ້ຊ່ວຍໃຫ້ລອດ. ພຣະອົງໄດ້ສິດສອນວ່າ ການມະຫັດສະຈັນແມ່ນສຳລັບຜູ້ຄົນທີ່ເຊື່ອ, ແລະ ບາງເທື່ອພຣະເຈົ້າກໍໄດ້ກະທຳການມະຫັດສະຈັນໃຫ້ແກ່ຜູ້ຄົນທີ່ບໍ່ໄດ້ເປັນເຊື້ອສາຍອິດສະຣາເອນເພາະວ່າເຂົາເຈົ້າມີສັດທາຫລາຍກວ່າ. ບາງຄົນທີ່ຢູ່ໃນທຳມະສາລາກໍໃຈຮ້າຍໃຫ້ກັບພຣະເຢຊູ.
ລູກາ 4:23–28
ເຂົາເຈົ້າໄດ້ບັງຄັບພຣະເຢຊູໃຫ້ອອກຈາກເມືອງ ແລະ ຂຶ້ນໄປເທິງຍອດເນີນພູແຫ່ງໜຶ່ງ. ເຂົາເຈົ້າຢາກໂຍນພຣະອົງລົງຈາກຍອດເນີນພູ.
ລູກາ 4:28–29
ແຕ່ພຣະເຢຊູກໍໄດ້ໜີໄປຈາກຜູ້ຄົນທີ່ໃຈຮ້າຍ.
ລູກາ 4:30
ຍ້ອນວ່າເຂົາເຈົ້າບໍ່ຢາກໃຫ້ພຣະອົງຢູ່ໃນເມືອງນາຊາເຣັດ, ພຣະເຢຊູກໍເລີຍໜີໄປສິດສອນຢູ່ເມືອງອື່ນ.
ລູກາ 4:31–32