1 ໂກຣິນໂທ 15
ຄົນທັງປວງກໍຈະຖືກຊົງບັນດານໃຫ້ມີຊີວິດເພາະກ່ຽວເນື່ອງກັບພຣະຄຣິດ
ໂປໂລສິດສອນກ່ຽວກັບການຟື້ນຄືນຊີວິດ
ສະມາຊິກຂອງສາດສະໜາຈັກຈຳນວນໜຶ່ງໃນເມືອງທີ່ມີຊື່ວ່າໂກຣິນໂທໄດ້ມີຄຳຖາມກ່ຽວກັບສິ່ງທີ່ຈະເກີດຂຶ້ນຫລັງຈາກເຮົາຕາຍ. ພວກເຂົາບໍ່ແນ່ໃຈວ່າພຣະເຢຊູໄດ້ຟື້ນຄືນພຣະຊົນແທ້ໆຫລືບໍ່. ບາງຄົນກໍເວົ້າວ່າບໍ່ມີການຟື້ນຄືນຊີວິດ. ໂປໂລໄດ້ຍິນກ່ຽວກັບເລື່ອງນີ້ ແລະ ໄດ້ຂຽນຈົດໝາຍສະບັບໜຶ່ງຫາໄພ່ພົນໃນເມືອງໂກຣິນໂທ.
1 ໂກຣິນໂທ 15:12–14
ໂປໂລໄດ້ຂຽນໄວ້ວ່າການຟື້ນຄືນພຣະຊົນຂອງພຣະເຢຊູຄຣິດແມ່ນພາກສ່ວນທີ່ສຳຄັນຂອງພຣະກິດຕິຄຸນຂອງພຣະອົງ. “ພຣະຄຣິດຊົງສິ້ນພຣະຊົນແທນຄວາມຜິດບາບຂອງເຮົາທັງຫລາຍ,” ໂປໂລໄດ້ກ່າວ, ແລະ “ໃນວັນຖ້ວນສາມ ໄດ້ຖືກຊົງບັນດານໃຫ້ເປັນຄືນມາສູ່ຊີວິດ.” ຫລາຍກວ່າ 500 ຄົນທີ່ໄດ້ເຫັນພຣະອົງ ຫລັງຈາກການຟື້ນຄືນພຣະຊົນ, ລວມທັງໂປໂລ ແລະ ອັກຄະສາວົກຄົນອື່ນໆ.
1 ໂກຣິນໂທ 15:1–8
ໂປໂລໄດ້ສິດສອນວ່າຖ້າຫາກພຣະຄຣິດບໍ່ໄດ້ຟື້ນຄືນພຣະຊົນ, ເຮົາທຸກຄົນອາດຈະໂສກເສົ້າ ແລະ ປາດສະຈາກຄວາມຫວັງ. ຍ້ອນການຕົກຂອງອາດາມ, ເຮົາທຸກຄົນຈະຕາຍ, ແຕ່ວ່າຍ້ອນພຣະເຢຊູຄຣິດ, ເຮົາທຸກຄົນຈະຟື້ນຄືນຊີວິດເຊັ່ນກັນ!
1 ໂກຣິນໂທ 15:17–22
ໂປໂລໄດ້ເຕືອນໃຈໄພ່ພົນໃນເມືອງໂກຣິນໂທວ່າຜູ້ຄົນກຳລັງຮັບບັບຕິສະມາແທນຄົນຕາຍ. ເປັນຫຍັງເຮົາຈຶ່ງຈຳເປັນຕ້ອງເຮັດເຊັ່ນນັ້ນຖ້າວ່າຜູ້ຄົນທີ່ຕາຍໄປແລ້ວນັ້ນຈະບໍ່ມີວັນຟື້ນຄືນຊີວິດກັບມາອີກຄັ້ງ? ເຮົາຮັບບັບຕິສະມາແທນຄົນຕາຍ ເພາະເຮົາຮູ້ວ່າທຸກຄົນຈະມີຊີວິດອີກຄັ້ງ. ສິ່ງນີ້ຈະຊ່ວຍພວກເຂົາໃຫ້ໄດ້ຮັບໂອກາດທີ່ຈະໄດ້ຮັບພອນຈາກພຣະຜູ້ເປັນເຈົ້າ.
1 ໂກຣິນໂທ 15:29
ໄພ່ພົນບາງຈຳນວນໃນເມືອງໂກຣິນໂທສົງໄສວ່າຮ່າງກາຍຂອງເຮົາຈະເປັນແນວໃດເມື່ອເຮົາຟື້ນຄືນຊີວິດ. ໂປໂລໄດ້ເວົ້າວ່າຮ່າງກາຍຂອງເຮົາຈະມີລັດສະໝີພາບ. ຮ່າງກາຍນັ້ນຈະບໍ່ອ່ອນເພຍ ຫລື ເຈັບປ່ວຍ ຫລືເຖົ້າແກ່ລົງໄປ. ບາງຄົນຈະມີຮ່າງກາຍຊັ້ນສູງ, ທີ່ສົດໃສຄືກັນກັບດວງຕາເວັນ. ບາງຄົນກໍຈະຮຸ່ງແຈ້ງຄືກັນກັບດວງເດືອນ, ແລະ ບາງຄົນກໍຈະຮຸ່ງແຈ້ງຄືກັນກັບດວງດາວ.
1 ໂກຣິນໂທ 15:35, 40–43; ຄຳສອນ ແລະ ພັນທະສັນຍາ 76:96–98; 88:20–23