ລູກາ 2; ມັດທາຍ 2:1–15
ພຣະຜູ້ຊ່ວຍໃຫ້ລອດໄດ້ມາກຳເນີດແລ້ວ
ຄຳສັນຍາຂອງພຣະເຈົ້າໄດ້ສຳເລັດແລ້ວ
ໂຢເຊັບ ແລະ ນາງມາຣີໄດ້ອາໄສຢູ່ໃນເມືອງນາຊາເຣັດ. ນາງມາຣີໃກ້ຈະເກີດລູກແລ້ວ. ທຸກຄົນຕ້ອງໄປທີ່ບ້ານເກີດເມືອງນອນຂອງຕົນເພື່ອຈົດທະບຽນສຳມະໂນຄົວ. ນີ້ກໍໝາຍຄວາມວ່າ ໂຢເຊັບ ແລະ ນາງມາຣີຕ້ອງໄປຍັງເມືອງເບັດເລເຮັມ, ບ້ານເກີດຂອງໂຢເຊັບ. ພວກເພິ່ນຕ້ອງເດີນທາງຍາວໄກເພື່ອຈະໄປເຖິງທີ່ນັ້ນ.
ລູກາ 2:1–5
ການເດີນທາງບໍ່ໄດ້ເປັນເລື່ອງງ່າຍສຳລັບນາງມາຣີ. ຍ້ອນວ່າຄົນເປັນຈຳນວນຫລວງຫລາຍໄດ້ມາທີ່ເມືອງເບັດລາເຮັມ, ນາງມາຣີ ແລະ ໂຢເຊັບຫາທີ່ພັກບໍ່ໄດ້ເພື່ອໃຫ້ນາງມາຣີເກີດລູກຂອງນາງ.
ລູກາ 2:6–7
ພວກເພິ່ນໄດ້ພົບທີ່ພັກ ທີ່ຕາມປົກກະຕິແລ້ວເປັນບ່ອນພັກຂອງສັດ. ໃນສະຖານທີ່ຕ່ຳຕ້ອຍນີ້, ພຣະເຢຊູໄດ້ກຳເນີດ. ນາງມາຣີ ແລະ ໂຢເຊັບຮັກ ແລະ ດູແລພຣະກຸມມານນ້ອຍເຢຊູ. ພວກເພິ່ນໄດ້ເອົາຜ້າມາພັນພຣະອົງເພື່ອຊ່ວຍໃຫ້ພຣະອົງອົບອຸ່ນ ແລະ ສະບາຍຕົວ. ພວກເພິ່ນໄດ້ວາງພຣະອົງໃຫ້ນອນຢູ່ໃນຮາງຫຍ້າ, ຊຶ່ງຕາມປົກກະຕິແລ້ວແມ່ນໃຊ້ເປັນບ່ອນເກືອສັດ.
ລູກາ 2:6–7
ຢູ່ໃກ້ໆນັ້ນ, ກຸ່ມຄົນລ້ຽງແກະກຳລັງນອນເຝົ້າຝູງແກະຂອງພວກເຂົາໃນເວລາກາງຄືນ. ໃນທັນໃດນັ້ນ, ແສງສະຫວ່າງທີ່ເຈີດຈ້າ ກໍສ່ອງແຈ້ງອ້ອມຮອບພວກເຂົາ, ແລະ ທູດສະຫວັນອົງໜຶ່ງກໍໄດ້ມາປະກົດ. ກຸ່ມຄົນລ້ຽງແກະກໍຢ້ານກົວ.
ທູດສະຫວັນໄດ້ບອກພວກເຂົາວ່າ ຢ່າຢ້ານເລີຍ, ເພາະເພິ່ນມີຂ່າວດີປະເສີດມາບອກ. ພຣະຜູ້ຊ່ວຍໃຫ້ລອດໄດ້ກຳເນີດແລ້ວໃນເມືອງເບັດເລເຮັມ, ແລະ ວ່າພວກເຂົາສາມາດພົບພຣະອົງນອນຢູ່ໃນຮາງຫຍ້າ. ແລ້ວເຫລົ່າທູດອີກຫລາຍອົງກໍໄດ້ມາ, ກ່າວວ່າ, “ພຣະລັດສະໝີຈົ່ງມີແດ່ພຣະເຈົ້າໃນສະຫວັນທີ່ສູງສຸດ ແລະ ທີ່ແຜ່ນດິນໂລກຈົ່ງມີສັນຕິສຸກແກ່ມະນຸດທັງປວງ.”
ລູກາ 2:10–15
ກຸ່ມຄົນລ້ຽງແກະໄດ້ພາກັນຮີບໄປເມືອງເບັດເລເຮັມ ແລະ ໄດ້ພົບເຫັນພຣະກຸມມານນ້ອຍເຢຊູ, ດັ່ງທີ່ທູດສະຫວັນອົງນັ້ນໄດ້ກ່າວໄວ້. ພວກເຂົາໄດ້ບອກຜູ້ຄົນກ່ຽວກັບສິ່ງອັດສະຈັນທີ່ພວກເຂົາໄດ້ເຫັນ ແລະ ໄດ້ຍິນ. ພວກເຂົາຮູ້ວ່າພຣະເຢຊູເປັນເດັກນ້ອຍທີ່ພິເສດ.
ລູກາ 2:16–17
ນາງມາຣີ ແລະ ໂຢເຊັບໄດ້ນຳພຣະກຸມມານນ້ອຍເຢຊູໄປທີ່ພຣະວິຫານເພື່ອຖວາຍພຣະອົງແກ່ພຣະເຈົ້າ. ຢູ່ທີ່ນັ້ນ ພວກເພິ່ນໄດ້ພົບຊາຍຄົນໜຶ່ງຊື່ວ່າ ຊີເມໂອນ. ພຣະວິນຍານບໍລິສຸດໄດ້ບອກຊີເມໂອນວ່າ ເພິ່ນຈະໄດ້ພົບພຣະຜູ້ຊ່ວຍໃຫ້ລອດກ່ອນເພິ່ນຕາຍ. ເພິ່ນໄດ້ອູ້ມພຣະກຸມມານນ້ອຍ ແລະ ໄດ້ເວົ້າວ່າ ພຣະເຢຊູຈະໂຜດລູກໆທຸກຄົນຂອງພຣະເຈົ້າໃຫ້ລອດ. ໂຈເຊັບ ແລະ ນາງມາຣີກໍປະຫລາດໃຈກັບສິ່ງທີ່ເພິ່ນໄດ້ກ່າວ.
ລູກາ 2:22–35
ຢູ່ທີ່ພຣະວິຫານຍັງມີອີກຄົນໜຶ່ງຊື່ວ່າອານາ. ສາມີຂອງນາງໄດ້ເສຍຊີວິດຫລາຍປີກ່ອນ. ບັດນີ້ ນາງອານາໄດ້ໃຊ້ເວລາທັງໝົດຂອງນາງນະມັດສະການພຣະເຈົ້າຢູ່ໃນພຣະວິຫານ. ນາງໄດ້ຂອບພຣະໄທພຣະເຈົ້າສຳລັບໂອກາດທີ່ໄດ້ພົບພຣະຜູ້ຊ່ວຍໃຫ້ລອດ. ເມື່ອໃດກໍຕາມທີ່ນາງໄດ້ພົບຄົນໃດຄົນໜຶ່ງທີ່ກຳລັງຄອຍຖ້າພຣະຜູ້ຊ່ວຍໃຫ້ລອດ, ນາງກໍບອກພວກເຂົາກ່ຽວກັບພຣະເຢຊູ.
ລູກາ 2:36–38
ເມື່ອພຣະເຢຊູໄດ້ມາກຳເນີດ, ພວກໂຫລາຈານໃນແຜ່ນດິນອື່ນອີກກໍໄດ້ເຫັນດາວດວງໃໝ່. ພວກເພິ່ນກໍໄດ້ຮູ້ວ່າ ນັ້ນໝາຍຄວາມວ່າ ເດັກນ້ອຍທີ່ພິເສດໄດ້ມາກຳເນີດ ຜູ້ທີ່ຈະເປັນພຣະບຸດຂອງພຣະເຈົ້າ ແລະ ພຣະຜູ້ຊ່ວຍໃຫ້ລອດຂອງໂລກ. ພວກເພິ່ນໄດ້ເລີ່ມການເດີນທາງທີ່ຍາວໄກເພື່ອຢ້ຽມຢາມເດັກນ້ອຍຄົນນີ້ ແລະ ນະມັດສະການພຣະອົງ. ພວກເພິ່ນຢາກນຳຂອງຂວັນມາໃຫ້ພຣະອົງເພື່ອສະແດງຄວາມຮັກຂອງພວກເພິ່ນທີ່ມີຕໍ່ພຣະອົງ.
ມັດທາຍ 2:1–7; ເບິ່ງ ການແປຂອງໂຈເຊັບ ສະມິດ ໃນໝາຍເຫດ, 2ກ
ຫລັງຈາກໄດ້ເດີນທາງເປັນເວລາດົນນານ, ພວກໂຫລາຈານກໍໄດ້ມາທີ່ນະຄອນເຢຣູຊາເລັມ. ພວກເພິ່ນໄດ້ເວົ້າວ່າ ກະສັດອົງໃໝ່ຂອງຊາວຢິວ, ພຣະຜູ້ຊ່ວຍໃຫ້ລອດ, ໄດ້ກຳເນີດແລ້ວ, ແລະ ພວກເພິ່ນກໍໄດ້ມານະມັດສະການພຣະອົງ. ພວກເພິ່ນໄດ້ຖາມວ່າພວກເພິ່ນຈະພົບເຫັນກະສັດອົງໃໝ່ຢູ່ໃສ.
ມັດທາຍ 2:1–2
ກະສັດອົງໜຶ່ງຊື່ ເຮໂຣດ ໄດ້ຍິນວ່າພວກໂຫລາຈານກຳລັງຊອກຫາກະສັດອົງໃໝ່. ເພິ່ນໄດ້ເກີດຄວາມກັງວົນ. ພວກປະໂລຫິດ ແລະ ພວກທຳມະຈານຂອງເພິ່ນໄດ້ບອກເພິ່ນວ່າ ພຣະຄຳພີໄດ້ກ່າວໄວ້ວ່າ ກະສັດອົງໃໝ່ຈະມາກຳເນີດໃນເມືອງເບັດເລເຮັມ. ເຮໂຣດໄດ້ບອກພວກໂຫລາຈານໃຫ້ໄປຊອກຫາໃນເມືອງເບັດເລເຮັມ ແລ້ວໃຫ້ກັບມາ ແລະ ບອກເພິ່ນເມື່ອພວກເພິ່ນໄດ້ພົບເຫັນເຫັນກະສັດອົງໃໝ່ແລ້ວ.
ມັດທາຍ 2:3–8
ພວກໂຫລາຈານໄດ້ມາທີ່ເມືອງເບັດເລເຮັມ. ພວກເພິ່ນໄດ້ຕິດຕາມດາວດວງນັ້ນ, ຊຶ່ງໄດ້ນຳພາພວກເພິ່ນມາຫາພຣະເຢຊູ. ເມື່ອພວກເພິ່ນໄດ້ພົບເຫັນພຣະອົງ ແລະ ນາງມາຣີ ແລະ ໂຢເຊັບ, ພວກເພິ່ນກໍໄດ້ມອບຂອງຂວັນພິເສດສາມຢ່າງໃຫ້ພຣະເຢຊູ ແລະ ໄດ້ນະມັດສະການພຣະອົງ. ພຣະເຈົ້າໄດ້ເຕືອນພວກເພິ່ນວ່າບໍ່ໃຫ້ກັບຄືນໄປຫາເຮໂຣດ, ສະນັ້ນພວກເພິ່ນຈຶ່ງໄດ້ກັບຄືນເມືອບ້ານຕາມທາງອື່ນ.
ມັດທາຍ 2:9–12
ຫລັງຈາກພວກໂຫລາຈານໄດ້ໜີໄປແລ້ວ, ໂຈເຊັບໄດ້ຝັນ. ໃນຄວາມຝັນນັ້ນ, ທູດສະຫວັນໄດ້ບອກໂຢເຊັບວ່າ ເຮໂຣດໃຈຮ້າຍ. ໂຈເຊັບຈຳເປັນຕ້ອງພານາງມາຣີ ແລະ ພຣະເຢຊູໄປປະເທດເອຢິບເພື່ອຮັກສາພວກເພິ່ນໃຫ້ປອດໄພ.
ມັດທາຍ 2:13
ໂຢເຊັບໄດ້ລຸກຂຶ້ນທັນທີ. ເພິ່ນໄດ້ໜີໄປປະເທດເອຢິບກັບນາງມາຣີ ແລະ ພຣະເຢຊູໃນຂະນະທີ່ຍັງມືດຢູ່.
ມັດທາຍ 2:14
ມາຣີ, ໂຢເຊັບ, ແລະ ພຣະເຢຊູໄດ້ອາໄສຢູ່ໃນເອຢິບຈົນກວ່າທູດສະຫວັນໄດ້ບອກພວກເພິ່ນວ່າ ເຮໂຣດໄດ້ເສຍຊີວິດແລ້ວ ແລະ ມັນປອດໄພແລ້ວທີ່ຈະກັບບ້ານ. ແລ້ວພວກເພິ່ນກໍໄດ້ກັບຄືນໄປອາໄສຢູ່ໃນເມືອງນາຊາເຣັດ.
ມັດທາຍ 2:15, 19–23