ກິດຈະການ 8:5–24
ຊີໂມນ ແລະ ອຳນາດຂອງພຣະເຈົ້າ
ການຮຽນຮູ້ກ່ຽວກັບຖານະປະໂລຫິດຂອງພຣະເຈົ້າ
ຊາຍຄົນໜຶ່ງຊື່ ຊີໂມນ ໄດ້ອາໄສຢູ່ໃນແຂວງຊາມາເຣຍ. ເມື່ອລາວໄດ້ຍິນພຣະກິດຕິຄຸນຂອງພຣະເຢຊູຄຣິດ, ລາວກໍເຊື່ອ. ລາວຍັງປະຫລາດໃຈໂດຍການອັດສະຈັນທີ່ສາວົກຂອງພຣະເຢຊູໄດ້ກະທຳດ້ວຍອຳນາດຂອງພຣະເຈົ້ານຳອີກ. ຊີໂມນໄດ້ຮັບບັບຕິສະມາ, ແລະ ຊາຍ ແລະ ຍິງຫລາຍຄົນໃນແຂວງຊາມາເຣຍກໍໄດ້ຮັບບັບຕິສະມາຄືກັນ.
ກິດຈະການ 8:5–13
ພວກອັກຄະສາວົກທີ່ຢູ່ໃນນະຄອນເຢຣູຊາເລັມໄດ້ຍິນວ່າຜູ້ຄົນຢູ່ໃນແຂວງຊາມາເຣຍໄດ້ຮັບບັບຕິສະມາ. ເປໂຕ ແລະ ໂຢຮັນໄດ້ໄປທີ່ແຂວງຊາມາເຣຍ. ໂດຍການໃຊ້ອຳນາດຂອງພຣະເຈົ້າ, ຖານະປະໂລຫິດ, ພວກເພິ່ນໄດ້ວາງມືໃສ່ຜູ້ຄົນທີ່ໄດ້ຮັບບັບຕິສະມາ ແລະ ໄດ້ປະທານຂອງປະທານແຫ່ງພຣະວິນຍານບໍລິສຸດໃຫ້ເຂົາເຈົ້າ.
ກິດຈະການ 8:14–17
ເມື່ອຊີໂມນໄດ້ເຫັນເປໂຕ ແລະ ໂຢຮັນເຮັດສິ່ງນີ້, ລາວກໍໄດ້ສະເໜີມອບເງິນໃຫ້ພວກເພິ່ນ ແລະ ໄດ້ກ່າວວ່າ, “ຂໍໃຫ້ຂ້ານ້ອຍມີລິດອຳນາດຢ່າງນີ້ເໝືອນກັນ.” ລາວຢາກຊື້ຖານະປະໂລຫິດຂອງພຣະເຈົ້າເພື່ອວ່າ ລາວຈະສາມາດມອບຂອງປະທານແຫ່ງພຣະວິນຍານບໍລິສຸດໃຫ້ຄືກັນ.
ກິດຈະການ 8:18–19
ເປໂຕໄດ້ອະທິບາຍວ່າ ບໍ່ມີໃຜສາມາດຊື້ອຳນາດຂອງພຣະເຈົ້າໄດ້. ມັນເປັນຂອງປະທານຈາກພຣະອົງ. ເປໂຕໄດ້ບອກຊີໂມນວ່າ ໃຈຂອງລາວຕ້ອງການການປ່ຽນແປງ. ເພິ່ນໄດ້ເຊື້ອເຊີນຊີໂມນໃຫ້ກັບໃຈ ແລະ ອະທິຖານຫາພຣະເຈົ້າເພື່ອການໃຫ້ອະໄພ.
ກິດຈະການ 8:20–23
ຊີໂມນເສຍໃຈ. ລາວໄດ້ຂໍໃຫ້ເປໂຕອະທິຖານເພື່ອລາວ ເພື່ອຊ່ວຍໃຫ້ລາວປ່ຽນແປງ.
ກິດຈະການ 8:24