ກິດຈະການ 21–22; 26–28
ສິ່ງມະຫັດສະຈັນໃນລະຫວ່າງການເດີນທາງຂອງໂປໂລໄປນະຄອນໂຣມ
ພຣະຜູ້ເປັນເຈົ້າປະທານພອນໃຫ້ແກ່ຜູ້ຮັບໃຊ້ຂອງພຣະອົງ
ພຣະວິນຍານໄດ້ບອກໃຫ້ໂປໂລໄປທີ່ນະຄອນເຢຣູຊາເລັມ. ຫລາຍຄົນຢູ່ທີ່ນັ້ນບໍ່ມັກສິ່ງທີ່ໂປໂລໄດ້ສິດສອນກ່ຽວກັບພຣະເຢຊູຄຣິດ. ເຂົາເຈົ້າໄດ້ຈັບ ແລະ ມັດເພິ່ນໄວ້ດ້ວຍໂສ້. ໂປໂລໄດ້ບອກທຸກຄົນກ່ຽວກັບເວລາທີ່ເພິ່ນໄດ້ເຫັນແສງສະຫວ່າງຈາກສະຫວັນ, ໄດ້ຍິນສຸລະສຽງຂອງພຣະເຢຊູ, ແລະ ໄດ້ຮັບບັບຕິສະມາ.
ກິດຈະການ 21:4, 12–13, 27–40; 22:1–16
ໂປໂລໄດ້ຖືກຂັງໄວ້ໃນຄຸກ. ໃນຂະນະທີ່ເພິ່ນຢູ່ທີ່ນັ້ນ, ພຣະເຢຊູໄດ້ມາປະກົດຕົວ ແລະ ໄດ້ກ່າວວ່າ, “ຢ່າສູ່ຢ້ານ.” ພຣະອົງໄດ້ກ່າວວ່າໂປໂລຈະຕ້ອງໄດ້ສະແດງປະຈັກພະຍານເຖິງພຣະອົງຢູ່ທີ່ນະຄອນໂຣມ.
ກິດຈະການ 23:10–11
ໂປໂລໄດ້ຖືກພາຕົວໄປຢູ່ຕໍ່ໜ້າຜູ້ປົກຄອງ ແລະ ກະສັດ. ເພິ່ນໄດ້ເປັນພະຍານເຖິງພຣະເຢຊູຄຣິດຢ່າງກ້າຫານຕໍ່ຜູ້ປົກຄອງທີ່ມີອຳນາດເຫລົ່ານີ້. ເພິ່ນຢາກໃຫ້ທຸກຄົນເຊື່ອໃນພຣະເຢຊູ.
ກິດຈະການ 24:10–27; 25:6–8, 17–19; 26:1–29
ກະສັດໄດ້ສົ່ງໂປໂລໄປນະຄອນໂຣມເພື່ອໃຫ້ຖືກພິພາກສາໂດຍກາຍຊາ, ຜູ້ເປັນຈັກກະພັດ. ໂປໂລໄດ້ເດີນທາງດ້ວຍເຮືອພ້ອມກັນກັບນັກໂທດຄົນອື່ນໆ, ໂດຍໄດ້ຢຸດແວ່ຕາມຈຸດຕ່າງໆລະຫວ່າງທາງ. ເມື່ອແວ່ພັກຢູ່ທີ່ຈຸດໜຶ່ງ, ໂປໂລຮູ້ຈັກໄດ້ວ່າອີກບໍ່ດົນລະດູໜາວກໍຈະມາຮອດແລ້ວ. ຖ້າຫາກພວກເຂົາຍັງສືບຕໍ່ເດີນທາງ, ພວກເຂົາກໍຈະຕົກຢູ່ໃນອັນຕະລາຍຢ່າງໃຫຍ່ຫລວງ. ເພິ່ນໄດ້ບອກລູກເຮືອໃຫ້ລໍຖ້າຈົນກວ່າສະພາບອາກາດຈະດີຂຶ້ນ.
ກິດຈະການ 27:1–10
ບໍ່ມີໃຜເຊື່ອໂປໂລ, ດັ່ງນັ້ນພວກເຂົາຈຶ່ງສືບຕໍ່ແລ່ນເຮືອ. ໄດ້ເກີດມີລົມພະຍຸໃຫຍ່, ແລະ ເຮືອກໍຖືກຄື້ນທະເລພັດໄປມາເປັນເວລາຫລາຍມື້. ພວກເຂົາບໍ່ສາມາດເຫັນຕາເວັນ ຫລື ດວງດາວໄດ້ເລີຍ. ພວກເຂົາໄດ້ຄິດວ່າພວກເຂົາຈະຕ້ອງຕາຍໃນລົມພະຍຸນັ້ນແລ້ວ.
ກິດຈະການ 27:11–20
ໃນຄືນໜຶ່ງ, ທູດອົງໜຶ່ງຂອງພຣະເຈົ້າໄດ້ມາຢ້ຽມຢາມໂປໂລ ແລະ ໄດ້ກ່າວວ່າ, “ໂປໂລເອີຍ, ຢ່າສູ່ຢ້ານ.” ທູດອົງນັ້ນໄດ້ກ່າວວ່າ ໂປໂລຈະໄປຮອດນະຄອນໂຣມ, ຕາມທີ່ພຣະຜູ້ເປັນເຈົ້າໄດ້ສັນຍາໄວ້. ພຣະອົງໄດ້ກ່າວວ່າພຣະເຈົ້າຈະປົກປ້ອງທຸກຄົນທີ່ຢູ່ເທິງເຮືອ—ແລະຈະບໍ່ມີໃຜຄົນໃດໃນພວກເຂົາຈະຕ້ອງຕາຍ.
ກິດຈະການ 27:23–24
ໂປໂລໄດ້ບອກທຸກຄົນເຖິງສິ່ງທີ່ທູດອົງນັ້ນໄດ້ກ່າວໄວ້. “ຈົ່ງຊື່ນໃຈເທາະ,” ໂປໂລໄດ້ກ່າວ, “ເພາະເຮົາໄດ້ວາງໃຈເຊື່ອໃນພຣະເຈົ້າ.”
ກິດຈະການ 27:21–25
ຫລາຍມື້ຕໍ່ມາ, ເຮືອລຳດັ່ງກ່າວໄດ້ເກີດອຸບັດຕິເຫດ ແລະ ຈົມລົງ. ແຕ່ກໍເປັນດັ່ງທີ່ທູດອົງນັ້ນໄດ້ສັນຍາໄວ້, ບໍ່ມີໃຜຢູ່ເທິງເຮືອໄດ້ເສຍຊີວິດ. ພວກເຂົາທັງໝົດໄດ້ພາກັນລອຍໄປຫາເກາະທີ່ມີຊື່ວ່າມັນຕາ.
ກິດຈະການ 27:40–44; 28:1
ຜູ້ຄົນທີ່ອາໄສຢູ່ເທິງເກາະມັນຕາໃຈດີກັບໂປໂລ ແລະ ຄົນອື່ນໆທີ່ມາຈາກເຮືອ. ເຂົາເຈົ້າໄດ້ກໍ່ກອງໄຟເພື່ອວ່າທຸກຄົນຈະໄດ້ຮັບຄວາມອົບອຸ່ນ.
ກິດຈະການ 28:2
ທັນໃດນັ້ນ, ໄດ້ມີງູໂຕໜຶ່ງອອກມາຈາກກອງໄຟ ແລະ ກັດທີ່ມືຂອງໂປໂລ. ແຕ່ວ່າໂປໂລບໍ່ໄດ້ຮັບບາດເຈັບ. ເພິ່ນພຽງແຕ່ສັ່ນໃຫ້ງູໂຕນັ້ນຕົກອອກ. ຜູ້ຄົນຕ່າງກໍພາກັນປະຫລາດໃຈ!
ກິດຈະການ 28:3–6
ມີຊາຍຄົນໜຶ່ງຊື່ວ່າປົບລີໂອໄດ້ໃຫ້ໂປໂລມາພັກຢູ່ທີ່ບ້ານຂອງລາວ. ພໍ່ຂອງປົບລີໂອໄດ້ປ່ວຍໜັກ. ໂປໂລໄດ້ວາງມືໃສ່ເພິ່ນ ແລະ ໃຊ້ອຳນາດຂອງພຣະເຈົ້າເພື່ອປິ່ນປົວເພິ່ນ.
ກິດຈະການ 28:7–8
ໂປໂລໄດ້ຢູ່ທີ່ເກາະມັນຕາເປັນເວລາສາມເດືອນ. ພຣະຜູ້ເປັນເຈົ້າໄດ້ຊ່ວຍເພິ່ນໃຫ້ເຮັດສິ່ງມະຫັດສະຈັນຫລາຍຢ່າງ, ໃຫ້ພອນ ແລະ ປິ່ນປົວຜູ້ຄົນທີ່ເຈັບປ່ວຍ. ຈາກນັ້ນ, ດັ່ງທີ່ພຣະຜູ້ເປັນເຈົ້າໄດ້ສັນຍາໄວ້, ໂປໂລໄດ້ເດີນທາງໄປທີ່ນະຄອນໂຣມ.
ກິດຈະກາ 28:9–16
ໂປໂລຍັງເປັນນັກໂທດໃນຂະນະທີ່ເພິ່ນຢູ່ທີ່ນະຄອນໂຣມ. ແຕ່ວ່າທະຫານຍາມໄດ້ອະນຸຍາດໃຫ້ຜູ້ຄົນມາຢ້ຽມຢາມເພິ່ນໄດ້. ໂປໂລໄດ້ສິດສອນກ່ຽວກັບພຣະເຢຊູຄຣິດໃຫ້ກັບຜູ້ຄົນທີ່ຢາກຟັງ. ເພິ່ນຍັງໄດ້ຂຽນຈົດໝາຍ ຫາສະມາຊິກຂອງສາດສະໜາຈັກທີ່ຢູ່ໃນຫລາຍບ່ອນນຳອີກ. ຈົດໝາຍ, ຫລື ສານຈຳນວນໜຶ່ງເຫລົ່ານີ້, ແມ່ນຢູ່ໃນພຣະຄຳພີໃໝ່.
ກິດຈະການ 28:16–31