ພຣະເຢຊູໄດ້ຮັບບັບຕິສະມາ

ການເປັນຕົວຢ່າງຂອງການເຊື່ອຟັງພຣະເຈົ້າ

ພຣະເຈົ້າໄດ້ເອີ້ນໂຢຮັນເພື່ອຊ່ວຍໃຫ້ຜູ້ຄົນກຽມພ້ອມສຳລັບການສະເດັດມາຂອງພຣະເຢຊູຄຣິດ. ໂຢຮັນໄດ້ສິດສອນຜູ້ຄົນໃຫ້ກັບໃຈ ແລະ ຮັບບັບຕິສະມາ. ຜູ້ຄົນໄດ້ເອີ້ນເພິ່ນວ່າ ໂຢຮັນບັບຕິສະໂຕ.

ມັດທາຍ 3:1–12

ພຣະເຢຊູໄດ້ສະເດັດມາຫາໂຢຮັນເພື່ອຮັບບັບຕິສະມາ.

ໂຢຮັນເປັນຄູສອນທີ່ມີພະລັງ. ຫລາຍຄົນໄດ້ມາຟັງເພິ່ນ ແລະ ຮັບບັບຕິສະມາ. ມື້ໜຶ່ງ, ພຣະເຢຊູກໍໄດ້ສະເດັດມາເພື່ອຮັບບັບຕິສະມາ.

ມັດທາຍ 3:5, 13

ໂຢຮັນຮູ້ວ່າ ພຣະເຢຊູໄດ້ເຊື່ອຟັງພຣະເຈົ້າສະເໝີ. ພຣະອົງບໍ່ຈຳເປັນຕ້ອງກັບໃຈ. ໂຢຮັນບໍ່ໄດ້ຄິດວ່າເພິ່ນຄວນໃຫ້ບັບຕິສະມາແກ່ພຣະເຢຊູ. ໂຢຮັນໄດ້ຄິດວ່າພຣະເຢຊູຄວນໃຫ້ບັບຕິສະມາເພິ່ນ!

ມັດທາຍ 3:14

ພຣະເຢຊູໄດ້ກ່າວວ່າ ພຣະອົງກໍຍັງຕ້ອງຮັບບັບຕິສະມາເຊັ່ນກັນ. ພຣະອົງຢາກເຊື່ອຟັງພຣະບັນຍັດທັງໝົດຂອງພຣະບິດາຂອງພຣະອົງ. ພຣະອົງຍັງຢາກເປັນຕົວຢ່າງໃຫ້ກັບເຮົາເຊັ່ນກັນ. ໂຢຮັນໄດ້ໃຫ້ບັບຕິສະມາແກ່ພຣະອົງ.

ມັດທາຍ 3:13–15; 2 ນີໄຟ 31:5–7

ພຣະເຢຊູໄດ້ຮັບບັບຕິສະມາ. ພຣະວິນຍານບໍລິສຸດສະເດັດລົງມາ.

ຫລັງຈາກພຣະເຢຊູໄດ້ຂຶ້ນມາຈາກນ້ຳ, ພຣະວິນຍານບໍລິສຸດໄດ້ສະເດັດລົງມາປະທັບຢູ່ເທິງພຣະອົງໃນຮູບລັກສະນະນົກເຂົາ. ພຣະບິດາເທິງສະຫວັນໄດ້ກ່າວຈາກຟ້າສະຫວັນ, ໂດຍກ່າວວ່າ, “ທ່ານຜູ້ນີ້ເປັນບຸດທີ່ຮັກຂອງເຮົາ.” ພຣະບິດາເທິງສະຫວັນພໍພຣະໄທຫລາຍກັບພຣະເຢຊູ.

ມັດທາຍ 3:16–17