ມັດທາຍ 13
ພຣະເຢຊູສິດສອນກ່ຽວກັບດິນ, ເມັດພືດ, ເຂົ້າຈີ່, ແລະ ໄຂ່ມຸກ
ເລື່ອງທີ່ຮຽບງ່າຍເພື່ອຊ່ວຍເຮົາໃຫ້ເຂົ້າໃຈຄວາມຈິງທາງວິນຍານ
ພຣະເຢຊູມັກເລົ່າເລື່ອງທີ່ເອີ້ນວ່າ ຄຳອຸປະມາ. ໃນຄຳອຸປະມາ, ພຣະເຢຊູປຽບທຽບສິ່ງຂອງທຳມະດາ, ທົ່ວໄປໃນຊີວິດປະຈຳວັນໃສ່ກັບຄວາມຈິງທີ່ສຳຄັນກ່ຽວກັບພຣະກິດຕິຄຸນຂອງພຣະອົງ. ເພື່ອທີ່ຈະເຂົ້າໃຈຄຳອຸປະມາ, ຜູ້ຕິດຕາມຂອງພຣະອົງໄດ້ຮັບຟັງຢ່າງລະມັດລະວັງ ແລະ ຄິດຢ່າງເລິກເຊິ່ງກ່ຽວກັບຄວາມໝາຍຂອງມັນ. ຄຳອຸປະມາໄດ້ຊ່ວຍເຂົາເຈົ້າໃຫ້ຮຽນຮູ້ກ່ຽວກັບອານາຈັກຂອງພຣະເຈົ້າ.
ມັດທາຍ 13:3, 10–15
ໃນຄຳອຸປະມາໜຶ່ງ, ຊາຍຄົນໜຶ່ງໄດ້ເຂົ້າໄປໃນທົ່ງເພື່ອປູກເມັດພືດ. ລາວໄດ້ຫວ່ານເມັດພືດຢ່າງຫລວງຫລາຍຕະຫລອດທົ່ວທົ່ງ. ເມັດພືດໄດ້ຕົກໃສ່ພື້ນດິນປະເພດທີ່ແຕກຕ່າງກັນ.
ມັດທາຍ 13:3
ບາງເມັດກໍໄດ້ຕົກໃສ່ດິນແຂງຕາມທາງ, ບ່ອນທີ່ມັນຈະບໍ່ມີວັນເກີດໄດ້. ນົກໄດ້ມາ ແລະ ສັບກິນເມັດພືດທີ່ຕົກໃສ່ທີ່ນັ້ນ.
ມັດທາຍ 13:4
ບາງເມັດກໍໄດ້ຕົກໃສ່ບ່ອນທີ່ມີຫີນຫລາຍດິນໜ້ອຍ. ເມັດເຫລົ່ານີ້ຈຶ່ງງອກຂຶ້ນໄດ້ໄວ, ແຕ່ຮາກມັນກໍໃຫຍ່ບໍ່ໄດ້ຍ້ອນຫີນ. ເມື່ອມັນຮ້ອນ, ຕົ້ນພືດນັ້ນກໍຕາຍ.
ມັດທາຍ 13:5–6
ບາງເມັດກໍໄດ້ຕົກໃສ່ກາງຟຸ່ມໜາມ. ເປັນເພາະຟຸ່ມໜາມ, ເມັດກໍໃຫຍ່ບໍ່ໄດ້.
ມັດທາຍ 13:7
ບາງເມັດກໍໄດ້ຕົກໃສ່ດິນດີ. ມັນກໍກາຍເປັນຕົ້ນໄມ້ທີ່ແຂງແກ່ນ ແລະ ສົມບູນດີ. ມັນໄດ້ເກີດໝາກຜົນຫລາຍ.
ມັດທາຍ 13:8
ເພື່ອຊ່ວຍໃຫ້ສານຸສິດຂອງພຣະອົງເຂົ້າໃຈ, ພຣະເຢຊູຈຶ່ງໄດ້ອະທິບາຍວ່າຄຳອຸປະມາຂອງພຣະອົງນັ້ນມີຄວາມໝາຍແນວໃດ. ເມັດພືດກໍປຽບເໝືອນພຣະຄຳຂອງພຣະເຈົ້າ. ດິນປະເພດຕ່າງໆນັ້ນກໍຄືກັນກັບຫົວໃຈຂອງຜູ້ຄົນ ແລະ ວິທີທີ່ແຕກຕ່າງທີ່ເຂົາເຈົ້າຕອບສະໜອງຕໍ່ການໄດ້ຍິນພຣະຄຳຂອງພຣະເຈົ້າ. ດິນດີກໍປຽບເໝືອນຜູ້ຄົນທີ່ໄດ້ຍິນພຣະຄຳຂອງພຣະເຈົ້າ, ເຂົ້າໃຈມັນ, ແລະ ເຊື່ອຟັງພຣະອົງ.
ມັດທາຍ 13:18–23
ເພື່ອສິດສອນກ່ຽວກັບວ່າ ອານາຈັກຂອງພຣະເຈົ້າຈະເຕີບໃຫຍ່ແນວໃດ, ພຣະເຢຊູໄດ້ເລົ່າກ່ຽວກັບເມັດຜັກກາດ. ມັນເປັນເມັດນ້ອຍໆ, ແຕ່ມັນເຕີບໃຫຍ່ຂຶ້ນສູງ ບ່ອນທີ່ຝູງນົກສາມາດອາໄສຢູ່ໄດ້.
ມັດທາຍ 13:31–32
ພຣະເຢຊູຍັງໄດ້ກ່າວນຳອີກວ່າ ອານາຈັກຂອງພຣະເຈົ້າກໍປຽບເໝືອນເຊື້ອແປ້ງທີ່ຍິງຜູ້ໜຶ່ງໄດ້ໃຊ້ເພື່ອເຮັດເຂົ້າຈີ່. ຕ້ອງໃຊ້ເຊື້ອແປ້ງພຽງເລັກໜ້ອຍເທົ່ານັ້ນ ເພື່ອເຮັດໃຫ້ແປ້ງເຂົ້າຈີ່ນັ້ນຟູຂຶ້ນ.
ມັດທາຍ 13:33
ພຣະເຢຊູໄດ້ເລົ່າອີກເລື່ອງໜຶ່ງກ່ຽວກັບຊາຍຄົນໜຶ່ງທີ່ໄດ້ຊື້ໄຂ່ມຸກ. ລາວໄດ້ພົບເມັດໜຶ່ງທີ່ສວຍງາມ ແລະ ມີຄ່າແພງຫລາຍ. ລາວໄດ້ຂາຍທຸກສິ່ງທີ່ລາວມີເພື່ອວ່າລາວຈະຊື້ໄຂ່ມຸກເມັດນັ້ນໄດ້. ພຣະເຢຊູໄດ້ເລົ່າເລື່ອງນີ້ເພື່ອສິດສອນວ່າ ພອນຂອງພຣະກິດຕິຄຸນແມ່ນມີຄ່າແພງຫລາຍຈົນວ່າເຮົາຄວນເຮັດທຸກສິ່ງທີ່ເຮົາສາມາດເຮັດໄດ້ເພື່ອຈະໄດ້ຮັບມັນ.
ມັດທາຍ 13:45–46