ລູກາ 24:1–12, 36–49; ໂຢຮັນ 20
ພຣະອົງຊົງຟື້ນ
ເຢຊູຄຣິດໄດ້ເອົາຊະນະຄວາມຕາຍເພື່ອທຸກຄົນ
ສານຸສິດຂອງພຣະເຢຊູໄດ້ເອົາພຣະສົບຂອງພຣະອົງໄປໄວ້ໃນອຸບມຸງ. ພວກເຂົາຢາກເຮັດຫລາຍກວ່ານີ້ເພື່ອດູແລພຣະສົບຂອງພຣະອົງ, ແຕ່ມັນເກືອບຈະເປັນວັນຊະບາໂຕແລ້ວ. ພວກເຂົາໄດ້ວາງແຜນທີ່ຈະກັບມາຫລັງຈາກວັນຊະບາໂຕເພື່ອເຮັດໃຫ້ສຳເລັດ.
ລູກາ 23:52–56
ໃນຕອນເຊົ້າມືດຂອງມື້ທີສາມຫລັງຈາກການສິ້ນພຣະຊົນຂອງພຣະເຢຊູ, ນາງມາຣີໄທມັກດາລາ ແລະ ຄົນອື່ນໆໄດ້ໄປທີ່ອຸບມຸງ.
ລູກາ 24:1; ໂຢຮັນ 20:1
ເມື່ອພວກເຂົາມາຮອດ, ພວກເຂົາເຫັນວ່າກ້ອນຫີນທີ່ປົກປາກອຸບມຸງໄດ້ຖືກກິ້ງອອກໄປແລ້ວ. ພວກເຂົາໄດ້ເຂົ້າໄປໃນອຸບມຸງ, ແລະ ພຣະສົບຂອງພຣະເຢຊູບໍ່ໄດ້ຢູ່ທີ່ນັ້ນ.
ລູກາ 24:2–3; ໂຢຮັນ 20:1
ນາງມາຣີໄດ້ແລ່ນໄປບອກເປໂຕ ແລະ ໂຢຮັນວ່າມີຄົນເອົາສົບຂອງພຣະເຢຊູໄປແລ້ວ. ເປໂຕ ແລະ ໂຢຮັນໄດ້ແລ່ນໄປທີ່ອຸບມຸງ.
ໂຢຮັນ 20:2–4
ເມື່ອພວກເພິ່ນໄປຮອດອຸບມຸງ, ເປໂຕ ແລະ ໂຢຮັນໄດ້ເຂົ້າໄປຂ້າງໃນ. ພວກເພິ່ນເຫັນວ່າພຣະສົບຂອງພຣະເຢຊູຫາຍໄປແລ້ວ. ຜ້າທີ່ຫໍ່ພຣະອົງໄວ້ຍັງຢູ່ທີ່ນັ້ນ.
ໂຢຮັນ 20:5–7
ເປໂຕ ແລະ ໂຢຮັນໄດ້ກັບບ້ານ, ແຕ່ນາງມາຣີຍັງຢືນຢູ່ຂ້າງອຸບມຸງ, ຮ້ອງໄຫ້. ນາງໄດ້ຫລຽວເບິ່ງໃນອຸບມຸງ ແລະ ເຫັນທູດສະຫວັນສອງອົງ. ພວກເພິ່ນໄດ້ຖາມນາງວ່າເປັນຫຍັງນາງຈຶ່ງຮ້ອງໄຫ້. ນາງເວົ້າວ່າມີຄົນເອົາພຣະສົບຂອງພຣະເຢຊູໄປ, ແລະ ນາງບໍ່ຮູ້ວ່າມັນຢູ່ໃສ.
ໂຢຮັນ 20:11–13
ແລ້ວພຣະເຢຊູກໍມາ, ແຕ່ນາງມາຣີບໍ່ຮູ້ວ່າແມ່ນພຣະອົງ. ພຣະເຢຊູຖາມນາງວ່າ, “ນາງເອີຍ, ເປັນຫຍັງເຈົ້າຈຶ່ງຮ້ອງໄຫ້?” ນາງມາຣີຄິດວ່າພຣະອົງເປັນຄົນເຮັດສວນ. ນາງໄດ້ຖາມພຣະອົງວ່າພຣະອົງຮູ້ບໍ່ວ່າພຣະສົບຂອງພຣະເຢຊູຢູ່ໃສ.
ໂຢຮັນ 20:14–15
ພຣະເຢຊູໄດ້ກ່າວວ່າ, “ມາຣີ.” ນາງຫັນຫລັງກັບໄປ. ບັດນີ້ນາງຮູ້ແລ້ວວ່າແມ່ນພຣະເຢຊູ! ນາງໄດ້ເວົ້າກັບພຣະອົງວ່າ, “ພຣະອາຈານ.” ພຣະເຢຊູໄດ້ຂໍໃຫ້ນາງບອກສານຸສິດຄົນອື່ນໆວ່າ ພຣະອົງຕ້ອງໄປຫາພຣະບິດາເທິງສະຫວັນຂອງພຣະອົງ. ນາງມາຣີໄດ້ພົບກັບສານຸສິດຄົນອື່ນໆ ແລະ ບອກພວກເຂົາວ່ານາງໄດ້ເຫັນພຣະເຢຊູ ແລະ ພຣະອົງໄດ້ຟື້ນຄືນພຣະຊົນອີກຄັ້ງ!
ໂຢຮັນ 20:16–18
ຄ່ຳຄືນນັ້ນ, ອັກຄະສາວົກຫລາຍຄົນໄດ້ຢູ່ຮ່ວມກັນ. ພວກເພິ່ນໄດ້ປິດປະຕູ, ຢ້ານວ່າຜູ້ນຳຂອງຊາວຢິວອາດຈະພະຍາຍາມຊອກຫາພວກເພິ່ນ. ທັນໃດນັ້ນ, ພວກເພິ່ນກໍໄດ້ເຫັນພຣະເຢຊູຢືນຢູ່ທ່າມກາງພວກເພິ່ນ. ໃນຕອນທຳອິດພວກເພິ່ນກໍຢ້ານ. ພວກເພິ່ນຄິດວ່າພຣະອົງເປັນວິນຍານ. ພຣະເຢຊູໄດ້ກ່າວວ່າ, "ສັນຕິສຸກຈົ່ງມີແກ່ເຈົ້າທັງຫລາຍ."
ລູກາ 24:33–38; ໂຢຮັນ 20:19
ພຣະເຢຊູໄດ້ເຊີນອັກຄະສາວົກໃຫ້ແຕະຕ້ອງພຣະຫັດ ແລະ ພຣະບາດຂອງພຣະອົງ. ພຣະອົງຢາກໃຫ້ພວກເພິ່ນຮູ້ວ່າພຣະອົງມີຮ່າງກາຍ, ບໍ່ແມ່ນພຽງແຕ່ວິນຍານ. ພຣະອົງຍັງໄດ້ກິນປາ ແລະ ຮັງເຜິ້ງກັບພວກເພິ່ນນຳອີກ. ສານຸສິດດີໃຈຫລາຍທີ່ໄດ້ເຫັນພຣະອົງ!
ລູກາ 24:39–44; ໂຢຮັນ 20:20
ຈາກນັ້ນພຣະເຢຊູໄດ້ຊ່ວຍອັກຄະສາວົກຂອງພຣະອົງໃຫ້ເຂົ້າໃຈພຣະຄຳພີທີ່ສິດສອນກ່ຽວກັບການສິ້ນພຣະຊົນ ແລະ ການຟື້ນຄືນພຣະຊົນຂອງພຣະອົງ. ພຣະອົງຢາກໃຫ້ພວກເພິ່ນສິດສອນທຸກຄົນວ່າຍ້ອນພຣະອົງ, ພວກເຂົາຈຶ່ງສາມາດກັບໃຈ ແລະ ໄດ້ຮັບການໃຫ້ອະໄພ. ອັກຄະສາວົກຈະເປັນພະຍານຂອງພຣະອົງ.
ລູກາ 24:44–48
ອັກຄະສາວົກໂທມາບໍ່ໄດ້ຢູ່ທີ່ນັ້ນເມື່ອພຣະເຢຊູມາ. ເພິ່ນເວົ້າວ່າເພິ່ນຈະບໍ່ເຊື່ອວ່າພຣະເຢຊູຍັງຊົງພຣະຊົນຢູ່ ເວັ້ນເສຍແຕ່ວ່າເພິ່ນໄດ້ເຫັນຮອຍຕະປູຢູ່ໃນພຣະຫັດຂອງພຣະອົງ.
ໂຢຮັນ 20:24–25
ແປດມື້ຕໍ່ມາ, ສານຸສິດໄດ້ມາເຕົ້າໂຮມກັນ. ພຣະເຢຊູໄດ້ປະກົດຕົວອີກຄັ້ງ. ເທື່ອນີ້ໂທມາຢູ່ທີ່ນັ້ນ.
ໂຢຮັນ 20:26
ພຣະເຢຊູໄດ້ເຊີນໂທມາໃຫ້ແຕະບາດແຜຢູ່ພຣະຫັດ ແລະ ຂ້າງຂອງພຣະອົງ. ພຣະອົງໄດ້ບອກໂທມາວ່າ, “ຢ່າຂາດຄວາມເຊື່ອ, ແຕ່ຈົ່ງເຊື່ອ.” ໂທມາໄດ້ກ່າວວ່າ, “ພຣະອົງເຈົ້າຂອງຂ້ານ້ອຍ ແລະ ພຣະເຈົ້າຂອງຂ້ານ້ອຍ.” ບັດນີ້ໂທມາເຊື່ອວ່າພຣະເຢຊູໄດ້ຟື້ນຄືນພຣະຊົນແລ້ວ. ພຣະເຢຊູໄດ້ກ່າວວ່າຜູ້ຄົນຈະໄດ້ຮັບພອນເມື່ອພວກເຂົາເຊື່ອ, ເຖິງແມ່ນວ່າພວກເຂົາຈະບໍ່ເຄີຍເຫັນພຣະອົງກໍຕາມ.
ໂຢຮັນ 20:27–29