ກິດຈະການ 9:1–31
ພຣະເຢຊູປະກົດຕົວຕໍ່ໂຊໂລ
ຄຳເຊື້ອເຊີນໃຫ້ກັບໃຈ ແລະ ຕິດຕາມພຣະຜູ້ເປັນເຈົ້າ
ໂຊໂລເປັນຟາຣີຊາຍ—ຜູ້ນຳຂອງຊາວຢິວທີ່ຮູ້ພຣະຄຳພີເປັນຢ່າງດີ. ແຕ່ໂຊໂລບໍ່ໄດ້ເຊື່ອວ່າພຣະເຢຊູຄືພຣະຜູ້ຊ່ວຍໃຫ້ລອດ. ເພິ່ນມັກຈັບຜູ້ຕິດຕາມຂອງພຣະເຢຊູເຂົ້າຄຸກ. ມື້ໜຶ່ງໂຊໂລໄດ້ເດີນທາງໄປຍັງເມືອງໜຶ່ງຊື່ວ່າ ດາມັສກັດ ເພື່ອຈັບຜູ້ຕິດຕາມຂອງພຣະເຢຊູບາງຄົນ ແລະ ນຳເອົາເຂົາເຈົ້າໄປທີ່ນະຄອນເຢຣູຊາເລັມເພື່ອລົງໂທດ.
ກິດຈະການ 9:1–2; 22:4–5; 26:5
ຂະນະທີ່ໂຊໂລເດີນທາງໄປ, ໃນທັນໃດນັ້ນ ກໍມີແສງສະຫວ່າງສ່ອງແສງລົງມາໃສ່ເພິ່ນ. ມັນເຈີດຈ້າຍິ່ງກວ່າຕາເວັນ. ໂຊໂລໄດ້ລົ້ມລົງຢູ່ກັບພື້ນດິນ. ເພິ່ນໄດ້ຍິນສຽງທີ່ກ່າວວ່າ, “ໂຊໂລ, ໂຊໂລເອີຍ.” ແລ້ວສຽງນັ້ນກໍໄດ້ຖາມໂຊໂລວ່າເປັນຫຍັງເພິ່ນຈຶ່ງຕໍ່ຕ້ານພຣະເຢຊູ ແລະ ທຳຮ້າຍສານຸສິດຂອງພຣະອົງ.
ກິດຈະການ 9:3–4; 26:13–14
ໂຊໂລໄດ້ທູນຖາມວ່າແມ່ນໃຜກຳລັງກ່າວຢູ່. ສຸລະສຽງໄດ້ກ່າວວ່າ, “ເຮົານີ້ແມ່ນເຢຊູ.” ໂຊໂລກໍຢ້ານກົວ ແລະ ຕົກໃຈ. ເພິ່ນໄດ້ທູນຖາມພຣະເຢຊູວ່າເພິ່ນຄວນເຮັດຢ່າງໃດ. ພຣະເຢຊູໄດ້ບອກໂຊໂລວ່າ, “ເຈົ້າຈົ່ງລຸກຂຶ້ນ ເຂົ້າໄປໃນເມືອງ.” ຢູ່ທີ່ນັ້ນເພິ່ນຈະໄດ້ຮຽນຮູ້ວ່າເພິ່ນຄວນເຮັດຢ່າງໃດຕໍ່ໄປ.
ກິດຈະການ 9:5–6
ໂຊໂລໄດ້ເຊື່ອຟັງ ແລະ ໄດ້ລຸກຂຶ້ນ. ແຕ່ເພິ່ນຕາບອດແລ້ວບັດນີ້. ເພິ່ນເບິ່ງບໍ່ເຫັນຫຍັງເລີຍ. ຜູ້ຄົນທີ່ໄດ້ເດີນທາງໄປກັບເພິ່ນກໍໄດ້ຈູງເພິ່ນເຂົ້າໄປຍັງເມືອງດາມັສກັດ. ເປັນເວລາສາມວັນ, ໂຊໂລບໍ່ໄດ້ກິນ ຫລື ດື່ມຫຍັງເລີຍ.
ກິດຈະການ 9:8–9
ສານຸສິດຄົນໜຶ່ງຂອງພຣະເຢຊູທີ່ໄດ້ອາໄສຢູ່ທີ່ເມືອງດາມັສກັດແມ່ນອານາເນຍ. ພຣະເຢຊູໄດ້ຢ້ຽມຢາມອານາເນຍໃນພາບນິມິດ ແລະ ໄດ້ບອກລາວວ່າໃຫ້ອອກໄປ ແລະ ຊ່ວຍໂຊໂລ.
ກິດຈະການ 9:10–12
ແຕ່ອານາເນຍກໍສັບສົນ. ລາວໄດ້ຍິນເລື່ອງລາວຂອງໂຊໂລແລ້ວ. ລາວຮູ້ວ່າໂຊໂລໄດ້ຕໍ່ຕ້ານສານຸສິດຂອງພຣະເຢຊູໜັກຂະໜາດໃດ.
ກິດຈະການ 9:13–14
ຈັ່ງໃດພຣະເຢຊູກໍໄດ້ຂໍໃຫ້ອານາເນຍຊ່ວຍໂຊໂລ. ພຣະເຢຊູໄດ້ກ່າວວ່າພຣະອົງໄດ້ເລືອກເອົາໂຊໂລໃຫ້ນຳພຣະກິດຕິຄຸນຂອງພຣະອົງໄປສູ່ຜູ້ຄົນທັງຫລາຍ ຜູ້ທີ່ບໍ່ໄດ້ເປັນຊາວຢິວ ແລະ ບໍ່ຮູ້ຫຍັງກ່ຽວກັບພຣະອົງ.
ກິດຈະການ 9:15–16
ອານາເນຍໄດ້ເຊື່ອຟັງພຣະເຢຊູ. ລາວໄດ້ພົບເຫັນໂຊໂລ ແລະ ໄດ້ໃຫ້ພອນແກ່ເພິ່ນ. ອານາເນຍໄດ້ເອີ້ນເພິ່ນວ່າ “ອ້າຍໂຊໂລ.”
ກິດຈະການ 9:17
ອານາເນຍໄດ້ກ່າວວ່າພຣະເຢຊູໄດ້ສົ່ງລາວມາ ເພື່ອວ່າໂຊໂລຈະໄດ້ຮັບການປິ່ນປົວ ແລະ ເຕັມໄປດ້ວຍພຣະວິນຍານບໍລິສຸດ. ໃນທັນໃດນັ້ນ, ໂຊໂລກໍເຫັນຮຸ່ງໄດ້ອີກຄັ້ງ.
ກິດຈະການ 9:17–18
ໂຊໂລໄດ້ຮັບບັບຕິສະມາ. ແລ້ວເພິ່ນໄດ້ສິດສອນທຸກຄົນຢູ່ໃນເມືອງນັ້ນກ່ຽວກັບພຣະເຢຊູຄຣິດ. ຜູ້ຄົນກໍປະຫລາດໃຈທີ່ໂຊໂລໄດ້ປ່ຽນໄປຫລາຍ. ຕະຫລອດຊີວິດຂອງເພິ່ນ, ໂຊໂລຖືກເອີ້ນວ່າ ໂປໂລ. ເພິ່ນໄດ້ສິດສອນທຸກຄົນ, ຊາວຢິວ ແລະ ຜູ້ຄົນອື່ນອີກຢ່າງຫລວງຫລາຍ, ໃຫ້ເຊື່ອໃນພຣະເຢຊູ. ໂປໂລໄດ້ກາຍມາເປັນອັກຄະສາວົກຄົນໜຶ່ງຂອງພຣະເຢຊູຄຣິດ.
ກິດຈະການ 9:18–22, 29–31; 13:9