ມັດທາຍ 16–17
ພຣະເຢຊູມອບຂໍກະແຈຂອງຖານະປະໂລຫິດໃຫ້ກັບອັກຄະສາວົກຂອງພຣະອົງ
“ເທິງດານຫີນນີ້ ເຮົາຈະສ້າງ [ສາດສະໜາຈັກ] ຂອງເຮົາຂຶ້ນ”
ມື້ໜຶ່ງ, ພຣະເຢຊູໄດ້ຖາມສານຸສິດຂອງພຣະອົງວ່າ ຜູ້ຄົນຄິດວ່າພຣະອົງແມ່ນໃຜ. ສານຸສິດຂອງພຣະອົງໄດ້ຕອບວ່າ ບາງຄົນເວົ້າວ່າ ພຣະອົງແມ່ນ ໂຢຮັນບັບຕິສະໂຕ. ຄົນອື່ນຄິດວ່າ ພຣະອົງເປັນສາດສະດາຈາກພຣະຄຳພີເດີມ ຜູ້ທີ່ໄດ້ກັບຄືນມາ.
ມັດທາຍ 16:13–14
ແລ້ວພຣະເຢຊູກໍໄດ້ຖາມສານຸສິດຂອງພຣະອົງວ່າ ພວກເພິ່ນຄິດວ່າພຣະອົງແມ່ນໃຜ. ເປໂຕໄດ້ກ່າວວ່າ, “ພຣະອົງເປັນພຣະຄຣິດ ພຣະບຸດຂອງພຣະເຈົ້າອົງຊົງພຣະຊົນຢູ່.”
ມັດທາຍ 16:15–16
ພຣະເຢຊູດີໃຈທີ່ໄດ້ຍິນເປໂຕກ່າວເຊັ່ນນີ້. ພຣະອົງໄດ້ບອກເປໂຕວ່າ ເພິ່ນບໍ່ໄດ້ຮຽນຮູ້ວ່າພຣະອົງແມ່ນໃຜຈາກຄົນອື່ນ. ພຣະບິດາເທິງສະຫວັນໄດ້ເປີດເຜີຍມັນໃຫ້ກັບເພິ່ນ.
ມັດທາຍ 16:17
ພຣະເຢຊູໄດ້ບອກເປໂຕວ່າ, “ເທິງດານຫີນນີ້ ເຮົາຈະສ້າງ [ສາດສະໜາຈັກ] ຂອງເຮົາຂຶ້ນ.” ແລ້ວພຣະອົງກໍໄດ້ສັນຍາວ່າຈະມອບຂໍກະແຈຂອງຖານະປະໂຫລິດໃຫ້ກັບເປໂຕ, ຫລື ສິດອຳນາດຈາກພຣະເຈົ້າ, ເພື່ອວ່າເພິ່ນ ແລະ ເຫລົ່າອັກຄະສາວົກຄົນອື່ນໆຈະສາມາດນຳພາສາດສະໜາຈັກຂອງພຣະອົງເທິງແຜ່ນດິນໂລກ.
ມັດທາຍ 16:18–19
ສອງສາມມື້ຕໍ່ມາ, ພຣະເຢຊູໄດ້ພາເປໂຕ, ຢາໂກໂບ, ແລະ ໂຢຮັນຂຶ້ນໄປເທິງພູສູງໜ່ວຍໜຶ່ງເພື່ອອະທິຖານ.
ມັດທາຍ 17:1; ລູກາ 9:28
ຂະນະທີ່ພຣະເຢຊູອະທິຖານ, ພຣະພັກຂອງພຣະອົງກໍສ່ອງສະຫວ່າງຂຶ້ນດັ່ງດວງອາທິດ. ແມ່ນແຕ່ເຄື່ອງນຸ່ງຂອງພຣະອົງກໍເບິ່ງແຈ້ງຂຶ້ນ.
ມັດທາຍ 17:2; ລູກາ 9:29
ສາດສະດາສອງທ່ານຈາກພຣະຄຳພີເດີມ, ໂມເຊ ແລະ ເອລີຢາ, ໄດ້ມາປະກົດ. ພວກເພິ່ນໄດ້ເວົ້າກັບພຣະເຢຊູກ່ຽວກັບການສິ້ນພຣະຊົນ ແລະ ການຟື້ນຄືນພຣະຊົນຂອງພຣະອົງ, ຊຶ່ງຈະເກີດຂຶ້ນໃນໄວໆນີ້ໃນນະຄອນເຢຣູຊາເລັມ. ເປໂຕໄດ້ກ່າວກັບພຣະເຢຊູວ່າ, “ພຣະອົງເຈົ້າເອີຍ ຊ່າງເປັນການດີແທ້ໆ ທີ່ພວກຂ້ານ້ອຍຢູ່ບ່ອນນີ້.”
ມັດທາຍ 17:3–4; ລູກາ 9:30–33 (ເບິ່ງ ການແປຂອງໂຈເຊັບ ສະມິດ ໃນໝາຍເຫດຢູ່ທາງລຸ່ມໜ້າປຶ້ມ 31ກ)
ຂະນະທີ່ເປໂຕກຳລັງກ່າວຢູ່ນັ້ນ, ກ້ອນເມກອັນແຈ່ມໃສກໍໄດ້ລອຍມາອ້ອມຮອບພວກເພິ່ນໄວ້. ພວກເພິ່ນໄດ້ຍິນສຸລະສຽງຂອງພຣະເຈົ້າກຳລັງກ່າວວ່າ “ທ່ານຜູ້ນີ້ແຫລະ ເປັນບຸດທີ່ຮັກຂອງເຮົາ ຊຶ່ງເຮົາພໍໃຈຫລາຍ. ຈົ່ງຟັງເພິ່ນ.” ເປໂຕ, ຢາໂກໂບ, ແລະ ໂຢຮັນກໍຢ້ານກົວ ແລະ ໄດ້ລົ້ມລົງພື້ນ.
ມັດທາຍ 17:5–6
ພຣະເຢຊູໄດ້ຈັບອັກຄະສາວົກຂອງພຣະອົງ ແລະ ກ່າວວ່າ, “ຈົ່ງລຸກຂຶ້ນ ຢ່າສູ່ຢ້ານ.” ພວກເພິ່ນໄດ້ເງີຍໜ້າຂຶ້ນ. ໂມເຊ ແລະ ເອລີຢາໄດ້ຈາກໄປແລ້ວ. ຢູ່ເທິງພູໜ່ວຍນີ້, ເປໂຕ, ຢາໂກໂບ, ແລະ ໂຢຮັນໄດ້ຮັບຂໍກະແຈຂອງຖານະປະໂລຫິດທີ່ພຣະເຢຊູຄຣິດໄດ້ສັນຍາວ່າຈະມອບໃຫ້ກັບພວກເພິ່ນ.
ມັດທາຍ 17:7–9; ເບິ່ງ ຄຳສອນ ແລະ ພັນທະສັນຍາ 27:12–13 ນຳອີກ