ຢາໂກໂບ 1–3
ຈົດໝາຍຈາກຢາໂກໂບ
ການເຊື້ອເຊີນໃຫ້ເຊື່ອຟັງ, ບໍ່ແມ່ນພຽງແຕ່ໄດ້ຍິນ, ພຣະຄຳຂອງພຣະເຈົ້າເທົ່ານັ້ນ
ຢາໂກໂບຄືລູກຊາຍຂອງນາງມາຣີ ແລະ ເປັນໜຶ່ງໃນບັນດານ້ອງຊາຍຂອງພຣະເຢຊູຄຣິດ. ຢາໂກໂບກໍຍັງເປັນຜູ້ນຳຂອງສາດສະໜາຈັກຄົນໜຶ່ງໃນເຢຣູຊາເລັມ. ເພິ່ນໄດ້ຂຽນຈົດໝາຍຫາຜູ້ຄົນຂອງພຣະເຈົ້າໃນທົ່ວໂລກ ເພື່ອຊ່ວຍເຂົາເຈົ້າໃຫ້ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ.
ຢາໂກໂບ 1:1
ຢາໂກໂບໄດ້ຂຽນໄວ້ວ່າ, “ຖ້າຄົນໃດໃນພວກເຈົ້າຂາດສະຕິປັນຍາ, ກໍໃຫ້ຜູ້ນັ້ນທູນຂໍຈາກພຣະເຈົ້າ.” ຫລາຍປີຕໍ່ມາ, ເດັກຊາຍຄົນໜຶ່ງຊື່ໂຈເຊັບສະມິດໄດ້ອ່ານພຣະຄຳເຫລົ່ານີ້ ແລະ ໄດ້ຕັດສິນໃຈອະທິຖານກ່ຽວກັບຄຳຖາມຂອງເພິ່ນ. ຕໍ່ມາໂຈເຊັບສະມິດໄດ້ເວົ້າວ່າ, “ຂ້າພະເຈົ້າພົບເຫັນວ່າ ປະຈັກພະຍານຂອງຢາໂກໂບເປັນຄວາມຈິງ.” ພຣະເຈົ້າໄດ້ຕອບຄຳອະທິຖານຂອງໂຈເຊັບ, ແລະ ພຣະອົງຈະຕອບຄຳອະທິຖານຂອງເຮົາເຊັ່ນກັນ.
ຢາໂກໂບ 1:5; ໂຈເຊັບ ສະມິດ—ປະຫວັດ 1:11–17, 26
ຢາໂກໂບຍັງໄດ້ຂຽນໄວ້ວ່າເຮົາຄວນຟັງຢ່າງລະມັດລະວັງຕໍ່ສິ່ງທີ່ຄົນອື່ນເວົ້າ ແລະ ພະຍາຍາມຢ່າໃຈຮ້າຍໃສ່ເຂົາເຈົ້າ. ເມື່ອເຮົາໃຈຮ້າຍ, ເຮົາບໍ່ສາມາດຮັບໃຊ້ພຣະເຈົ້າ.
ຢາໂກໂບ 1:19–20
ຢາໂກໂບໄດ້ກ່າວວ່າ ມັນບໍ່ພຽງພໍທີ່ຈະໄດ້ຍິນພຣະຄຳຂອງພຣະເຈົ້າເທົ່ານັ້ນ; ເຮົາຍັງຈຳເປັນຕ້ອງດຳລົງຊີວິດຕາມພຣະຄຳນັ້ນນຳອີກ. “ຢ່າພຽງແຕ່ຟັງພຣະທຳຂອງພຣະເຈົ້າເທົ່ານັ້ນ,” ເພິ່ນໄດ້ຂຽນໄວ້, “ແຕ່ຈົ່ງປະຕິບັດຕາມພຣະທຳນັ້ນຢ່າງແທ້ຈິງ.”
ຢາໂກໂບ 1:22
ການເປັນຜູ້ຕິດຕາມພຣະເຢຊູຄຣິດ ເປັນຫລາຍກວ່າການເຊື່ອໃນພຣະເຈົ້າເທົ່ານັ້ນ, ຢາໂກໂບໄດ້ອະທິບາຍ. ແມ່ນແຕ່ມານກໍຍັງຮູ້ຈັກວ່າ ພຣະເຈົ້າມີຈິງ. ເມື່ອເຮົາເຫັນຜູ້ຄົນທີ່ໜາວສັ່ນ ຫລື ຫິວໂຫຍ, ເຮົາຄວນຈະນຳເອົາເສື້ອຜ້າ ແລະ ອາຫານມາໃຫ້ເຂົາເຈົ້າ. ເຮົາຄວນໄປຢ້ຽມຢາມແມ່ໝ້າຍ ແລະ ເດັກກຳພ້າ. “ຄວາມເຊື່ອ ທີ່ບໍ່ມີການປະຕິບັດນັ້ນກໍໄຮ້ຜົນ,” ຢາໂກໂບໄດ້ຂຽນໄວ້.
ຢາໂກໂບ 1:27; 2:14–20
ຢາໂກໂບຍັງຢາກຈະສິດສອນໃຫ້ໄພ່ພົນເວົ້າຈາດ້ວຍຄວາມອ່ອນໂຍນກັບຄົນອື່ນ. ເພິ່ນໄດ້ເວົ້າວ່າການລະມັດລະວັງກັບຄຳເວົ້າຂອງເຮົານັ້ນກໍຄືກັນກັບການຈູງມ້າ. ເຮົາສາມາດນຳພາມ້າໂຕໃຫຍ່ດ້ວຍບັງຫຽນ, ຊຶ່ງຕິດກັບເຫລັກນ້ອຍໆຢູ່ໃນປາກຂອງມ້າ. ຄຳເວົ້າຂອງເຮົາອາດຈະເບິ່ງຄືວ່າເປັນເລື່ອງເລັກນ້ອຍ, ແຕ່ມັນມີພະລັງ.
ຢາໂກໂບ 3:2–3
ຢາໂກໂບໄດ້ເວົ້າວ່າການຄວບຄຸມຄຳເວົ້າຂອງເຮົາກໍເໝືອນກັນກັບການບັງຄັບທິດທາງເຮືອ. ເຖິງແມ່ນວ່າເຮືອນັ້ນຈະໃຫຍ່ ແລະ ມີລົມພັດແຮງ, ເຮົາກໍສາມາດນຳພາເຮືອໂດຍການຄວບຄຸມຫາງເສືອ ຫລື ພວງມະໄລນ້ອຍໆນັ້ນກໍໄດ້. ຫາງເສືອກໍຄືກັນກັບຄຳເວົ້າຂອງເຮົາ. ຖ້າວ່າເຮົາສາມາດຄວບຄຸມສິ່ງທີ່ເຮົາເວົ້າອອກໄປ, ເຮົາສາມາດສ້າງຄວາມແຕກຕ່າງໄດ້ຫລາຍ!
ຢາໂກໂບ 3:4–5
ຢາໂກໂບໄດ້ອະທິບາຍວ່າ, ຄຳເວົ້າທີ່ບໍ່ດີ, ກໍເປັນຄືກັນກັບແປວໄຟນ້ອຍໆທີ່ສາມາດກໍ່ໃຫ້ເກີດເປັນໄຟໄໝ້ໃຫຍ່ໄດ້. ມັນສາມາດແຜ່ລາມໄດ້ຢ່າງໄວວາ ແລະ ກໍ່ໃຫ້ເກີດຄວາມເຈັບປວດຫລາຍ. ນີ້ແມ່ນເຫດຜົນທີ່ມັນຈຶ່ງສຳຄັນທີ່ຈະຕ້ອງລະມັດລະວັງກັບຄຳເວົ້າຂອງເຮົາ.
ຢາໂກໂບ 3:5–6
ຢາໂກໂບໄດ້ຂຽນໄວ້ວ່າເຮົາໃຊ້ປາກຂອງເຮົາເພື່ອອະທິຖານຫາພຣະບິດາເທິງສະຫວັນ. ແຕ່ບາງຄັ້ງເຮົາກໍໃຊ້ປາກຂອງເຮົາເວົ້າສິ່ງທີ່ບໍ່ດີຕໍ່ຄົນອື່ນ, ຜູ້ທີ່ເປັນລູກໆຂອງພຣະບິດາເທິງສະຫວັນເຊັ່ນກັນ. ຢາໂກໂບໄວ້ເວົ້າວ່າມັນບໍ່ຄວນທີ່ຈະເປັນເຊັ່ນນັ້ນ.
ຢາໂກໂບ 3:9–10
ເພື່ອສິດສອນໄພ່ພົນໃຫ້ເວົ້າຄຳທີ່ອ່ອນໂຍນ, ຢາໂກໂບໄດ້ສິດສອນວ່ານ້ຳພຸບໍ່ສາມາດໃຫ້ທັງນ້ຳທີ່ສົດຊື່ນ ແລະ ນ້ຳທີ່ຂົມຂື່ນໄດ້ພ້ອມກັນ. ຕົ້ນໝາກເດື່ອບໍ່ສາມາດປູກໝາກກອກເທດໄດ້, ແລະ ເຄືອອະງຸ່ນກໍ່ບໍ່ສາມາດປູກໝາກເດື່ອໄດ້. ໃນທຳນອງດຽວກັນ, ຖ້າຫາກວ່າເຮົາມີຄວາມດີ ແລະ ຄວາມຮັກໃນຫົວໃຈຂອງເຮົາ, ຄຳເວົ້າຂອງເຮົາກໍ່ຈະດີ ແລະ ເຕັມໄປດ້ວຍຄວາມຮັກເຊັ່ນກັນ!
ຢາໂກໂບ 3:11–18