پَولُس کلِیسیا کا موازنہ مسِیح کے بَدن سے کرتا ہے

کُرنتھس بُہت بڑا، مصرُوف شہر تھا۔ کلِیسیائے یِسُوع مسِیح کے بُہت سے اَرکان وہاں رہتے تھے۔ مگر وہ سب مُختلف جگہوں سے آئے تھے اور ایک دُوسرے سے بُہت الگ تھے۔ پَولُس اُن کی مدد کرنا چاہتا تھا تاکہ وہ مُتحد ہو جائیں اور ایک دُوسرے میں اچھائی دیکھیں۔ اِس لیے اُس نے اُنھیں ایک خط لکھا۔

1 کُرنتھیوں 1:‏11–13

اپنے خط میں، پَولُس نے مُقدّسِین کو بتایا کہ اُن سب کو خُدا کی طرف سے خاص نعمتیں حاصِل ہیں۔ کُچھ لوگوں کے پاس اِیمان کی نعمت تھی۔ دیگر کے پاس مُعجزات دِکھانے کی نعمت تھی۔ بعض عقل مند تھے، اور کُچھ دُوسروں کو شِفا دے سکتے تھے۔ کُچھ لوگ دُوسری زُبانیں بول سکتے تھے۔ تمام مُقدّسِین کے پاس مُختلف نعمتیں تھیں، مگر وہ سب خُدا ہی کی طرف سے تھیں۔

1 کُرنتھِیوں 12:‏3–11، 29–30

پَولُس نے سِکھایا کہ اگرچہ مُقدّسِین ایک دُوسرے سے مُختلف تھے، لیکن یِسُوع پر اُن کے اِیمان نے اُنھیں ایک کر دِیا۔ جب اُنھوں نے یِسُوع کی تعلیمات پر عمل کرنے، بپتِسما لینے، اور اُس کی کلِیسیا میں شمُولیت اِختیار کرنے کا فیصلہ کِیا، تو وہ یِسُوع مسِیح میں مُتحد ہو کر، ایک گروہ بن گئے۔

1 کُرنتھِیوں 12:‏27

پَولُس نے کہا کہ کلِیسیا ایک بَدن کی طرح ہے، جس میں سَر، بازُو، ٹانگیں، اور پاؤں ہوتے ہیں۔ بَدن کا ہر عُضو الگ الگ کام کرتا ہے۔ کان کو اِس لیے بُرا محسُوس نہیں کرنا چاہیے کہ وہ آنکھ سے مُختلف ہے۔ اور سَر پاؤں سے یہ نہیں کہہ سکتا کہ، ”مُجھے تُمھاری ضرُورت نہیں ہے۔“ ہر حِصّہ اہم ہے، اور وہ سب باہم مِل کر کام کرتے ہیں۔

1 کُرنتھِیوں 12:‏12–14

پَولُس نے کُرنتھس کے مُقدّسِین کو ”مسِیح کا بَدن“ کہا۔ وہ چاہتا تھا کہ وہ بَدن کے مُختلف اعضا کی طرح مِل کر کام کریں، اور اپنی مُختلف نعمتوں کو ایک دُوسرے کی مدد اور برکت کے لیے اِستعمال کریں۔

1 کُرنتھِیوں 12:‏15–27

ایسا کرنے کے لیے، لوگوں کو ایک خاص قِسم کی محبّت کی ضرُورت تھی، جسے مسِیح کا سچّا عِشق کہا جاتا ہے۔ یہ وہ محبّت ہے جو یِسُوع مسِیح ہر ایک سے رکھتا ہے۔ پَولُس نے کہا کہ محبّت رکھنے کا مطلب دُوسروں کے ساتھ تحمل سے پیش آنا ہے، چاہے وہ آپ کے ساتھ بُرے طریقے سے پیش آئیں۔ اِس کا مطلب ہے کہ ہم بدتمیز، خُود غرض یا حاسد نہ بنیں۔ اِس کا مطلب سچّائی سے محبّت کرنا اور اُمِّید رکھنا ہے۔

1 کُرنتھیوں 13:‏1–7؛ مرونی 7:‏47

پَولُس نے کُرنتھس کے مُقدّسِین کو بتایا کہ محبّت ہمیشہ تک قائم رہتی ہے۔ اِس سے قطعِ نظر کہ ہمارے پاس اور کون سی نعمتیں ہیں، ہم سب کو محبّت کی ضرُورت ہے۔ ہم میں سے کوئی بھی محبّت رکھ سکتا ہے اگر ہم آسمانی باپ سے اپنے سارے دِل سے مانگیں اور یِسُوع مسِیح کے سچّے پیروکار بننے کی کوشِش کریں۔

1 کُرنتھیوں 13:‏1–3، 8؛ مرونی 7:‏48