یِسُوع ہمارے واسطے اپنی جان دیتا ہے

جب پیلاطُس نے یِسُوع کو مصلُوب کرنے کا فیصلہ کِیا، تو اُس نے اپنے سپاہیوں کو حُکم دِیا کہ وہ اُسے وہاں سے لے جائیں۔ اُنھوں نے اُس پر کوڑے برسائے، اُس پر تھُوکا، اُس کے سَر پر کانٹوں کا تاج رکھا، اور اُس کا مزاق اُڑایا۔

مرقس 15:‏15–20

سپاہیوں نے یِسُوع کو لکڑی کی بھاری صلیب اُٹھانے پر مجبُور کِیا۔ وہ اُسے یرُوشلیم کے باہر ایک مقام پر لے گئے جسے گُلگتُا کہا جاتا ہے۔

یُوحنّا 19:‏17

سپاہیوں نے یِسُوع کے ہاتھوں اور پاؤں کو صلیب پر کِیلوں سے جَڑ دِیا۔ یِسُوع نے اپنے آسمانی باپ سے کہا کہ وہ سپاہیوں کو مُعاف فرمائے، کیوں کہ وہ نہیں جانتے تھے کہ وہ خُدا کے بیٹے کو مصلُوب کر رہے ہیں۔

لُوقا 23:‏33–34؛ مزید دیکھیں ترجمہ اَز جوزف سمِتھ کے حاشیہ 34سی میں

اُس روز دو بدکاروں کو یِسُوع کے ساتھ مصلُوب کِیا گیا تھا۔ اُن میں سے ایک نے اُس سے کہا، ”کیا تُو مسِیح نہیں، تُو اپنے آپ کو اور ہمیں بچا۔“

لُوقا 23:‏39

دُوسرے بدکار نے کہا کہ ہم تو اپنی سزا کے مُستحق تھے، لیکن یِسُوع نے کُچھ غلط نہیں کِیا تھا۔ اُس نے یِسُوع سے اِلتجا کی کہ جب وہ اپنی بادشاہی میں آئے تو اُسے یاد رکھے۔ یِسُوع نے اُسے بتایا کہ جلد ہی وہ دونوں عالمِ اَرواح میں ہوں گے۔

لُوقا 23:‏40–43

بُہت سی خواتین جو یِسُوع مسِیح کی پیروی کرتی تھیں اُس کے ساتھ ہونے کے لیے صلیب کے پاس آئی تھیں۔ اُن خواتین میں سے ایک یِسُوع کی ماں، مریم تھی۔ یِسُوع نے اُسے دیکھا اور اپنے رَسُولوں میں سے ایک، یُوحنّا کو، اُس کی دیکھ بھال کرنے کا کہا۔

یُوحنّا 19:‏25–27؛ مزید دیکھیں لُوقا 8:‏1–3؛ مرقس 15:‏40–41

تین گھنٹوں تک، پُوری زمین پر اندھیرا چھا گیا۔ یِسُوع نے شدید تنہائی محسُوس کی۔ اُس نے محسُوس کِیا جیسے اُس کے آسمانی باپ نے اُسے تنہا چھوڑ دِیا ہو۔

متّی 27:‏45–46

آخرکار، یِسُوع جانتا تھا کہ اُس نے اپنے دُکھ اُٹھا لِیے ہیں۔ اُس نے کہا، ”اَے باپ، تمام ہُوا، تیری مرضی پُوری ہُوئی ہے۔“ پھر یِسُوع نے اپنا سَر جھُکایا اور اپنی جان دے دی۔ یہ دیکھنے کے لیے کہ آیا وہ واقعی مَر چُکا ہے، ایک سپاہی نے نیزے سے اُس کی پسلی کو چھیدا۔

ترجمہ اَز جوزف سمِتھ، متّی 27:‏54، متّی 27:‏50 میں، (زیریں حاشیہ الف)؛ یُوحنّا 19:‏28–30، 34

جب یِسُوع مُوا، تو زمین لرز اُٹھی۔ چٹانیں ریزہ ریزہ ہو گئیں۔ مَقدِس کا پردہ، جو پاک ترین مقام کو ڈھانپے ہُوئے تھا، پھٹ کر دو ٹکڑے ہو گیا۔

متّی 27:‏51

سپاہی خوفزدہ ہو گئے۔ ”بیشک یہ خُدا کا بیٹا تھا،“ اُنھوں نے کہا۔

متّی 27:‏54

یِسُوع کے شاگِردوں نے اُس کی لاش کو سُوتی کپڑے میں لپیٹا اور اُس باغ میں واقع قبر میں رکھا۔ بعد میں، اُنھوں نے قبر کے دروازے کے سامنے ایک بڑا پتھر رکھ دِیا۔

متّی 27:‏57–61؛ یُوحنّا 19:‏38–41