Nagpakita si Jesus kay Saulo

Si Saulo ay isang Fariseo—isang pinuno ng mga Judio na alam na alam ang mga banal na kasulatan. Ngunit hindi naniwala si Saulo na si Jesus ang Tagapagligtas. Madalas niyang ibilanggo ang mga alagad ni Jesus. Isang araw, naglakbay si Saulo sa isang lungsod na tinatawag na Damasco upang dakpin ang ilan sa mga tagasunod ni Jesus at dalhin sila sa Jerusalem upang parusahan.

Mga Gawa 9:1–2; 22:4–5; 26:5

Habang naglalakbay si Saulo, biglang may liwanag na sumikat sa kanya. Ito ay mas maliwanag pa sa araw. Bumagsak si Saulo sa lupa. Narinig niya ang isang tinig na nagsasabing, “Saulo, Saulo.” Pagkatapos ay tinanong ng tinig si Saulo kung bakit niya kinakalaban si Jesus at sinasaktan ang Kanyang mga disipulo.

Mga Gawa 9:3–4; 26:13–14

Tinanong ni Saulo kung sino ang nagsasalita. Sinabi ng Panginoon, “Ako si Jesus.” Natakot at nagulat si Saulo. Tinanong niya si Jesus kung ano ang dapat niyang gawin. Sinabi ni Jesus kay Saulo, “Tumindig ka at pumasok sa lungsod.” Doon ay malalaman niya kung ano ang susunod niyang gagawin.

Mga Gawa 9:5–6

Sumunod si Saulo at tumayo. Ngunit bulag na siya ngayon. Wala siyang makitang anuman. Ang mga taong kasama niyang naglakbay ay nagtungo sa lungsod ng Damasco. Sa loob ng tatlong araw, hindi kumain o uminom ng anuman si Saulo.

Mga Gawa 9:8–9

Isa sa mga disipulo ni Jesus na nakatira sa Damasco si Ananias. Dinalaw ni Jesus si Ananias sa isang pangitain at sinabihan siyang humayo at tulungan si Saulo.

Mga Gawa 9:10–12

Ngunit nalito si Ananias. Narinig niya ang tungkol kay Saulo. Alam niya kung gaano katindi ang paglaban ni Saulo sa mga disipulo ni Jesus.

Mga Gawa 9:13–14

Hiniling ni Jesus kay Ananias na tulungan pa rin si Saulo. Sinabi ni Jesus na pinili Niya si Saulo na dalhin ang Kanyang ebanghelyo sa maraming taong hindi Judio at hindi alam ang tungkol sa Kanya.

Mga Gawa 9:15–16

Sinunod ni Ananias si Jesus. Natagpuan niya si Saulo at binasbasan niya siya. Tinawag siya ni Ananias na “Kapatid na Saulo”

Mga Gawa 9:17

Sinabi ni Ananias na isinugo siya ni Jesus upang mapagaling si Saulo at mapuspos siya ng Espiritu Santo. Kaagad, muling nakakita si Saulo.

Mga Gawa 9:17–18

Nabinyagan si Saulo. Pagkatapos ay tinuruan niya ang lahat ng tao sa lungsod tungkol kay Jesucristo. Namangha ang mga tao na nagbago nang husto si Saulo. Sa buong buhay niya mula noon, tinawag si Saulo na Pablo. Tinuruan niya ang lahat ng tao, mga Judio at marami pang iba, na maniwala kay Jesus. Si Pablo ay naging Apostol ni Jesucristo.

Mga Gawa 9:18–22, 29–31; 13:9