Тимотод бичсэн захидлууд

Тимот Есүс Христэд итгэдэг залуу байв. Түүний ээж Юнис, эмээ Лой нар мөн агуу итгэлтэй эмэгтэйчүүд байсан. Тэд Тимотыг бага байхад ч судруудаас зааж байв.

2 Тимот 1:5; 3:15

Тимот, Паул хоёр сайн найзууд байсан. Тэд хамтдаа ажиллаж, аялж, Их Эзэнд үйлчилж, Түүний сайн мэдээг хуваалцаж байв. Паул Тимотыг хүү шигээ хайрладаг байсан.

Филиппой 2:19–22; 1 Тимот 1:2

Паул Тимотыг Ефес хотод Сүмийг удирдахыг хүссэн. Паул өөр хот руу явах хэрэгтэй байв. Тэр эзгүй байхдаа Тимотод туслахын тулд захидал бичсэн.

1 Тимот 1:1–3

Дараа нь Паул Ромын шоронд байхдаа Тимотод дахин захидал бичсэн. Тэрээр Тимотод хүнд хэцүү цаг ирнэ гэдгийг анхааруулжээ. Зарим хүн үнэнээс холдож, дэлхийн зүйлсийг Бурханаас илүү хайрладаг байв. Тэд үнэн биш зүйлсийг заадаг байсан.

2 Тимот 3:1–7; 4:3–4

Паул Тимотод бүү ай гэлээ. “Учир нь Бурхан бидэнд айдсын бус, харин хүч, хайр ба биеэ захирахын сүнсийг өгсөн” гэж тэр хэлжээ. Паул Тимотод сурсан зүйлээ үргэлжлүүлэн хий гэж хэлсэн. Судрууд түүнийг Есүс Христэд хүргэх болно.

2 Тимот 1:7–9; 3:14–17

Паул амьдрал нь удахгүй дуусахыг мэдэж байсан. Гэхдээ тэр үхэхээс айдаггүй байв. Паул амьдралдаа олон сорилт туулсан ч итгэлээ бат бөх хадгалсан гэж Тимотод хэлсэн. Тэрээр Тэнгэрлэг Эцэг, Есүс Христ хоёрыг өөрт нь мөнх амьдрал өгнө гэдэгт итгэж байв.

2 Тимот 4:6–8