Симон ба Бурханы хүч

Самарид Симон гэдэг нэгэн хүн амьдардаг байв. Тэрээр Есүс Христийн сайн мэдээг сонсоод итгэжээ. Мөн тэр Есүсийн шавь нарын Бурханы хүчээр үйлдсэн гайхамшгуудыг гайхан биширч байв. Симон Самарийн бусад олон эрэгтэй, эмэгтэйн адилаар баптисм хүртэв.

Үйлс 8:5–13

Иерусалим дахь төлөөлөгчид Самарийн хүмүүс баптисм хүртэж байгааг сонсов. Петр, Иохан хоёр Самари руу явав. Тэд Бурханы хүч болох санваарыг ашиглан, баптисм хүртсэн хүмүүсийн толгой дээр гараа тавьж, тэдэнд Ариун Сүнсний бэлгийг өгөв.

Үйлс 8:14–17

Петр, Иохан хоёрыг ийнхүү үйлдэхийг харсан Симон тэдэнд мөнгө санал болгож, “Энэ эрх мэдлээ бас надад өгөөч” гэв. Тэрээр Ариун Сүнсний бэлгийг бас өгөхийн тулд Бурханы санваарыг худалдаж авахыг хүсжээ.

Үйлс 8:18–19

Петр Бурханы хүчийг хэн ч худалдаж авч чадахгүй гэж тайлбарлажээ. Энэ бол Бурханаас өгсөн бэлэг юм. Петр Симонд зүрх сэтгэлээ өөрчлөх хэрэгтэйг хэлэв. Тэрээр Симоныг наманчилж, Бурханаас уучлал хүсэн залбирахыг урив.

Үйлс 8:20–23

Симон гэмшжээ. Тэрээр Петрээс өөрийг нь өөрчлөхөд нь тусалж, залбирч өгөхийг гуйв.

Үйлс 8:24