Есүс төлөөлөгчдөдөө санваарын түлхүүрүүдийг өгөв

Нэгэн өдөр Есүс шавь нараасаа хүмүүс Өөрийг нь хэн гэж боддог талаар асуув. Шавь нар нь зарим хүн Түүнийг баптисч Иохан гэж ярьдаг гэж хариулав. Зарим нь Түүнийг Хуучин Гэрээний эргэн ирсэн бошиглогч гэж боддог байв.

Maтай 16:13-14

Дараа нь Есүс шавь нараасаа Өөрийг нь хэн гэж боддогийг асуув. “Та бол Христ, Амьд Бурханы Хүү” хэмээн Петр хариулав.

Матай 16:15–16

Есүс Петрийн үгийг сонсоод, баяртай байлаа. Тэрээр Петрт Өөрийг нь хэн болохыг бусад хүнээр заалгалгүй мэдэж авсан гэж хэлсэн. Тэнгэрлэг Эцэг түүнд үүнийг илчилсэн аж.

Матай 16:17

Тэрээр Петрт “Энэ хадан дээр Би чуулганаа босгоно” гэжээ. Дараа нь Петрт санваарын түлхүүрүүдийг буюу Бурханы эрх мэдлийг өгнө гэж амласан. Ингэснээр тэр болон бусад төлөөлөгч Түүний Сүмийг дэлхий дээр удирдах боломжтой болох байв.

Матай 16:18–19

Хэд хоногийн дараа Петр, Иаков, Иохан гурвыг Есүс өндөр уул өөд залбирахаар авч явав.

Матай 17:1; Лук 9:28

Есүсийг залбирах үед царай нь нар мэт гэрэлтэж байв. Хувцас нь хүртэл гэрэл мэт цагаан харагдаж байлаа.

Матай 17:2; Лук 9:29

Хуучин Гэрээний хоёр бошиглогч болох Мосе, Елиа хоёр үзэгдэв. Тэд Есүстэй Түүний үхэл, амилалтын талаар ярилцсан бөгөөд энэ нь удахгүй Иерусалимд тохиох байв. Петр Есүст хандан “Эзэн, энд байгаа маань бидэнд сайн боллоо” хэмээн хэлжээ.

Матай 17:3–4; Лук 9:30–33 (Иосеф Смитийн орчуулгыг зүүлт тайлбар 31a-г үзнэ үү)

Петрийг ярьж байх үед гэрэлт үүл тэднийг бүрхэн авав. Тэд “Энэ бол Миний хайрт Хүү, Таалал минь Түүнд оршдог. Түүнийг сонсогтун” хэмээх Бурханы дуу хоолойг сонслоо. Петр, Иаков, Иохан нар айж, газарт унав.

Maтай 17:5-6

Есүс төлөөлөгчдөдөө хүрч “Бос, бүү ай” гэж хэлэв. Тэд толгойгоо өндийлгөв. Мосе, Елиа хоёр явсан байлаа. Энэ ууланд Петр, Иаков, Иохан гурав Есүсийн тэдэнд амласан санваарын түлхүүрүүдийг хүлээн авчээ.

Сургаал ба Гэрээнүүд 17:7-9; мөн Сургаал ба Гэрээнүүд 27:12–13-ыг үзнэ үү.