Есүс Саулд үзэгдсэн нь

Саул бол фарисай хүн бөгөөд иудейчүүдийн удирдагч, судар сайн мэддэг байв. Гэвч Саул Есүсийг Аврагч гэдэгт итгэдэггүй байлаа. Тэрээр Есүсийн олон дагагчийг барьж шоронд хорьжээ. Нэгэн өдөр Саул Есүсийн зарим дагагчийг баривчилж, Иерусалим руу аваачиж шийтгэхээр Дамаск хэмээх хот руу явж байв.

Үйлс 9:1–2; 22:4–5; 26:5

Саулыг явж байтал гэнэт нэгэн гэрэл түүн дээр тусав. Энэ нь нарнаас ч илүү тод байлаа. Тэр газарт унав. Саул нэгэн дуу хоолой “Саул аа, Саул аа” гэж дуудахыг сонсжээ. Тэгээд тэр дуу хоолой Саулаас яагаад Есүсийн эсрэг тэмцэж, Түүний шавь нарыг гэмтээж байгааг нь асуув.

Үйлс 9:3–4; 26:13–14

Саул хэн ярьж байгааг асуув. Тэрхүү дуу хоолой “Би бол Есүс” гэлээ. Саул айж цочирдов. Тэр Есүсээс юу хийх ёстойгоо асуув. Есүс Саулд: “Бос, хотод оч” гэж хэллээ. Тэнд тэр цаашид юу хийх ёстойгоо мэдэж авах байлаа.

Үйлс 9:5–6

Саул босож, дуулгавартай дагав. Тэр сохорсон байлаа. Тэрээр юу ч харж чадахгүй байв. Түүнтэй хамт аялж явсан хүмүүс түүнийг хөтлөн Дамаск хот руу оров. Гурван өдрийн турш Саул юу ч идэж, уусангүй.

Үйлс 9:8–9

Ананиа бол Дамаскт амьдардаг байсан Есүсийн шавь нарын нэг байв. Есүс үзэгдлээр Ананиа дээр ирж, Саулд очиж тусал гэж хэлэв.

Үйлс 9:10–12

Гэвч Ананиа эргэлзэж байлаа. Тэр Саулын талаар сонсож байсан. Тэрээр Саул Есүсийн шавь нарын эсрэг ямар их тэмцэж байсныг мэдэж байв.

Үйлс 9:13–14

Тэгсэн ч Есүс Ананиагаас Саулд туслахыг хүсэв. Есүс Саулыг иудей бус мөн Түүний тухай мэддэггүй олон хүнд Өөрийн сайн мэдээг хүргүүлэхээр сонгосон гэдгээ хэлэв.

Үйлс 9:15–16

Ананиа Есүсийг дуулгавартай дагажээ. Тэр Саулыг олж, түүнийг адисалсан. Ананиа түүнийг “Саул дүү” гэж дуудав.

Үйлс 9:17

Ананиа Саулд өөрийг нь эдгээж, Ариун Сүнсээр дүүргүүлэхийн тулд Есүс түүнийг илгээсэн гэж хэлэв. Тэр даруй Саулын нүд хараа оров.

Үйлс 9:17–18

Саул баптисм хүртлээ. Тэгээд тэр хотын бүх хүнд Есүс Христийн тухай заав. Саул ийм их өөрчлөгдсөнд хүмүүс гайхацгааж байв. Тэрээр амьдралынхаа үлдсэн хугацаанд Паул гэж нэрлэгдэх болов. Тэрээр иудейчүүдэд болон бусад олон хүнд Есүст итгэхийг заажээ. Паул Есүс Христийн төлөөлөгч болов.

Үйлс 9:18–22, 29–31; 13:9