Darka e Fundit

Jezusi dhe Apostujt e Tij ishin në Jerusalem për të festuar Pashkën judease. Njerëzit judeas e festonin Pashkën çdo vit. Ajo i ndihmonte të kujtonin se shumë vjet më parë familjet e tyre ishin skllave në Egjipt dhe Perëndia i ndihmoi të arratiseshin.

Eksodi 12:27

Ndërkohë që ishin në Jerusalem, Jezusi dhe Apostujt e Tij bënë një festë të veçantë së bashku. Jezusi kishte kohë që mezi priste ta hante këtë vakt me ta.

Lluka 22:7–15

Pasi mbaruan së ngrëni, Jezusi mbushi një legen me ujë. Ai filloi t’u lante këmbët Apostujve të Tij.

Gjoni 13:4–5

Kur i erdhi radha Pjetrit, ai pyeti përse Jezusi po e bënte këtë gjë. Larja e këmbëve ishte diçka që zakonisht e bënin vetëm shërbëtorët.

Gjoni 13:6

Jezusi tha se Ai po ua lante këmbët që t’u jepte shembull. Ai donte që ata t’i shërbenin njëri‑tjetrit dhe ta donin njëri‑tjetrin ashtu siç i kishte dashur Ai. Po ta bënin këtë, njerëzit do ta dinin se ata ishin dishepujt e Tij.

Gjoni 13:14–16, 34–35

Jezusi u tha dishepujve të Tij se Ai shpejt do të vdiste. Pjetri tha se ishte i gatshëm të vdiste për Jezusin.

Gjoni 13:36–38

Por Jezusi e dinte se po vinin kohë të vështira. Ai i tha Pjetrit se përpara se gjeli të këndonte mëngjesin e nesërm, Pjetri do të thoshte tri herë se Ai nuk e njihte Jezusin.

Gjoni 13:38

Jezusi e dinte se Apostujt e Tij mund të ishin të shqetësuar dhe të frikësuar. Ai premtoi se Perëndia do t’u dërgonte Frymën e Shenjtë. Fryma e Shenjtë do t’i ngushëllonte, do t’u jepte mësim dhe do t’i ndihmonte të kujtonin se çfarë u kishte mësuar Jezusi. Ai u tha të mos shqetësoheshin ose të frikësoheshin. Ai tha: “Nëse më doni, zbatoni urdhërimet e mia”.

Gjoni 14:1, 15–16, 26–27

Më pas, Jezusi bëri diçka shumë të veçantë për t’i ndihmuar Apostujt e Tij që ta kujtonin gjithmonë Atë. Ai u dha atyre sakramentin. Së pari, Ai e bekoi bukën, e ndau në copa dhe ua dha Apostujve të Tij. Jezusi u tha të mendonin për trupin e Tij kur të hanin bukën. Ai u kërkoi të sillnin ndërmend se Ai do të vdiste për ta.

Mateu 26:26; Lluka 22:19

Jezusi më pas hodhi verë në një kupë. Ai e bekoi verën dhe u tha Apostujve që ta pinin. Jezusi u tha të mendonin për gjakun e Tij kur të pinin verën. Ai u kërkoi të mbanin mend se Ai do të vuante, do të gjakosej dhe do të vdiste për dhembjen dhe mëkatet e të gjithë njerëzve, me qëllim që ne të mund të pendoheshim e të merrnim falje.

Mateu 26:27–28; Lluka 22:20

Më pas, Jezusi shpjegoi se Ai është si një hardhi dhe dishepujt e Tij si shermendet. Nëse një shermend qëndron i lidhur me hardhinë, ai jep fryte. Një shermend që nuk është i lidhur me hardhinë, thahet dhe nuk mund të rritë fryte. Jezusi dëshironte që dishepujt e Tij të qëndronin gjithmonë pranë Tij duke e dashur njëri‑tjetrin dhe duke i zbatuar urdhërimet e Tij.

Gjoni 15:4–12

Pasi i dha mësim këto gjëra, Jezusi dhe Apostujt e Tij kënduan në himn. Ata ecën drejt një kopshti të quajtur Gjetseman.

Mateu 26:30