Mateu 5–7
Jezusi Jep Mësim Predikimin në Mal
Ndihmë për ne që të bëhemi më shumë si Ati ynë Qiellor
Jezusi dhe dishepujt e Tij shkuan te një mal pranë detit të Galilesë. Atje, Jezusi u dha mësim atyre se si ne mund të jemi të lumtur dhe të bëhemi më shumë si Ati ynë Qiellor.
Mateu 5:1–2
Jezusi dha mësim se njerëzit janë të bekuar dhe të lumtur kur janë të përulur, kur janë të pastër në zemër dhe kur përpiqen të bëjnë atë që është e drejtë. Njerëzit që i falin të tjerët, mund të falen. Njerëzit që bëjnë paqe, do të quhen fëmijët e Perëndisë.
Mateu 5:3–9
Jezusi tha se dishepujt e Tij janë një dritë për botën, si një qytet në majë të malit që mund ta shohë çdo njeri. Nuk duhet ta fshehim dritën tonë.
Mateu 5:14
Nëse e ndjekim Jezusin, jemi si një qiri që i jep dritë çdo njeriu në dhomë. Punët tona të mira mund t’i ndihmojnë njerëzit që të besojnë tek Ati Qiellor.
Mateu 5:15–16
Jezusi tha se ne duhet ta duam çdo njeri, madje edhe njerëzit që nuk na duan ne. Ne duhet të lutemi për ta. Jezusi dha mësim se ne duhet të përpiqemi që të jemi si Ati ynë Qiellor. Ai dha mësim se kur i ndihmojmë njerëzit, nuk kemi pse ua tregojmë të gjithëve atë që bëmë. Perëndia i sheh gjërat e mira që bëjmë dhe Ai do të na bekojë.
Mateu 5:38–48; Mateu 6:1–4
Kur lutemi, ne nuk duhet të shqetësohemi për atë që të tjerët mendojnë për ne. Nuk duhet të themi të njëjtat fjalë çdo herë, nëse nuk janë aq domethënëse për ne. Duhet të flasim nga zemra. Ati Qiellor i dëgjon lutjet tona dhe e di se çfarë na nevojitet. Edhe kur asnjë tjetër nuk mund të na dëgjojë, Ai do të na dëgjojë.
Mateu 6:5–8
Jezusi dha mësim se ne nuk duhet të mendojmë se jemi më të mirë se njerëzit e tjerë. Duhet të kujtojmë që ne të gjithë kemi sfida. Në vend që t’i gjykojmë të tjerët, duhet të mendojmë për mënyrën se si mund të bëjmë më mirë. Ne duhet t’i trajtojmë njerëzit sipas mënyrës që duam të trajtohemi.
Mateu 7:1–5, 12
Më pas, Jezusi tregoi një situatë rreth një njeriu të marrë që e ndërtoi shtëpinë e tij mbi rërë, dhe një njeriu të zgjuar që e ndërtoi shtëpinë e tij mbi shkëmb. Kur erdhi stuhia e shiut, shtëpia mbi rërë u shemb dhe shtëpia mbi shkëmb qëndroi e palëvizur. Jezusi tha se po t’i dëgjojmë mësimet e Tij dhe t’i ndjekim ato, ne jemi si njeriu i zgjuar.
Mateu 7:24–28