Yesu Anamponya Mwanamke na Kumfufua Binti wa Yairo

Mtu aliyeitwa Yairo aliishi na mke wake na binti yake katika mji karibu na Bahari ya Galilaya. Yairo alikuwa kiongozi katika sinagogi, ambapo Wayahudi walienda kumwabudu Mungu.

Marko 5:22

Binti wa Yairo, ambaye alikuwa na umri wa miaka 12 tu, aliumwa sana. Alikuwa karibu kufa. Yairo alijua alihitaji msaada. Pia alijua kwamba Yesu alikuwa katika mji wao.

Marko 5:22–23

Yairo aliondoka nyumbani kwake na kumtafuta Yesu. Alipiga magoti miguuni pa Yesu na kumwomba Yeye aje kumponya binti yake. Yairo alijua kwamba kama Yesu angembariki binti yake, angeishi. Yesu alimfuata Yairo nyumbani kwake. Umati wa watu ulimfuata Yesu.

Marko 5:23–24

Mwanamke katika mji huo pia alihitaji msaada wa Yesu. Alikuwa mgonjwa sana kwa miaka 12. Alikuwa ametumia pesa zake zote kwa madaktari, lakini hakuna ambaye angemponya—aliendelea kuwa na hali mbaya. Alijua kwamba Yesu angeweza kumponya. Lakini ni kwa jinsi gani angemfikia Yeye kupitia umati ule?

Marko 5:25–27

Mwanamke huyu aliamini kwamba kama yeye angegusa tu mavazi ya Yesu, angeweza kuponywa. Alimfikia Yesu alipokuwa akitembea. Mara tu alipogusa pindo la vazi Lake, ugonjwa wake uliponywa.

Mathayo 9:20; Marko 5:27–29; Luka 8:44

Mara moja, Yesu aliacha kutembea. Alikuwa amehisi nguvu zimemtoka. “Nani aliyenigusa?” Aliwauliza. Wanafunzi wake walikanganyikiwa. Watu wengi walikuwa wamemgusa Yeye—walikuwa wamezungukwa na watu. Yesu alitazama kote ili kuona ni nani aliyemgusa.

Marko 5:30–32; Luka 8:45

Yesu alimwona mwanamke aliyegusa mavazi Yake. Alimwambia Yesu kuhusu ugonjwa wake, na kwamba Yesu alikuwa amemponya. Yesu alimwambia afarijiwe. Aliponywa kwa sababu ya imani yake Kwake. “Nenda kwa amani,” Yeye alimwambia.

Marko 5:33–34; Luka 8:47–48

Kisha mtu akatoka katika nyumba ya Yairo. Alisema kwamba walikuwa wamechelewa sana: Binti wa Yairo alikuwa tayari amefariki. Yairo hakupaswa tena kumsumbua Yesu.

Marko 5:35.

Mara Yesu aliposikia haya, Yeye alimwambia Yairo, “Usiogope, amini tu.” Kisha wakaenda nyumbani kwa Yairo.

Marko 5:36–38

Yairo na mke wake walimwongoza Yesu hadi pale binti yao alipolala. Yesu aliushika mkono wa msichana na kumwambia, “Inuka.”

Marko 5:41

Mara moja, binti wa Yairo aliamka kutoka kitandani mwake. Hakuwa mfu tena! Yesu aliwaomba Yairo na mke wake wamletee kitu cha kula. Walishangazwa na kile Yesu alichokifanya kwa ajili ya binti yao. Yeye aliwaomba wasiwaambie watu wengine kuhusu muujiza huu.

Marko 5:42–43