វិវរណៈ
ព្រះយេស៊ូវគ្រីស្ទនឹងយាងមកម្ដងទៀត
ការនិមិត្តរបស់យ៉ូហានអំពីសេចក្តីសង្ឃឹមនៅក្នុងព្រះយេស៊ូវគ្រីស្ទ
សាវកយ៉ូហានបានមានការនិមិត្តមួយដ៏ពិសេស ។ លោកបានឃើញព្រះយេស៊ូវគ្រីស្ទ ដែលបានបង្ហាញយ៉ូហាននូវរឿងជាច្រើនអំពីអតីតកាល និងអនាគតកាល ។ ទ្រង់បានមានបន្ទូលប្រាប់យ៉ូហានឲ្យកត់ត្រាអ្វីដែលលោកបានឃើញ ។ ព្រះយេស៊ូវបានជ្រាបថា ពួកបរិសុទ្ធបានព្យាយាមអស់ពីសមត្ថភាពរបស់ពួកគេដើម្បីធ្វើតាមទ្រង់ ។ ព្រះយេស៊ូវសព្វព្រះទ័យឲ្យពួកគេមានសេចក្តីសង្ឃឹមថា ទ្រង់មានព្រះចេស្ដាខ្លាំងជាងអារក្សនៅក្នុងពិភពលោកនេះ ។
វិវរណៈ ១:១–២, ៩–១១, ១៣–១៥, ១៩; ២–៣
នៅក្នុងការនិមិត្ដរបស់លោក យ៉ូហានបានមើលឃើញក្រាំងមួយ ដែលគ្មាននរណាអាចបើកបាន ។ បន្ទាប់មក យ៉ូហានបានឃើញកូនចៀមមួយដែលតំណាងឲ្យព្រះយេស៊ូវគ្រីស្ទ ហើយទ្រង់អាចបើកក្រាំងនោះបាន ។ យ៉ូហានបានរៀនថា ពីមុនផែនដីត្រូវបានបង្កើតឡើង ព្រះវរបិតាសួគ៌បានជ្រើសរើសព្រះយេស៊ូវឲ្យធ្វើជាព្រះអង្គសង្គ្រោះរបស់យើង ។ នេះគឺជាផ្នែកដ៏សំខាន់បំផុតនៃផែនការរបស់ព្រះ ហើយមានតែព្រះយេស៊ូវប៉ុណ្ណោះដែលអាចធ្វើការណ៍នេះបាន ។
វិវរណៈ ៥
យ៉ូហានក៏បានឃើញនាគផងដែរ ដែលវាតំណាងឲ្យសាតាំង ។ សាតាំងមិនពេញចិត្តផែនការរបស់ព្រះទេ ។ វាបានចាប់ផ្ដើមសង្គ្រាមមួយនៅស្ថានសួគ៌ ។ ភាគច្រើននៃបុត្រាបុត្រីខាងវិញ្ញាណរបស់ព្រះវរបិតាសួគ៌មានសេចក្ដីជំនឿលើព្រះយេស៊ូវគ្រីស្ទ ហើយបានជ្រើសរើសធ្វើតាមទ្រង់ ។ ប៉ុន្តែពួកគេមួយចំនួនបានជ្រើសរើសធ្វើតាមសាតាំង ។ ដោយសារតែជម្រើសរបស់ពួកគេ នោះពួកគេត្រូវចាកចេញពីស្ថានសួគ៌ ។
វិវរណៈ ១២:៣–១១
យ៉ូហានបានឃើញថា សាតាំង និងអ្នកដើរតាមរបស់វាបានបន្តប្រយុទ្ធប្រឆាំងនឹងព្រះយេស៊ូវ និងអ្នកដើរតាមរបស់ទ្រង់នៅលើផែនដី ។ ពួកវាបានព្យាយាមបោកបញ្ឆោតមនុស្សកុំឲ្យជឿលើដំណឹងល្អរបស់ព្រះអង្គសង្គ្រោះ ។ មានសង្គ្រាម ការបំផ្លិចបំផ្លាញ និងជំងឺជាច្រើន ។
វិវរណៈ ៦; ៨–៩; ១២:១៧; ១៣:១១–១៨; ១៧–១៨
ប៉ុន្តែព្រះវរបិតាសួគ៌បានបញ្ជូនទេវតាពីស្ថានសួគ៌មកជាមួយដំណឹងល្អនៃព្រះយេស៊ូវគ្រីស្ទ ដើម្បីដំណឹងល្អអាចបានចែកចាយជាមួយមនុស្សគ្រប់រូបនៅលើផែនដី ។
វិវរណៈ ១៤:៦–៧
មនុស្សមួយចំនួននឹងជឿលើព្រះយេស៊ូវ ហើយកាន់តាមព្រះបញ្ញត្តិរបស់ទ្រង់ ដូចដែលពួកគេបានធ្វើនៅឯស្ថានសួគ៌ដែរ ។ ទីបន្ទាល់របស់ពួកគេអំពីព្រះយេស៊ូវនឹងជួយពួកគេឲ្យយកឈ្នះលើសង្គ្រាមប្រឆាំងនឹងសាតាំងនេះ ។
វិវរណៈ ១២:១១; ១៩:៨–១០
យ៉ូហានបានឃើញថា ព្រះយេស៊ូវគ្រីស្ទនឹងយាងមកផែនដីម្តងទៀត ។ ទ្រង់នឹងក្លាយជាស្តេចនៃពិភពលោកទាំងមូល ។ សាតាំងនឹងលែងមានអំណាចទៀតហើយ ។ ដោយសារតែព្រះយេស៊ូវ នោះនឹងមិនមានទុក្ខសោក ឬការឈឺចាប់ទៀតទេ ។ មនុស្សទាំងអស់ដែលជឿលើព្រះយេស៊ូវ ហើយរក្សាសេចក្ដីសញ្ញាជាមួយទ្រង់ នឹងរស់នៅជាមួយទ្រង់ និងព្រះវរបិតាសួគ៌ជារៀងរហូត ។
វិវរណៈ ១៩:១១–១៦; ២០:១–២; ២១:១–៧