ម៉ាថាយ ២៦ ; លូកា ២២ ; យ៉ូហាន ១៣–១៤
អាហារយប់ថ្ងៃចុងក្រោយ
ព្រះយេស៊ូវតាំងពិធីសាក្រាម៉ង់
ព្រះយេស៊ូវ និងពួកសាវករបស់ទ្រង់បាននៅក្រុងយេរូសាឡិមដើម្បីប្រារព្ធធ្វើពិធីបុណ្យរំលង ។ ប្រជាជនសាសន៍យូដាបានប្រារព្ធធ្វើពិធីបុណ្យរំលងជារៀងរាល់ឆ្នាំ ។ វាជួយពួកគេឲ្យចងចាំថា ជាច្រើនឆ្នាំកន្លងទៅ ក្រុមគ្រួសាររបស់ពួកគេធ្លាប់ជាទាសករនៅក្នុងស្រុកអេស៊ីព្ទ ហើយព្រះបានជួយពួកគេឲ្យរត់គេចខ្លួន ។
និក្ខមនំ ១២:២៧
កាលគង់នៅក្រុងយេរូសាឡិម ព្រះយេស៊ូវ និងពួកសាវករបស់ទ្រង់បានធ្វើពិធីជប់លៀងពិសេសមួយជាមួយគ្នា ។ ព្រះយេស៊ូវបានទន្ទឹងរង់ចាំដល់ពេលវេលាបរិភោគអាហារនេះជាមួយពួកគេ ។
លូកា ២២:៧–១៥
បន្ទាប់ពីទ្រង់បានបរិភោគរួចហើយ ព្រះយេស៊ូវបានចាក់ទឹកពេញចានក្លាំមួយ ។ ទ្រង់បានចាប់ផ្ដើមលាងជើងឲ្យពួកសាវករបស់ទ្រង់ ។
យ៉ូហាន ១៣:៤–៥
លុះដល់វេនពេត្រុស លោកក៏សួរថា ហេតុអ្វីបានជាព្រះយេស៊ូវធ្វើបែបនេះ ។ ការលាងជើងគឺជាអ្វីមួយ ដែលជាធម្មតាមានតែអ្នកបម្រើប៉ុណ្ណោះដែលធ្វើ ។
យ៉ូហាន ១៣:៦
ព្រះយេស៊ូវបានមានបន្ទូលថា ទ្រង់លាងជើងរបស់ពួកលោក ដើម្បីធ្វើជាគំរូដល់ពួកលោក ។ ទ្រង់ចង់ឲ្យពួកលោកបម្រើ និងស្រឡាញ់គ្នាទៅវិញទៅមក ដូចដែលទ្រង់បានស្រឡាញ់ពួកលោក ។ ប្រសិនបើពួកលោកធ្វើបែបនេះ នោះមនុស្សនឹងដឹងថា ពួកលោកគឺជាសិស្សរបស់ទ្រង់ ។
យ៉ូហាន ១៣:១៤–១៦, ៣៤–៣៥
ព្រះយេស៊ូវបានមានបន្ទូលប្រាប់ពួកសិស្សរបស់ទ្រង់ថា ទ្រង់នឹងសុគតក្នុងពេលឆាប់ៗនេះ ។ ពេត្រុសបាននិយាយថា លោកសុខចិត្តស្លាប់ជំនួសព្រះយេស៊ូវ ។
យ៉ូហាន ១៣:៣៦–៣៨
ប៉ុន្តែព្រះយេស៊ូវទ្រង់ជ្រាបថា គ្រាលំបាកនឹងមកដល់ ។ ទ្រង់បានមានបន្ទូលប្រាប់ពេត្រុសថា មុនពេលមាន់រងាវនៅព្រឹកស្អែក ពេត្រុសនឹងនិយាយបីដងថា លោកមិនស្គាល់ព្រះយេស៊ូវទេ ។
យ៉ូហាន ១៣:៣៨
ព្រះយេស៊ូវបានជ្រាបថា ពួកសាវករបស់ទ្រង់អាចនឹងមានការព្រួយបារម្ភ និងភ័យខ្លាច ។ ទ្រង់បានសន្យាថា ព្រះនឹងចាត់ព្រះវិញ្ញាណបរិសុទ្ធមកកាន់ពួកលោក ។ ព្រះវិញ្ញាណបរិសុទ្ធនឹងលួងលោមពួកលោក បង្រៀនពួកលោក ហើយជួយពួកលោកឲ្យចងចាំអ្វីដែលព្រះយេស៊ូវបានបង្រៀនពួកលោក ។ ទ្រង់បានមានបន្ទូលទៅពួកលោកថា កុំឲ្យព្រួយបារម្ភ ឬខ្លាចអី ។ ទ្រង់បានមានបន្ទូលថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តរបស់ខ្ញុំចុះ » ។
យ៉ូហាន ១៤:១, ១៥–១៦, ២៦–២៧
បន្ទាប់មក ព្រះយេស៊ូវបានធ្វើអ្វីមួយដ៏ពិសេសយ៉ាងខ្លាំង ដើម្បីជួយពួកសាវករបស់ទ្រង់ឲ្យចងចាំទ្រង់ជានិច្ច ។ ទ្រង់បានប្រទានពិធីសាក្រាម៉ង់ដល់ពួកលោក ។ ដំបូង ទ្រង់បានប្រទានពរដល់នំប៉័ង កាច់វាជាដុំៗ ហើយចែកវាដល់ពួកសាវករបស់ទ្រង់ ។ ព្រះយេស៊ូវបានមានបន្ទូលប្រាប់ពួកលោកឲ្យគិតអំពីព្រះកាយរបស់ទ្រង់ នៅពេលពួកលោកបរិភោគនំប៉័ងនោះ ។ ទ្រង់បានសុំឲ្យពួកលោកចងចាំថា ទ្រង់បានសុគតដើម្បីពួកលោក ។
ម៉ាថាយ ២៦:២៦; លូកា ២២:១៩
បន្ទាប់មក ព្រះយេស៊ូវបានចាក់ស្រាទំពាំងបាយជូរទៅក្នុងពែងមួយ ។ ទ្រង់បានប្រទានពរដល់ស្រាទំពាំងបាយជូរ ហើយមានបន្ទូលប្រាប់ពួកសាវកឲ្យផឹកវាចុះ ។ ព្រះយេស៊ូវបានមានបន្ទូលប្រាប់ពួកលោកឲ្យគិតអំពីព្រះលោហិតរបស់ទ្រង់ នៅពេលពួកលោកផឹកស្រាទំពាំងបាយជូរនោះ ។ ទ្រង់បានសុំឲ្យពួកលោកចងចាំថា ទ្រង់បានរងទុក្ខ ហូរព្រះលោហិត ហើយបានសុគតសម្រាប់ការឈឺចាប់ និងអំពើបាបរបស់មនុស្សទាំងអស់ ដើម្បីឲ្យយើងអាចប្រែចិត្ត និងទទួលបានការអភ័យទោស ។
ម៉ាថាយ ២៦:២៧–២៨ ; លូកា ២២:២០
បន្ទាប់មក ព្រះយេស៊ូវបានពន្យល់ថា ទ្រង់គឺដូចជាដើមទំពាំងបាយជូរ ហើយពួកសិស្សរបស់ទ្រង់គឺដូចជាមែកទំពាំងបាយជូរនោះ ។ ប្រសិនបើមែកនៅជាប់នឹងដើមទំពាំងបាយជូរ នោះវានឹងដុះបានផលផ្លែ ។ មែកដែលមិននៅជាប់នឹងដើមទំពាំងបាយជូរនឹងងាប់ ហើយមិនអាចបង្កើតបានផលផ្លែឡើយ ។ ព្រះយេស៊ូវចង់ឲ្យពួកសិស្សរបស់ទ្រង់នៅជិតទ្រង់ជានិច្ច ដោយការស្រឡាញ់គ្នាទៅវិញទៅមក និងកាន់តាមព្រះបញ្ញត្តិរបស់ទ្រង់ ។
យ៉ូហាន ១៥:៤–១២
បន្ទាប់ពីបានបង្រៀនរឿងទាំងនេះរួចហើយ ព្រះយេស៊ូវ និងពួកសាវករបស់ទ្រង់បានច្រៀងទំនុកតម្កើងមួយបទ ។ ពួកលោកបានដើរឆ្ពោះទៅសួនច្បារមួយដែលមានឈ្មោះថា គែតសេម៉ានី ។
ម៉ាថាយ ២៦:៣០