ម៉ាកុស ៥:២១–៤៣
ព្រះយេស៊ូវព្យាបាលស្រ្តីម្នាក់ និងប្រោសកូនស្រីរបស់យ៉ៃរ៉ុសពីស្លាប់
« កុំខ្លាចអី ឲ្យគ្រាន់តែជឿប៉ុណ្ណោះ »
បុរសម្នាក់ឈ្មោះ យ៉ៃរ៉ុស បានរស់នៅជាមួយភរិយា និងកូនស្រីរបស់គាត់នៅក្នុងទីក្រុងមួយនៅក្បែរសមុទ្រកាលីឡេ ។ យ៉ៃរ៉ុសគឺជាអ្នកដឹកនាំម្នាក់នៅសាលាប្រជុំ ជាកន្លែងដែលពួកសាសន៍យូដាបានទៅថ្វាយបង្គំព្រះ ។
ម៉ាកុស ៥:២២
កូនស្រីរបស់យ៉ៃរ៉ុស ដែលទើបតែមានអាយុ១២ឆ្នាំប៉ុណ្ណោះ បានធ្លាក់ខ្លួនឈឺធ្ងន់ធ្ងរ ។ នាងហៀបនឹងស្លាប់ ។ យ៉ៃរ៉ុសដឹងថា នាងត្រូវការជំនួយ ។ គាត់ក៏បានដឹងដែរថា ព្រះយេស៊ូវគង់នៅក្នុងទីក្រុងរបស់ពួកគេ ។
ម៉ាកុស ៥:២២–២៣
យ៉ៃរ៉ុសបានចេញពីផ្ទះរបស់គាត់ ហើយបានរកឃើញព្រះយេស៊ូវ ។ គាត់បានលុតជង្គង់នៅព្រះបាទរបស់ព្រះយេស៊ូវ ហើយបានទូលសូមឲ្យទ្រង់មកព្យាបាលកូនស្រីរបស់គាត់ ។ យ៉ៃរ៉ុសបានដឹងថា ប្រសិនបើព្រះយេស៊ូវប្រទានពរដល់កូនស្រីរបស់គាត់ នោះនាងនឹងមានជីវិត ។ ព្រះយេស៊ូវបានដើរតាមយ៉ៃរ៉ុសទៅផ្ទះរបស់គាត់ ។ ហ្វូងមនុស្សបានដើរតាមទ្រង់ ។
ម៉ាកុស ៥:២៣–២៤
ស្រ្តីម្នាក់ដែលនៅទីក្រុងដូចគ្នានោះ ក៏ត្រូវការជំនួយរបស់ព្រះយេស៊ូវដែរ ។ នាងបានឈឺធ្ងន់រយៈពេល១២ឆ្នាំហើយ ។ នាងបានចំណាយប្រាក់ទាំងអស់របស់នាងទៅលើគ្រូពេទ្យ ប៉ុន្តែគ្មាននរណាម្នាក់អាចព្យាបាលនាងជាទេ—នាងកាន់តែឈឺធ្ងន់ទៅៗ ។ នាងដឹងថា ព្រះយេស៊ូវអាចព្យាបាលនាងបាន ។ ប៉ុន្តែតើនាងនឹងទៅដល់ទ្រង់តាមរបៀបណាទៅ បើហ្វូងមនុស្សច្រើនយ៉ាងនេះ ?
ម៉ាកុស ៥:២៥–២៧
ស្ដ្រីរូបនេះបានជឿថា បើនាងគ្រាន់តែអាចពាល់ព្រះពស្តរបស់ទ្រង់ នោះនាងនឹងបានជាសះស្បើយហើយ ។ នាងបានឈោងទៅព្រះយេស៊ូវ នៅពេលទ្រង់បានយាងកាត់នោះ ។ នៅពេលនាងបានពាល់ជាយព្រះពស្ត្ររបស់ទ្រង់ភ្លាម ជំងឺរបស់នាងក៏បានជាសះស្បើយ ។
ម៉ាថាយ ៩:២០; ម៉ាកុស ៥:២៧–២៩; លូកា ៨:៤៤
ព្រះយេស៊ូវបានឈប់យាងទៅមុខភ្លាមៗ ។ ទ្រង់ជ្រាបក្នុងព្រះអង្គទ្រង់ថា មានព្រះចេស្តាចេញពីទ្រង់ ។ « អ្នកណាពាល់អាវខ្ញុំ ? » ទ្រង់បានទូលសួរ ។ ពួកសិស្សរបស់ទ្រង់រាងវង្វេងបន្ដិច ។ មនុស្សជាច្រើនបានពាល់ទ្រង់—មនុស្សជាច្រើនហ៊ុមព័ទ្ធពួកលោកជិត ។ ព្រះយេស៊ូវបានងាកទតទីជុំវិញនឹងរកអ្នកណាដែលបានពាល់ទ្រង់ ។
ម៉ាកុស ៥:៣០–៣២; លូកា ៨:៤៥
ព្រះយេស៊ូវបានទតឃើញស្ត្រីរូបនោះ ដែលបានពាល់ព្រះពស្ដរបស់ទ្រង់ ។ នាងបានទូលប្រាប់ព្រះយេស៊ូវអំពីជំងឺរបស់នាង ហើយថា ព្រះយេស៊ូវបានព្យាបាលនាងឲ្យជាសះស្បើយ ។ ព្រះយេស៊ូវបានមានបន្ទូលលួងលោមនាង ។ នាងបានជាសះស្បើយ ដោយសារតែសេចក្ដីជំនឿរបស់នាងទៅលើទ្រង់ ។ ទ្រង់បានមានបន្ទូលទៅនាងថា « ចូរទៅឲ្យបានប្រកបដោយសេចក្ដីសុខចុះ » ។
ម៉ាកុស ៥:៣៣–៣៤; លូកា ៨:៤៧–៤៨
បន្ទាប់មក មានបុរសម្នាក់មកពីផ្ទះរបស់យ៉ៃរ៉ុស ។ គាត់បាននិយាយថា វាយឺតពេលហើយ ៖ កូនស្រីរបស់យ៉ៃរ៉ុសបានស្លាប់ហើយ ។ យ៉ៃរ៉ុសមិនគួររំខានព្រះយេស៊ូវទៀតឡើយ ។
ម៉ាកុស ៥:៣៥
ភ្លាមៗដែលព្រះយេស៊ូវបានឮដំណឹងនេះ ទ្រង់បានប្រាប់យ៉ៃរ៉ុសថា « កុំខ្លាចអី ឲ្យគ្រាន់តែជឿប៉ុណ្ណោះ » ។ បន្ទាប់មក ពួកគេបានទៅផ្ទះរបស់យ៉ៃរ៉ុស ។
ម៉ាកុស ៥:៣៦–៣៨
យ៉ៃរ៉ុស និងភរិយារបស់គាត់បានយាងព្រះយេស៊ូវទៅកន្លែងដែលកូនស្រីរបស់ពួកគេដេក ។ ព្រះយេស៊ូវបានកាន់ដៃរបស់ក្មេងស្រីនោះ ហើយមានបន្ទូលទៅនាងថា « ក្រោកឡើង » ។
ម៉ាកុស ៥:៤១
ភ្លាមៗនោះ កូនស្រីរបស់យ៉ៃរ៉ុសបានក្រោកពីគ្រែរបស់នាង ។ នាងលែងស្លាប់ទៀតហើយ ! ព្រះយេស៊ូវបានឲ្យយ៉ៃរ៉ុស និងភរិយារបស់គាត់យកអាហារមកឲ្យនាងបរិភោគ ។ ពួកគេមានការអស្ចារ្យនឹងអ្វីដែលព្រះយេស៊ូវបានធ្វើសម្រាប់កូនស្រីរបស់ពួកគេ ។ ទ្រង់បានបង្គាប់ពួកគេកុំឲ្យប្រាប់មនុស្សដទៃអំពីអព្ភូតហេតុនេះឡើយ ។
ម៉ាកុស ៥:៤២–៤៣