យ៉ាកុប ១–៣
សំបុត្រមកពីយ៉ាកុប
ការអញ្ជើញឲ្យគោរពតាមព្រះបន្ទូលរបស់ព្រះ មិនមែនគ្រាន់តែស្ដាប់នោះទេ
យ៉ាកុបគឺជាកូនប្រុសរបស់ម៉ារា និងជាប្អូនប្រុសម្នាក់របស់ព្រះយេស៊ូវគ្រីស្ទ ។ យ៉ាកុបក៏ជាអ្នកដឹកនាំសាសនាចក្រម្នាក់នៅក្រុងយេរូសាឡិមផងដែរ ។ លោកបានសរសេរសំបុត្រមួយច្បាប់ទៅកាន់ប្រជាជនរបស់ព្រះនៅទូទាំងពិភពលោក ដើម្បីជួយពួកគេឲ្យរស់នៅតាមដំណឹងល្អរបស់ព្រះយេស៊ូវគ្រីស្ទ ។
យ៉ាកុប ១:១
យ៉ាកុបបានសរសេរថា « តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ » ។ ជាច្រើនឆ្នាំក្រោយមក ក្មេងប្រុសម្នាក់ឈ្មោះ យ៉ូសែប ស្ម៊ីធ បានអានពាក្យសម្ដីទាំងនេះ ហើយបានសម្រេចចិត្តអធិស្ឋានអំពីសំណួររបស់លោក ។ ក្រោយមក យ៉ូសែប ស្ម៊ីធ បាននិយាយថា « ខ្ញុំបានឃើញថា ទីបន្ទាល់របស់ខ្ញុំអំពីយ៉ាកុបនោះពិតមែន » ។ ព្រះបានឆ្លើយតបការអធិស្ឋានរបស់យ៉ូសែប ហើយទ្រង់នឹងឆ្លើយតបការអធិស្ឋានរបស់យើងផងដែរ ។
យ៉ាកុប ១:៥; យ៉ូសែប ស្ម៊ីធ—ប្រវត្តិ ១:១១–១៧, ២៦
យ៉ាកុបក៏បានសរសេរផងដែរថា យើងគួរតែស្តាប់ដោយប្រុងប្រយ័ត្ននូវអ្វីដែលមនុស្សដទៃនិយាយ ហើយព្យាយាមកុំខឹងពួកគេ ។ នៅពេលយើងខឹង នោះយើងមិនអាចបម្រើព្រះបានទេ ។
យ៉ាកុប ១:១៩–២០
យ៉ាកុបបាននិយាយថា វាមិនគ្រប់គ្រាន់ទេដែលគ្រាន់តែស្តាប់ព្រះបន្ទូលនោះ យើងក៏ត្រូវរស់នៅតាមព្រះបន្ទូលនោះផងដែរ ។ លោកបានសរសេរថា « ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ » ។
យ៉ាកុប ១:២២
យ៉ាកុបបានពន្យល់ថា ការធ្វើជាអ្នកដើរតាមរបស់ព្រះយេស៊ូវគ្រីស្ទគឺលើសពីការគ្រាន់តែជឿលើព្រះទៅទៀត ។ សូម្បីតែអារក្សក៏ដឹងថា មានព្រះពិតមែនដែរ ។ នៅពេលយើងឃើញមនុស្សដែលរងា ឬឃ្លាន នោះយើងគួរតែផ្តល់សម្លៀកបំពាក់ និងអាហារឲ្យពួកគេ ។ យើងគួរតែទៅសួរសុខទុក្ខស្ត្រីមេម៉ាយ និងកុមារកំព្រា ។ យ៉ាកុបបានសរសេរថា « សេចក្ដីជំនឿដែលឥតមានការប្រព្រឹត្តតាម នោះឈ្មោះថាស្លាប់ហើយ » ។
យ៉ាកុប ១:២៧; ២:១៤–២០
យ៉ាកុបក៏ចង់បង្រៀនពួកបរិសុទ្ធឲ្យនិយាយសម្ដីពីរោះពិសាទៅកាន់មនុស្សផងដែរ ។ លោកបាននិយាយថា ការប្រុងប្រយ័ត្នជាមួយពាក្យសម្ដីរបស់យើង គឺដូចជាការញាក់សេះដែរ ។ យើងអាចញាក់សេះដ៏ធំមួយបានដោយសារបង្ហៀរសេះមួយ ដែលភ្ជាប់ទៅនឹងដែកតូចមួយបង្ខាំចុះក្នុងមាត់សេះ ។ ពាក្យសម្ដីរបស់យើងក៏អាចមើលទៅដូចជាតូចតាចដែរ ប៉ុន្តែវាអាចមានឥទ្ធិពលខ្លាំង ។
យ៉ាកុប ៣:២–៣
យ៉ាកុបបាននិយាយថា ការគ្រប់គ្រងពាក្យសម្ដីរបស់យើង គឺដូចជាការបើកសំពៅដែរ ។ ទោះជាសំពៅមានទំហំធំក៏ដោយ ហើយមានខ្យល់គំហុកបក់ផាត់មកក្ដី ក៏យើងអាចបើកសំពៅនោះបាន ដោយសារការកាច់ចង្កូតដ៏សែនតូចមួយដែរ ។ ចង្កូតនេះគឺដូចជាពាក្យសម្ដីរបស់យើងអ៊ីចឹង ។ ប្រសិនបើយើងអាចគ្រប់គ្រងអ្វីដែលយើងនិយាយបាន នោះយើងអាចធ្វើឲ្យមានភាពខុសគ្នាដ៏ធំមួយ !
យ៉ាកុប ៣:៤–៥
យ៉ាកុបបានពន្យល់ថា ពាក្យសម្ដីមិនល្អអាចដូចជាអណ្តាតភ្លើងតូចមួយ ដែលបង្កាត់ឲ្យឆេះជាភ្លើងដ៏ធំបាន ។ វាអាចរាលដាលយ៉ាងឆាប់រហ័ស ហើយបណ្តាលឲ្យមានការឈឺចាប់ជាខ្លាំង ។ នេះជាមូលហេតុដែលវាសំខាន់ក្នុងការប្រយ័ត្នប្រយែងជាមួយពាក្យសម្ដីរបស់យើង ។
យ៉ាកុប ៣:៥–៦
យ៉ាកុបបានសរសេរថា យើងប្រើមាត់របស់យើងដើម្បីអធិស្ឋានទៅកាន់ព្រះវរបិតាសួគ៌ ។ ប៉ុន្ដែពេលខ្លះ យើងក៏ប្រើមាត់របស់យើងដើម្បីនិយាយពាក្យសម្ដីមិនល្អទៅកាន់មនុស្សដទៃ ដែលជាបុត្រាបុត្រីរបស់ព្រះវរបិតាសួគ៌ដែរ ។ យ៉ាកុបបាននិយាយថា វាមិនគួរគប្បីឲ្យមានដូច្នោះឡើយ ។
យ៉ាកុប ៣:៩–១០
ដើម្បីបង្រៀនពួកបរិសុទ្ធឲ្យនិយាយពាក្យសម្ដីពីរោះពិសា យ៉ាកុបបានបង្រៀនថា រន្ធទឹកមួយមិនអាចចេញជាទឹកសាប ហើយភ្លាវផងបានទេ ។ ដើមល្វាមិនអាចនឹងបង្កើតផ្លែជាអូលីវ ហើយដើមទំពាំងបាយជូរមិនអាចបង្កើតផ្លែជាល្វាបានទេ ។ ដូចគ្នានេះដែរ ប្រសិនបើយើងមានសេចក្ដីល្អ និងសេចក្តីស្រឡាញ់នៅក្នុងដួងចិត្តរបស់យើង នោះពាក្យសម្ដីរបស់យើងគួរតែពេញដោយសេចក្ដីល្អ និងសេចក្ដីស្រឡាញ់ផងដែរ !
យ៉ាកុប ៣:១១–១៨