ម៉ាថាយ ១៣
ព្រះយេស៊ូវបង្រៀនអំពីដី គ្រាប់ពូជ ម្សៅ និងកែវមុក្តា
ដំណើររឿងសាមញ្ញដើម្បីជួយយើងឲ្យយល់ពីសេចក្ដីពិតខាងវិញ្ញាណ
ជារឿយៗ ព្រះយេស៊ូវបានតំណាលប្រាប់ដំណើររឿងដែលគេហៅថារឿងប្រៀបប្រដូច ។ នៅក្នុងរឿងប្រៀបប្រដូច ព្រះយេស៊ូវបានប្រៀបធៀបរឿងទូទៅប្រចាំថ្ងៃ ទៅនឹងសេចក្ដីពិតដ៏សំខាន់អំពីដំណឹងល្អរបស់ទ្រង់ ។ ដើម្បីយល់ពីរឿងប្រៀបប្រដូច អ្នកដើរតាមរបស់ទ្រង់ត្រូវស្ដាប់ដោយយកចិត្តទុកដាក់ និងគិតឲ្យបានជ្រាលជ្រៅអំពីអត្ថន័យនៃដំណើររឿងទាំងនោះ ។ រឿងប្រៀបប្រដូចបានជួយពួកគេឲ្យរៀនពីនគររបស់ព្រះ ។
ម៉ាថាយ ១៣:៣, ១០–១៥
នៅក្នុងរឿងប្រៀបប្រដូចមួយ បុរសម្នាក់បានទៅស្រែដើម្បីព្រោះគ្រាប់ពូជមួយចំនួន ។ គាត់បានរាយគ្រាប់ពូជជាច្រើនពេញស្រែនោះ ។ គ្រាប់ពូជទាំងនោះបានធ្លាក់ទៅលើប្រភេទដីខុសៗគ្នា ។
ម៉ាថាយ ១៣:៣
គ្រាប់ពូជមួយចំនួនធ្លាក់ចុះតាមផ្លូវដីរឹង ដែលវាមិនអាចដុះបានឡើយ ។ សត្វស្លាបបានហើរមក ហើយក៏ចឹកស៊ីគ្រាប់ពូជដែលធ្លាក់ចុះនៅទីនោះអស់ទៅ ។
ម៉ាថាយ ១៣:៤
គ្រាប់ពូជមួយចំនួនបានធ្លាក់ទៅក្នុងកន្លែងថ្ម ។ គ្រាប់ពូជទាំងនោះដុះឡើងភ្លាម ប៉ុន្ដែមិនអាចចាក់ឫសបាន ដោយសារតែថ្ម ។ នៅពេលមេឃក្តៅ រុក្ខជាតិនោះក៏បានងាប់ទៅ ។
ម៉ាថាយ ១៣:៥–៦
គ្រាប់ពូជមួយចំនួនបានធ្លាក់ទៅដី ដែលមានសុទ្ធតែបន្លាដុះឡើងខ្ទប់ជិត ។ ដោយសារតែបន្លាដុះខ្ទប់ជិត នោះគ្រាប់ពូជមិនអាចដុះបានទេ ។
ម៉ាថាយ ១៣:៧
គ្រាប់ពូជមួយចំនួនទៀតបានធ្លាក់ទៅក្នុងដីល្អ ។ វាក្លាយជារុក្ខជាតិដ៏ល្អរឹងមាំ ។ វាបានបង្កើតផលផ្លែជាច្រើន ។
ម៉ាថាយ ១៣:៨
ដើម្បីជួយពួកសិស្សរបស់ទ្រង់ឲ្យយល់ ព្រះយេស៊ូវបានពន្យល់ពីអត្ថន័យនៃរឿងប្រៀបប្រដូចរបស់ទ្រង់ ។ គ្រាប់ពូជទាំងនេះគឺជាព្រះបន្ទូលនៃព្រះ ។ ប្រភេទដីផ្សេងៗគ្នាគឺដូចជាដួងចិត្តរបស់មនុស្ស និងរបៀបផ្សេងៗគ្នាដែលពួកគេមានប្រតិកម្មទៅនឹងការស្តាប់តាមព្រះបន្ទូលនៃព្រះ ។ ដីល្អគឺដូចជាមនុស្សដែលស្តាប់ឮព្រះបន្ទូលរបស់ព្រះ យល់ពីព្រះបន្ទូល និងគោរពប្រតិបត្តិតាមទ្រង់ ។
ម៉ាថាយ ១៣:១៨–២៣
ដើម្បីបង្រៀនអំពីរបៀបដែលនគរនៃព្រះនឹងរីកចម្រើន ព្រះយេស៊ូវមានបន្ទូលប្រាប់អំពីគ្រាប់ពូជម្យ៉ាង ។ គ្រាប់នេះតូចល្អិតណាស់ ប៉ុន្តែវាដុះឡើងទៅជាដើមឈើមួយ ដែលសត្វស្លាបអាចមកទំនៅលើមែកវាបាន ។
ម៉ាថាយ ១៣:៣១–៣២
ព្រះយេស៊ូវក៏បានមានបន្ទូលផងដែរថា នគរនៃព្រះគឺដូចជាដំបែ ដែលស្ត្រីម្នាក់បានយកមកលាយនឹងម្សៅដើម្បីធ្វើនំប៉័ង ។ វាត្រូវការដំបែតែបន្ដិចទេ ដើម្បីធ្វើឲ្យម្សៅនោះបានដោលឡើងគ្រប់ទាំងអស់ ។
ម៉ាថាយ ១៣:៣៣
ព្រះយេស៊ូវបានតំណាលប្រាប់ដំណើររឿងមួយទៀតអំពីបុរសម្នាក់ ដែលបានទិញកែវមុក្តា ។ គាត់បានរកឃើញកែវមុក្តាមួយ ដែលស្រស់ស្អាត និងមានតម្លៃយ៉ាងខ្លាំង ។ គាត់បានលក់អ្វីៗគ្រប់យ៉ាងដែលគាត់មាន ដើម្បីគាត់អាចទិញកែវមុក្តានោះបាន ។ ព្រះយេស៊ូវបានតំណាលប្រាប់ដំណើររឿងនេះ ដើម្បីបង្រៀនថា ពរជ័យនៃដំណឹងល្អមានតម្លៃខ្លាំងណាស់ ដែលយើងគួរតែធ្វើអ្វីៗគ្រប់យ៉ាងដែលយើងអាចធ្វើបាន ដើម្បីទទួលបានដំណឹងល្អនេះ ។
ម៉ាថាយ ១៣:៤៥–៤៦