យ៉ូហាន ១១:១–៤៦
ព្រះយេស៊ូវប្រោសឡាសារឲ្យមានជីវិតរស់ឡើងវិញ
« ខ្ញុំជាសេចក្ដីរស់ឡើងវិញ ហើយជាជីវិត »
ម៉ារា ម៉ាថា និងឡាសាររស់នៅក្នុងភូមិមួយ ដែលមានឈ្មោះថាភូមិបេថានី ។ ពួកគេបានជឿលើព្រះយេស៊ូវ ហើយទ្រង់ស្រឡាញ់ពួកគេ ។ ម៉ារា និងម៉ាថាគឺជាបងស្រីរបស់ឡាសារ ។
យ៉ូហាន ១១:១, ៥
ឡាសារបានធ្លាក់ខ្លួនឈឺខ្លាំង ។ ព្រះយេស៊ូវគង់នៅក្នុងក្រុងមួយផ្សេងទៀត ។ ម៉ារា និងម៉ាថាបានផ្ញើសារទៅទ្រង់ ដើម្បីជម្រាបទ្រង់ឲ្យដឹងថា មិត្តរបស់ទ្រង់ឈឺ ។
យ៉ូហាន ១១:១–៣
ព្រះយេស៊ូវរង់ចាំពីរថ្ងៃ ។ បន្ទាប់មក ទ្រង់បានមានបន្ទូលប្រាប់ពួកសិស្សរបស់ទ្រង់ថា ទ្រង់នឹងយាងទៅភូមិបេថានីជាមួយពួកលោក ។ ពួកសិស្សមានការព្រួយបារម្ភ ដោយសារមនុស្សមួយចំនួននៅក្បែរភូមិបេថានីចង់ធ្វើទុក្ខទោសព្រះយេស៊ូវ ។ ប៉ុន្តែព្រះយេស៊ូវចង់ជួយឡាសារ ។ ព្រះយេស៊ូវបានមានបន្ទូលថា ឡាសារបានស្លាប់ហើយ តែទ្រង់នឹងប្រោសគាត់ឲ្យមានជីវិតរស់ឡើងវិញ ។
យ៉ូហាន ១១:៦–១៦
ម៉ាថាបានជួបព្រះយេស៊ូវនៅខាងក្រៅក្រុង ។ នាងបាននិយាយថា ប្រសិនបើព្រះយេស៊ូវបានយាងមកមុននេះ ឡាសារនឹងមិនស្លាប់ទេ ។ ព្រះយេស៊ូវបានសន្យាថា ឡាសារនឹងរស់ម្តងទៀត ។
យ៉ូហាន ១១:១៧–២៤
ព្រះយេស៊ូវបានមានព្រះបន្ទូលថា « ខ្ញុំជាសេចក្ដីរស់ឡើងវិញ ហើយជាជីវិត » ។ ទ្រង់បានសួរម៉ាថា ថាតើនាងជឿលើទ្រង់ដែរឬទេ ។ នាងបានទូលឆ្លើយថា « ខ្ញុំម្ចាស់ជឿហើយថា ទ្រង់ជាព្រះគ្រីស្ទ គឺជាព្រះរាជបុត្រានៃព្រះ » ។
យ៉ូហាន ១១:២៥–២៧
ម៉ាថាបានត្រឡប់ទៅផ្ទះវិញ ហើយបានប្រាប់ម៉ារាថា ព្រះយេស៊ូវបានយាងមក ។ ម៉ារាបានក្រាបនៅទៀបព្រះបាទរបស់ព្រះយេស៊ូវ ហើយយំសោកដោយសារប្អូនប្រុសរបស់នាង ។ ព្រះយេស៊ូវក៏បានព្រះកន្សែងដែរ ។ ទ្រង់ស្រឡាញ់ឡាសារ ម៉ារា និងម៉ាថា ។
យ៉ូហាន ១១:២៨–៣៦
ព្រះយេស៊ូវ ម៉ាថា ម៉ារា និងអ្នកដទៃទៀតបានទៅរូងភ្នំ ដែលជាកន្លែងគេបញ្ចុះសពឡាសារ ។ ថ្មធំមួយបានបិទសន្ធប់ផ្នូរនោះ ។ ព្រះយេស៊ូវបានមានបន្ទូលឲ្យយកថ្មនោះចេញ ។
យ៉ូហាន ១១:៣៨–៣៩
ប៉ុន្តែម៉ាថាបានទូលប្រាប់ព្រះយេស៊ូវថា ឡាសារបានស្លាប់បួនថ្ងៃហើយ ។ ព្រះយេស៊ូវបានរំឭកម៉ាថាអំពីការសន្យារបស់ទ្រង់ ។ ទ្រង់បានសុំឲ្យនាងជឿ ។
យ៉ូហាន ១១:៣៩–៤០
បន្ទាប់មក ព្រះយេស៊ូវបានអធិស្ឋានទៅព្រះវរបិតារបស់ទ្រង់ ។ ទ្រង់បានអរព្រះគុណព្រះដែលតែងតែអនុញ្ញាតតាមទ្រង់ជានិច្ច ។ ព្រះយេស៊ូវចង់ឲ្យបណ្ដាមនុស្សជឿថា ព្រះបានបញ្ជូនទ្រង់ឲ្យមកធ្វើជាព្រះអង្គសង្គ្រោះ ។ បន្ទាប់មក ព្រះយេស៊ូវក៏បន្លឺវាចាថា « ឡាសារអើយ ចូរចេញមក » ។
យ៉ូហាន ១១:៤១–៤៣
ឡាសារបានដើរចេញពីរូងភ្នំ ។ គាត់នៅមានទាំងសំពត់ស្នបរុំជាប់នៅជើងដៃ ហើយមានកន្សែងគ្របមុខ ដែលគេបានបញ្ចុះគាត់នៅឡើយ ។ ព្រះយេស៊ូវមានបន្ទូលទៅបណ្ដាមនុស្សឲ្យស្រាយគាត់ចុះ ។ បណ្ដាមនុស្សជាច្រើនដែលមើលឃើញថ្ងៃនោះ ឥឡូវនេះជឿថា ព្រះយេស៊ូវគឺពិតជាព្រះអង្គសង្គ្រោះ ជាព្រះរាជបុត្រានៃព្រះមែន ។
យ៉ូហាន ១:៤៤–៤៥