លូកា ១៩:១–១០
សាខេ ជាអ្នកយកពន្ធ
ឡើងលើដើមឧទុម្ពរឲ្យបានឃើញទ្រង់
ព្រះយេស៊ូវបានយាងទៅក្រុងយេរីខូ ។ បុរសម្នាក់ឈ្មោះ សាខេ រស់នៅទីនោះ ។ សាខេគឺជាអ្នកយកពន្ធដ៏មានស្ដុកស្ដម្ភម្នាក់ ។ មនុស្សភាគច្រើនមិនចូលចិត្តអ្នកយកពន្ធទេ ។ ពួកគេគិតថា អ្នកយកពន្ធយកលុយច្រើនហួសហេតុពីប្រជាជន ។
លូកា ១៩:១–២
សាខេបានឮថា ព្រះយេស៊ូគង់នៅក្នុងទីក្រុង ។ គាត់ចង់រៀនបន្ថែមទៀត ។ គាត់ខំរកមើលព្រះយេស៊ូវ ប៉ុន្តែគាត់មិនអាចឃើញទ្រង់ទេ ព្រោះមានមនុស្សច្រើនណាស់នៅជុំវិញទ្រង់ ហើយសាខេក៏តូចទាបផង មិនអាចមើលហួសពួកគេបាន ។ តើគាត់នឹងអាចឃើញព្រះយេស៊ូវដោយរបៀបណា ?
លូកា ១៩:៣–៤
សាខេបានរត់ទៅពីខាងមុខ ហើយបានឡើងលើដើមឧទុម្ពរ ដើម្បីគាត់អាចមើលឃើញព្រះយេស៊ូវ ។ កាលព្រះយេស៊ូវបានយាងកាត់តាមនោះ ទ្រង់ងើយព្រះភ័ក្ត្រឡើង ហើយទតឃើញសាខេនៅលើដើមឧទុម្ពរនោះ ។ ព្រះយេស៊ូវបានហៅឈ្មោះគាត់ ហើយមានបន្ទូលថា « ចូរអ្នកចុះមក » ។ ព្រះយេស៊ូវមានព្រះទ័យចង់ទៅជួបគាត់នៅផ្ទះរបស់គាត់ ។ សាខេបានប្រញាប់ចុះពីដើមឧទុម្ពរ ។ គាត់មានចិត្តរីករាយណាស់ ដែលព្រះយេស៊ូវយាងមកផ្ទះរបស់គាត់ ។
លូកា ១៩:៤–៦
ប្រជាជននៅក្រុងយេរីខូឆ្ងល់ថាហេតុអ្វីបានជាព្រះយេស៊ូវយាងទៅផ្ទះរបស់សាខេ។ ពួកគេគិតថា សាខេជាមនុស្សមានបាប ព្រោះគាត់ជាអ្នកយកពន្ធ ។
លូកា ១៩:៧
សាខេបានទូលប្រាប់ព្រះយេស៊ូវថា « ទូលបង្គំចែកទ្រព្យទូលបង្គំពាក់កណ្តាលឲ្យដល់មនុស្សក្រីក្រ » ។ គាត់បាននិយាយថា ប្រសិនបើគាត់បានយកប្រាក់ច្រើនពេកពីនរណាម្នាក់ នោះគាត់នឹងសងពួកគេវិញលើសពីមុនទៀត ។ ព្រះយេស៊ូវបានមានបន្ទូលទៅសាខេថា « ថ្ងៃនេះ សេចក្ដីសង្គ្រោះបានមកដល់ផ្ទះនេះហើយ » ។ ព្រះយេស៊ូវបានមានបន្ទូលថា ទ្រង់បានមកដើម្បីនឹងរក ហើយជួយសង្គ្រោះដល់មនុស្សបាត់បង់ ។
លូកា ១៩:៦, ៨–១០