ម៉ាថាយ ១; លូកា ១
ទេវតាយាងមកជួបម៉ារា និងយ៉ូសែប
ត្រូវបានជ្រើសរើសឲ្យមើលថែព្រះរាជបុត្រានៃព្រះ
ស្ដ្រីម្នាក់ឈ្មោះ ម៉ារា បានរស់នៅក្នុងស្រុកណាសារ៉ែត ។ នាងស្រឡាញ់ព្រះ និងគោរពតាមបទបញ្ញត្តិរបស់ទ្រង់ ។ ម៉ារាហៀបនឹងរៀបការជាមួយបុរសម្នាក់ឈ្មោះ យ៉ូសែប ដែលស្រឡាញ់ព្រះដូចគ្នា ។
ម៉ាថាយ ១:១៨–១៩; លូកា ១:២៦–២៨
ថ្ងៃមួយ ទេវតាព្រះនាមថាកាព្រីយ៉ែលបានយាងមកជួបម៉ារា ។ ដំបូងឡើយ ម៉ារាបានភ័យខ្លាច ។ ប៉ុន្តែទេវតាកាព្រីយ៉ែលបានមានបន្ទូលថា ទ្រង់ត្រូវបានបញ្ជូនមកពីព្រះ ។ ម៉ារាមិនចាំបាច់ភ័យខ្លាចឡើយ ។ ទ្រង់មានបន្ទូលថា ម៉ារាគឺជាមនុស្សពិសេសខ្លាំងណាស់ចំពោះព្រះ ហើយនាងនឹងមានកូនក្នុងពេលឆាប់ៗនេះ ។ កូនរបស់ម៉ារានឹងជាព្រះរាជបុត្រារបស់ព្រះ គឺព្រះយេស៊ូវ ។
លូកា ១:២៦–៣៣
ប៉ុន្តែម៉ារាមានការភាន់ភាំង ។ នាងមិនទាន់បានរៀបការជាមួយយ៉ូសែបនៅឡើយទេ ។ តើនាងអាចមានកូនដោយរបៀបណា ? ទេវតាកាព្រីយ៉ែលបានពន្យល់ថា វានឹងកើតឡើងតាមរយៈព្រះចេស្ដារបស់ព្រះ ។ ទ្រង់មានបន្ទូលប្រាប់នាងថា « ដ្បិតការណ៍អ្វីដែលព្រះទ្រង់ធ្វើពុំបាន នោះគ្មានសោះឡើយ » ។
លូកា ១:៣៤–៣៧
ម៉ារាមានការបន្ទាបខ្លួន និងភាពស្មោះត្រង់ ។ នាងបានទូលប្រាប់ទេវតាកាព្រីយ៉ែលថា នាងជាអ្នកបម្រើរបស់ព្រះអម្ចាស់ ។ នាងស្ម័គ្រចិត្តធ្វើជាមាតារបស់ព្រះរាជបុត្រានៃព្រះ ។
លូកា ១:៣៨
នៅពេលយ៉ូសែបបានរកឃើញថា ម៉ារានឹងមានកូន គាត់អំពល់ចិត្តជាខ្លាំង ។ គាត់ងឿងឆ្ងល់ថា តើគាត់គួរតែបន្ដរៀបការជាមួយម៉ារាដែរឬអត់ ។
ម៉ាថាយ ១:១៩
ប៉ុន្តែនៅយប់មួយនៅក្នុងសុបិន ទេវតាបានយាងមកជួបយ៉ូសែប ។ ទេវតាមានបន្ទូលប្រាប់យ៉ូសែបថា កូនរបស់ម៉ារាគឺជាព្រះរាជបុត្រានៃព្រះ ហើយយ៉ូសែបគួរតែដាក់ឈ្មោះឲ្យទ្រង់ថា យេស៊ូវ ។ ព្រះយេស៊ូវនឹងជួយសង្គ្រោះមនុស្សទាំងអស់ពីអំពើបាបរបស់ពួកគេ ។ ទេវតាបានមានបន្ទូលថា យ៉ូសែបគួរតែបន្ដរៀបការជាមួយម៉ារា ។
ម៉ាថាយ ១:២០–២៣
យ៉ូសែបបានធ្វើតាមអ្វីដែលទេវតាបានមានបន្ទូល ។ ម៉ារា និងយ៉ូសែបបានរៀបការ ។
ម៉ាថាយ ១:២៤
ម៉ារាបានទៅលេងបងប្អូនជីដូនមួយរបស់នាងឈ្មោះ អេលីសាបិត ។ ទេវតាមានបន្ទូលប្រាប់ម៉ារាថា អេលីសាបិតក៏មានផ្ទៃពោះដែរ ទោះជានាងមានវ័យចំណាស់ហើយក៏ដោយ ។ នេះគឺជាអព្ភូតហេតុមួយទៀតមកពីព្រះ ។ កូនប្រុសរបស់នាងនឹងធំឡើងក្លាយជាយ៉ូហាន-បាទីស្ទ ។ នៅពេលម៉ារាបានចូលទៅក្នុងផ្ទះ នាងបានស្វាគមន៍អេលីសាបិត ។
លូកា ១:១៣–១៧, ៣៦, ៣៩–៤០
នៅពេលដែលអេលីសាបិតបានឮសំឡេងម៉ារាភ្លាម នោះទារករបស់អេលីសាបិតបានលោតដោយក្ដីសប្បាយរីករាយនៅក្នុងពោះនាង ។ អេលីសាបិតបានពោរពេញទៅដោយព្រះវិញ្ញាណបរិសុទ្ធ ។ នាងបានដឹងថា ម៉ារាកំពុងពពោះព្រះរាជបុត្រានៃព្រះ ។ ម៉ារាអររីករាយជាមួយអេលីសាបិត ។ នាងបានសរសើរព្រះចំពោះរឿងអស្ចារ្យទាំងអស់ ដែលទ្រង់បានធ្វើដើម្បីប្រទានពរដល់បុត្រាបុត្រីរបស់ទ្រង់ ។
លូកា ១:៤១–៥៥