កិច្ចការ ១៦:៩–៤០
ប៉ុល និងស៊ីឡាស
ត្រូវបានជួយសង្គ្រោះដោយអព្ភូតហេតុមកពីព្រះអម្ចាស់
ព្រះអម្ចាស់បានហៅប៉ុល និងស៊ីឡាសឲ្យផ្សព្វផ្សាយដំណឹងល្អជាមួយគ្នា ។ ពួកលោកបានធ្វើដំណើរទៅកាន់ទីក្រុងជាច្រើន ដើម្បីមើលថាតើសាសនាចក្ររីកចម្រើនដល់កម្រិតណាហើយ ។
កិច្ចការ ១៥:៤០–៤១; ១៦:៤–៨
នៅយប់មួយ នៅក្នុងការនិមិត្ត ប៉ុលបានឃើញបុរសម្នាក់មកពីស្រុកម៉ាសេដូនសុំឲ្យលោកមកទីក្រុងរបស់គាត់ ។ ប៉ុល និងស៊ីឡាសបានចេញទៅភ្លាមៗ ។ ពួកលោកដឹងថា ព្រះសព្វព្រះទ័យឲ្យពួកលោកទៅទីនោះ ។
កិច្ចការ ១៦:៩–១០
នៅពេលពួកលោកបានមកដល់ស្រុកម៉ាសេដូន មានស្ដ្រីម្នាក់ឈ្មោះ លីឌា បានស្ដាប់ពួកលោកបង្រៀន ។ ព្រះអម្ចាស់បានបើកចិត្តរបស់លីឌា ។ នាងបានជឿអ្វីដែលប៉ុលបានបង្រៀន ហើយបានទទួលបុណ្យជ្រមុជទឹក ។
កិច្ចការ ១៦:១៣–១៥
លីឌាបានប្រាប់ប៉ុល និងស៊ីឡាសថា ពួកលោកអាចស្នាក់នៅផ្ទះរបស់នាងបាន ខណៈដែលពួកលោកនៅទីនោះ ។
កិច្ចការ ១៦:១៥
ប៉ុន្តែមិនមែនមនុស្សគ្រប់គ្នាពេញចិត្តដែលប៉ុល និងស៊ីឡាសនៅទីនោះទេ ។ មនុស្សមួយចំនួនមិនចូលចិត្តអ្វីដែលពួកលោកកំពុងបង្រៀនឡើយ ។ ពួកគេបាននាំប៉ុល និងស៊ីឡាសទៅឯទីផ្សារ ហើយប្រាប់ថ្នាក់ដឹកនាំនៅទីក្រុងនោះថា ពួកលោកកំពុងបង្កបញ្ហា ។
កិច្ចការ ១៦:១៦–២១
មនុស្សបានខឹងសម្បានឹងប៉ុល និងស៊ីឡាស ។ ថ្នាក់ដឹកនាំនៅទីក្រុងនោះបានកន្ត្រាក់ហែកអាវរបស់ប៉ុល និងស៊ីឡាស ហើយបានបង្គាប់ឲ្យវាយពួកលោកនឹងរំពាត់ ។
កិច្ចការ ១៦:២២–២៣
បន្ទាប់មក ថ្នាក់ដឹកនាំនៅទីក្រុងនោះបានចាប់ប៉ុល និងស៊ីឡាសដាក់គុក ។ ពួកគេបានដាក់ខ្នោះភ្ជាប់នៅជើងរបស់ពួកលោក ហើយដាក់មេភូឃុំឲ្យយាមការពារពួកលោក ។
កិច្ចការ ១៦:២៣–២៤
នៅយប់នោះ ប៉ុល និងស៊ីឡាសបានអធិស្ឋាន និងច្រៀងទំនុកតម្កើងសរសើរដល់ព្រះ ខណៈដែលអ្នកទោសផ្សេងទៀតស្តាប់ ។ ភ្លាមៗនោះ ដីចាប់ផ្ដើមកក្រើក ។ ទ្វារគុកបានរបើកចេញ ហើយខ្នោះក៏បានរហើបចេញទាំងអស់ ។
កិច្ចការ ១៦:២៥–២៦
មេភូឃុំបានភ្ញាក់ឡើង ហើយបានឃើញទ្វារគុកបើកចំហ ។ គាត់គិតថា អ្នកទោសបានរត់គេចខ្លួនអស់ ហើយថា គាត់នឹងមានរឿងហើយដែលបណ្ដោយឲ្យពួកគេរត់គេចខ្លួនបាន ។ ប៉ុលបានប្រាប់មេភូឃុំថាកុំឲ្យបារម្ភអី ។ អ្នកទោសនៅឯណេះទាំងអស់គ្នាទេ ។
កិច្ចការ ១៦:២៧–២៨
មេភូឃុំបានភិតភ័យ ។ គាត់បានលុតជង្គង់ចុះនៅក្បែរប៉ុល និងស៊ីឡាស ហើយបាននិយាយថា « តើត្រូវឲ្យខ្ញុំធ្វើដូចម្តេចឲ្យបានសង្គ្រោះផង ? » ពួកលោកបាននិយាយថា « ចូរជឿដល់ព្រះអម្ចាស់យេស៊ូវគ្រីស្ទទៅ » ។
កិច្ចការ ១៦:២៧–៣១
ប៉ុល និងស៊ីឡាសបានបង្រៀនដំណឹងល្អដល់មេភូឃុំ និងគ្រួសាររបស់គាត់ ។ មេភូឃុំបានមើលថែរបួសឲ្យប៉ុល និងស៊ីឡាស ។ នាយប់នោះ មេភូឃុំ និងគ្រួសាររបស់គាត់បានទទួលបុណ្យជ្រមុជទឹក !
កិច្ចការ ១៦:៣២–៣៣