ម៉ាថាយ ៥–៧
ព្រះយេស៊ូវបង្រៀនទេសនកថានៅលើភ្នំ
ជួយយើងឲ្យក្លាយកាន់តែដូចជាព្រះវរបិតាសួគ៌របស់យើង
ព្រះយេស៊ូវ និងពួកសិស្សរបស់ទ្រង់បានទៅភ្នំមួយនៅជិតសមុទ្រកាលីឡេ ។ នៅទីនោះ ព្រះយេស៊ូវបានបង្រៀនពួកគេពីរបៀបដែលយើងអាចមានសុភមង្គល និងក្លាយកាន់តែដូចជាព្រះវរបិតាសួគ៌របស់យើង ។
ម៉ាថាយ ៥:១–២
ព្រះយេស៊ូវបានបង្រៀនថា មនុស្សមានពរជ័យ និងរីករាយ នៅពេលពួកគេបន្ទាបខ្លួន មានចិត្តបរិសុទ្ធ និងព្យាយាមធ្វើអ្វីដែលត្រឹមត្រូវ ។ មនុស្សដែលអត់ទោសឲ្យអ្នកដទៃ អាចទទួលបានការអភ័យទោស ។ មនុស្សដែលផ្សះផ្សាគេ នឹងត្រូវបានហៅជាកូនរបស់ព្រះ ។
ម៉ាថាយ ៥:៣–៩
ព្រះយេស៊ូវបានមានព្រះបន្ទូលថា ពួកសិស្សរបស់ទ្រង់គឺជាពន្លឺសម្រាប់ពិភពលោក—ដូចជាទីក្រុងមួយនៅលើភ្នំ ដែលមនុស្សគ្រប់គ្នាអាចមើលឃើញដែរ ។ យើងមិនគួរលាក់ពន្លឺរបស់យើងនោះទេ ។
ម៉ាថាយ ៥:១៤
នៅពេលយើងធ្វើតាមព្រះយេស៊ូវ នោះយើងគឺដូចជាចង្កៀងមួយ ដែលផ្ដល់ពន្លឺដល់មនុស្សគ្រប់គ្នានៅក្នុងបន្ទប់ដែរ ។ កិច្ចការល្អរបស់យើងអាចជួយមនុស្សឲ្យជឿលើព្រះវរបិតាសួគ៌បាន ។
ម៉ាថាយ ៥:១៥–១៦
ព្រះយេស៊ូវបានមានបន្ទូលថា យើងគួរតែស្រឡាញ់មនុស្សគ្រប់គ្នា—ទោះជាមនុស្សដែលមិនស្រឡាញ់យើងក្ដី ។ យើងគួរតែអធិស្ឋានឲ្យពួកគេ ។ ព្រះយេស៊ូវបានបង្រៀនថា យើងគួរតែព្យាយាមក្លាយដូចជាព្រះវរបិតាសួគ៌របស់យើង ។ ទ្រង់បានបង្រៀនថា នៅពេលយើងជួយមនុស្សដទៃ យើងមិនចាំបាច់ប្រាប់មនុស្សគ្រប់គ្នាពីអ្វីដែលយើងបានធ្វើនោះទេ ។ ព្រះទតឃើញកិច្ចការល្អៗដែលយើងបានធ្វើ ហើយទ្រង់នឹងប្រទានពរជ័យដល់យើង ។
ម៉ាថាយ ៥:៣៨–៤៨; ម៉ាថាយ ៦:១–៤
នៅពេលយើងអធិស្ឋាន យើងមិនគួរព្រួយបារម្ភពីអ្វីដែលមនុស្សដទៃគិតអំពីយើងនោះទេ ។ យើងមិនគួរពោលពាក្យដដែលៗរាល់ពេលនោះទេ បើយើងមិនចង់ធ្វើអ្វីដែលយើងបានពោលនោះទេនោះ ។ យើងគួរតែពោលពាក្យទាំងនោះចេញពីដួងចិត្តរបស់យើង ។ ព្រះវរបិតាសួគ៌ទ្រង់ព្រះសណ្ដាប់ឮការអធិស្ឋានរបស់យើង ហើយជ្រាបពីអ្វីដែលយើងត្រូវការ ។ សូម្បីតែពេលគ្មាននរណាម្នាក់អាចស្ដាប់ឮយើងក្ដី តែទ្រង់នឹងព្រះសណ្ដាប់ឮយើង ។
ម៉ាថាយ ៦:៥–៨
ព្រះយេស៊ូវបានបង្រៀនថា យើងមិនគួរគិតថា យើងល្អជាងមនុស្សដទៃនោះទេ ។ យើងគួរចងចាំថា យើងទាំងអស់គ្នាមានបញ្ហា ។ ជាជាងកាត់សេចក្ដីអ្នកដទៃ នោះយើងគួរតែគិតពីរបៀបដែលយើងអាចធ្វើបានប្រសើរជាងមុន ។ យើងគួរតែប្រព្រឹត្តនឹងមនុស្សដទៃ តាមរបៀបដែលយើងចង់ឲ្យគេប្រព្រឹត្តដាក់យើង ។
ម៉ាថាយ ៧:១–៥, ១២
បន្ទាប់មក ព្រះយេស៊ូវបានតំណាលប្រាប់ពីដំណើររឿងមួយ អំពីមនុស្សល្ងង់ដែលសង់ផ្ទះរបស់ខ្លួននៅលើខ្សាច់ និងមនុស្សប៉ិនប្រយ័ត្នដែលសង់ផ្ទះរបស់ខ្លួននៅលើថ្ម ។ នៅពេលភ្លៀងធ្លាក់មក ផ្ទះដែលសង់នៅលើខ្សាច់ក៏រលំទៅ ហើយផ្ទះដែលសង់នៅលើថ្មនៅឈរយ៉ាងរឹងមាំ ។ ព្រះយេស៊ូវបានមានព្រះបន្ទូលថា ប្រសិនបើយើងស្ដាប់តាមការបង្រៀនរបស់ទ្រង់ ហើយធ្វើតាមការបង្រៀនទាំងនោះ យើងគឺដូចជាមនុស្សប៉ិនប្រយ័ត្នដែរ ។
ម៉ាថាយ ៧:២៤–២៨