កិច្ចការ ៩:១–៣១
ព្រះយេស៊ូវបង្ហាញព្រះកាយដល់សុល
ការអញ្ជើញឲ្យប្រែចិត្ត និងធ្វើតាមព្រះអម្ចាស់
សុលគឺជាពួកផារិស៊ី—ជាមេដឹកនាំសាសន៍យូដា ដែលស្គាល់ព្រះគម្ពីរច្បាស់ ។ ប៉ុន្តែសុលមិនជឿថា ព្រះយេស៊ូវគឺជាព្រះអង្គសង្គ្រោះនោះទេ ។ គាត់ឧស្សាហ៍ចាប់អ្នកដើរតាមព្រះយេស៊ូវដាក់គុកណាស់ ។ ថ្ងៃមួយ សុលបានធ្វើដំណើរទៅកាន់ទីក្រុងមួយ ដែលមានឈ្មោះថា ដាម៉ាស ដើម្បីចាប់ខ្លួនអ្នកដើរតាមរបស់ព្រះយេស៊ូវមួយចំនួន ហើយនាំពួកគេទៅទីក្រុងយេរូសាឡិមដើម្បីដាក់ទោស ។
កិច្ចការ ៩:១–២; ២២:៤–៥; ២៦:៥
កាលសុលធ្វើដំណើរ ស្រាប់តែមានពន្លឺបានភ្លឺចាំងមកលើគាត់ ។ វាភ្លឺជាងពន្លឺព្រះអាទិត្យទៅទៀត ។ សុលបានដួលទៅដី ។ គាត់បានឮសំឡេងមួយនិយាយថា « សុល នែសុល » ។ បន្ទាប់មក សំឡេងនោះបានសួរសុលថា ហេតុអ្វីបានជាគាត់ប្រឆាំងទាស់នឹងព្រះយេស៊ូវ ហើយធ្វើឲ្យពួកសិស្សរបស់ទ្រង់ឈឺចាប់បែបនេះ ។
កិច្ចការ ៩:៣–៤; ២៦:១៣–១៤
សុលបានសួរថា តើអ្នកណាកំពុងនិយាយ ។ សំឡេងនោះក៏បន្លឺឡើងថា « ខ្ញុំនេះជាព្រះយេស៊ូវ » ។ សុលបានភ័យខ្លាច និងភ្ញាក់ផ្អើល ។ គាត់បានទូលសួរព្រះយេស៊ូវថា តើគាត់គួរតែធ្វើអ្វីទៅ ។ ព្រះយេស៊ូវបានមានបន្ទូលទៅសុលថា « ចូរក្រោកឡើងចូលទៅក្នុងទីក្រុងទៅ » ។ នៅទីនោះ គាត់នឹងដឹងពីអ្វីដែលគាត់គួរតែធ្វើបន្ទាប់ទៀត ។
កិច្ចការ ៩:៥–៦
សុលបានគោរពតាម ហើយបានក្រោកឡើង ។ ប៉ុន្តែ គាត់ពិការភ្នែកហើយឥឡូវនេះ ។ គាត់មិនអាចមើលអ្វីឃើញទេ ។ មនុស្សដែលធ្វើដំណើរជាមួយគាត់ បាននាំគាត់ចូលទៅក្រុងដាម៉ាស ។ អស់រយៈពេលបីថ្ងៃ សុលមិនបានបរិភោគ ឬផឹកអ្វីឡើយ ។
កិច្ចការ ៩:៨–៩
សិស្សម្នាក់ក្នុងចំណោមពួកសិស្សរបស់ព្រះយេស៊ូវ ដែលបានរស់នៅក្នុងក្រុងដាម៉ាសមានឈ្មោះថា អាន៉្នានាស ។ ព្រះយេស៊ូវបានយាងមកជួបអាន៉្នានាសនៅក្នុងការនិមិត្តមួយ ហើយមានបន្ទូលប្រាប់លោកឲ្យទៅជួយសុល ។
កិច្ចការ ៩:១០–១២
ប៉ុន្តែ អាន៉្នានាសបានភាន់ភាំង ។ លោកបានឮពីសុល ។ លោកបានដឹងថា សុលបានប្រឆាំងនឹងពួកសិស្សរបស់ព្រះយេស៊ូវយ៉ាងខ្លាំង ។
កិច្ចការ ៩:១៣–១៤
ទោះយ៉ាងណា ព្រះយេស៊ូវបានសុំឲ្យអាន៉្នានាសជួយដល់សុល ។ ព្រះយេស៊ូវបានមានបន្ទូលថា ទ្រង់បានជ្រើសរើសសុល ដើម្បីនាំយកដំណឹងល្អរបស់ទ្រង់ទៅកាន់មនុស្សជាច្រើន ដែលមិនមែនជាសាសន៍យូដា និងមិនដឹងអំពីទ្រង់ ។
កិច្ចការ ៩:១៥–១៦
អាន៉្នានាសបានគោរពប្រតិបត្តិតាមព្រះយេស៊ូវ ។ លោកបានរកឃើញសុល ហើយបានផ្តល់ពរជ័យដល់គាត់ ។ អាន៉្នានាសបានហៅគាត់ថា « អ្នកសុលអើយ » ។
កិច្ចការ ៩:១៧
អាន៉្នានាសបាននិយាយថា ព្រះយេស៊ូវបានបញ្ជូនលោកមកដល់គាត់ ដើម្បីឲ្យសុលបានជាសះស្បើយ និងបានពេញដោយព្រះវិញ្ញាណបរិសុទ្ធ ។ ភ្លាមៗនោះ សុលអាចមើលឃើញម្តងទៀត ។
កិច្ចការ ៩:១៧–១៨
សុលបានទទួលបុណ្យជ្រមុជទឹក ។ បន្ទាប់មក គាត់បានបង្រៀនមនុស្សគ្រប់គ្នានៅទីក្រុងនោះអំពីព្រះយេស៊ូវគ្រីស្ទ ។ ប្រជាជនមានការភ្ញាក់ផ្អើលដែលសុលបានផ្លាស់ប្តូរយ៉ាងខ្លាំង ។ ពេញមួយជីវិតរបស់គាត់ សុលត្រូវបានហៅថា ប៉ុល ។ លោកបានបង្រៀនមនុស្សទាំងអស់ ទាំងពួកសាសន៍យូដា និងមនុស្សដទៃទៀតជាច្រើនឲ្យជឿលើព្រះយេស៊ូវ ។ ប៉ុលបានក្លាយជាសាវកម្នាក់របស់ព្រះយេស៊ូវគ្រីស្ទ ។
កិច្ចការ ៩:១៨–២២, ២៩–៣១; ១៣:៩