កិច្ចការ ៩:៣៦–៤២
តេប៊ីថា ជាស្ដ្រីដែល « បានធ្វើគុណ »
មានជីវិតរស់ឡើងវិញដោយសារព្រះចេស្ដានៃព្រះយេស៊ូវគ្រីស្ទ
តេប៊ីថាគឺជាសិស្សដ៏ស្មោះត្រង់ម្នាក់របស់ព្រះយេស៊ូវគ្រីស្ទ ។ នាងរស់នៅក្នុងក្រុងមួយនៅក្បែរសមុទ្រ ដែលមានឈ្មោះថា យ៉ុបប៉េ ។ នាងចូលចិត្តបម្រើ និងជួយមនុស្សដែលក្រីក្រ ។
កិច្ចការ ៩:៣៦
តេប៊ីថាបានដេរសម្លៀកបំពាក់ ហើយជូនវាដល់ស្ត្រីដែលត្រូវការ ។ ពួកគេស្រឡាញ់តេប៊ីថា ។
កិច្ចការ ៩:៣៩
នៅថ្ងៃមួយ តេប៊ីថាបានធ្លាក់ខ្លួនឈឺខ្លាំង ។ នាងឈឺយ៉ាងធ្ងន់ធ្ងរ រហូតដល់នាងបានស្លាប់ ។
កិច្ចការ ៩:៣៧
សមាជិកដទៃទៀតក្នុងសាសនាចក្រនៅក្រុងយ៉ុបប៉េ មានទុក្ខក្រៀមក្រំជាខ្លាំង ។ ពួកគេដឹងថា ពេត្រុស ជាសាវកម្នាក់របស់ព្រះយេស៊ូវ ស្ថិតនៅក្នុងទីក្រុងមួយក្បែរនោះ ។ ពួកគេបានបញ្ជូនបុរសពីរនាក់ឲ្យទៅសូមពេត្រុសឲ្យប្រញាប់មករកពួកគេ ។
កិច្ចការ ៩:៣៨
ពេត្រុសបានមកដល់កន្លែង ដែលគេដាក់សាកសពរបស់តេប៊ីថា ។ ស្ត្រីមួយចំនួនដែលតេប៊ីថាបានជួយ បាននៅទីនោះ ។ ពួកគេបានបង្ហាញពេត្រុសនូវសម្លៀកបំពាក់ទាំងប៉ុន្មាន ដែលនាងបានដេរឲ្យពួកគេ ។
កិច្ចការ ៩:៣៩
ពេត្រុសបានសុំឲ្យមនុស្សទាំងអស់ចាកចេញពីបន្ទប់នោះ ។ លោកបានលុតជង្គង់ចុះ ហើយអធិស្ឋាន ។
កិច្ចការ ៩:៤០
បន្ទាប់ពីអធិស្ឋានហើយ ពេត្រុសបាននិយាយថា « តេប៊ីថាអើយ ចូរនាងក្រោកឡើង » ។ នាងបានបើកភ្នែក រួចឡើងអង្គុយ ។ ពេត្រុសបានជួយតេប៊ីថាឲ្យក្រោកឈរឡើង ។ នាងបានរស់ឡើងវិញម្តងទៀត ! ពេត្រុសបានហៅមិត្តភក្តិរបស់នាងឲ្យមកមើលនាង ។ ពួកគេបានអស្ចារ្យក្នុងចិត្ត ! ពួកគេដឹងថា នាងបានមានជីវិតរស់ឡើងវិញ ដោយសារព្រះចេស្ដានៃព្រះយេស៊ូវគ្រីស្ទ ។ មនុស្សជាច្រើនទៀតបានជឿលើទ្រង់ ។
កិច្ចការ ៩:៤០–៤២