ម៉ាថាយ ១៨:២១–៣៤
ពាក្យប្រៀបប្រដូចអំពីបាវបម្រើដែលមិនព្រមអត់ទោស
ព្រះយេស៊ូវបង្រៀនអំពីការអត់ទោស
នៅថ្ងៃមួយ ពេត្រុសបានទូលសួរព្រះយេស៊ូវនូវសំណួរដ៏សំខាន់មួយ ។ លោកចង់ដឹងថា តើលោកគួរអត់ទោសឲ្យមនុស្សប៉ុន្មានដង នៅពេលដែលពួកគេប្រព្រឹត្តអំពើបាប ។ ពេត្រុសបានសួរថា « ៧ដងឬអី ? » ព្រះយេស៊ូវបានឆ្លើយសំណួររបស់ពេត្រុស ដោយតំណាលប្រាប់លោកពីដំណើររឿងមួយ ឬពាក្យប្រៀបប្រដូចមួយ ។
ម៉ាថាយ ១៨:១៥–២១
នៅក្នុងដំណើររឿងនេះ មានស្តេចមួយអង្គ ដែលមានបាវបម្រើជាច្រើននាក់ ។ បាវបម្រើម្នាក់ក្នុងចំណោមបាវបម្រើទាំងអស់ ជំពាក់ប្រាក់ស្ដេចពីរកោដិ ។ វាជាទំហំទឹកប្រាក់ដ៏ច្រើនសន្ធឹក !
ម៉ាថាយ ១៨:២៣–២៤
បាវបម្រើនោះមិនអាចសងស្ដេចវិញបានទេ ។ ស្តេចបានមានបន្ទូលថា ទ្រង់នឹងលក់បាវបម្រើនេះ និងគ្រួសាររបស់គាត់ដើម្បីសងបំណុលនោះមកវិញ ។
ម៉ាថាយ ១៨:២៥
នៅពេលដែលបាវបម្រើនោះបានឮបែបនេះ គាត់បានលុតជង្គង់ចុះ ។ គាត់បានទូលអង្វរស្តេចឲ្យប្រទានពេលវេលាថែមទៀតឲ្យគាត់ ។ គាត់បាននិយាយថា « សូមទ្រង់មេត្តាបង្អង់ឲ្យទូលបង្គំសិន ទូលបង្គំនឹងសងថ្វាយទ្រង់គ្រប់ចំនួន » ។
ម៉ាថាយ ១៨:២៦
ស្ដេចមានព្រះទ័យក្តួលអាណិតបាវបម្រើនោះ ។ ទ្រង់បានសម្រេចព្រះទ័យថាព្រមអត់ទោសឲ្យគាត់ ។ បាវបម្រើនោះមិនចាំបាច់សងប្រាក់វិញនោះទេ ។ គាត់អាចចេញទៅបានដោយសេរី !
ម៉ាថាយ ១៨:២៧
បន្ទាប់មក បាវបម្រើនោះបានទៅ ហើយក៏ប្រទះជួបបុរសម្នាក់ដែលជំពាក់ប្រាក់គាត់ក្នុងចំនួនតិចតួចមួយ ។ គាត់ចាប់អ្នកនោះ ហើយបាននិយាយថា « ចូរសងប្រាក់ដែលជំពាក់អញនោះមក » ។
ម៉ាថាយ ១៨:២៨
បុរសនោះបានលុងជង្គង់ចុះ ។ គាត់បាននិយាយថា « សូមមេត្តាបង្អង់ឲ្យខ្ញុំសិន ខ្ញុំនឹងសងជូនអ្នក » ។ ប៉ុន្តែបាវបម្រើនោះមិនបានអត់ទោសឲ្យគាត់ឡើយ ។ គាត់បានចាប់អ្នកនោះ នាំទៅដាក់គុកវិញ ។
ម៉ាថាយ ១៨:២៩–៣០
កាលស្តេចជ្រាបពីអ្វីដែលបានកើតឡើង នោះទ្រង់ហៅបាវបម្រើនោះមកជួប ។ ស្តេចបានរំឭកបាវបម្រើរបស់ទ្រង់ថា ទ្រង់លែងទារបំណុលគាត់ក្នុងចំនួនដ៏ច្រើនសន្ធឹក ។ ទ្រង់បានមានបន្ទូលទៅបាវបម្រើរបស់គាត់ថា គាត់គួរតែអត់ទោសឲ្យបុរសដែលជំពាក់ប្រាក់គាត់នោះផងដែរ ។
ម៉ាថាយ ១៨:៣១–៣៣
យើងទាំងអស់គ្នាជំពាក់បំណុល ដែលយើងមិនអាចបង់សងវិញដោយខ្លួនឯងបានទេ ។ ព្រះយេស៊ូវបានពន្យល់ប្រាប់ពេត្រុសថា ព្រះអត់ទោសឲ្យយើង ដូច្នេះយើងគួរតែអត់ទោសឲ្យអ្នកដទៃផងដែរ ។ ហើយយើងមិនគួរបញ្ឈប់ក្រោយពីបានអត់ទោសឲ្យចំនួនប្រាំពីរដងនោះទេ ប៉ុន្តែគួរតែមានឆន្ទៈក្នុងការអត់ទោសជានិច្ច ។
ម៉ាថាយ ១៨:២២, ៣៤–៣៥; សូមមើលផងដែរ ម៉ាថាយ ៦:១៤; គោលលទ្ធិ និងសេចក្ដីសញ្ញា ៦៤:៩–១០