យ៉ូហាន ៥:១–១៧
ព្រះយេស៊ូវនៅឯស្រះបេថែសដា
ព្យាបាលបុរសម្នាក់ដែលឈឺជាយូរមកហើយ
នៅក្រុងយេរូសាឡិម មានកន្លែងមួយដែលគេហៅថា ស្រះបេថែសដា ។ មនុស្សជឿថា ស្រះនេះមានអំណាចព្យាបាល ។ មនុស្សជាច្រើនដែលឈឺ ពិការភ្នែក ឬមិនអាចដើរបាន បានមកស្រះនេះ ។
យ៉ូហាន ៥:២–៣
មនុស្សបានជឿថា នៅជួនណា មានទេវតាចុះមកកូរទឹកក្នុងស្រះនោះ ។ មនុស្សដំបូងគេដែលចុះទៅក្នុងទឹកមុនគេ បន្ទាប់ពីវាបានកូរហើយ នឹងបានជាសះស្បើយពីជំងឺនានាដែលពួកគេបានមាន ។ មនុស្សជាច្រើនបានព្យាយាមចុះទៅក្នុងស្រះនោះមុនគេ ។
យ៉ូហាន ៥:៤
មនុស្សម្នាក់នៅស្រះទឹកនោះ គឺជាបុរសម្នាក់ដែលមិនអាចដើរបាន ។ គាត់បានឈឺអស់រយៈពេល៣៨ឆ្នាំមកហើយ ។ គាត់ចង់ចូលទៅក្នុងស្រះនេះដើម្បីបានជាសះស្បើយ ប៉ុន្ដែនៅពេលណាដែលគាត់ព្យាយាមចូល នោះមានអ្នកផ្សេងទៀតចុះទៅបានមុនគាត់ ។
យ៉ូហាន ៥:៥–៧
នៅថ្ងៃឈប់សម្រាកមួយ ព្រះយេស៊ូវបានទៅក្រុងយេរូសាឡិម ។ កាលទ្រង់យាងកាត់ទីក្រុងនេះ ទ្រង់បានយាងមកស្រះបេថែសដា ហើយបានឃើញបុរសម្នាក់ដេកនៅទីនោះ ។
យ៉ូហាន ៥:៦
ព្រះយេស៊ូវបានជ្រាបថា បុរសនោះបានឈឺជាយូរមកហើយ ហើយមិនអាចដើរបានទេ ។ ព្រះយេស៊ូវបានសួរបុរសនោះថា តើគាត់ចង់ជាសះស្បើយដែរឬទេ ។
យ៉ូហាន ៥:៦
បុរសនោះទូលប្រាប់ព្រះយេស៊ូវថា គ្មាននរណាជួយគាត់ឲ្យចុះទៅក្នុងស្រះទេ ហើយនៅពេលទឹកកូរហើយ អ្នកដទៃទៀតចុះទៅមុនគាត់រហូត ។
យ៉ូហាន ៥:៧
ព្រះយេស៊ូវមានព្រះបន្ទូលទៅកាន់បុរសនេះថា « ចូរក្រោកឡើង យកគ្រែអ្នកដើរទៅ » ។ ភ្លាមៗនោះ បុរសនោះបានជាសះស្បើយ ! បន្ទាប់មក គាត់បានក្រោកឈរឡើង ហើយបានយកគ្រែរបស់គាត់ទៅ ។ ជាលើកដំបូងក្នុងរយៈពេល៣៨ឆ្នាំ គាត់អាចដើរបាន !
យ៉ូហាន ៥:៨–៩
អ្នកដឹកនាំសាសន៍យូដាឃើញបុរសនេះលីគ្រែរបស់គាត់ ។ ពួកគេបាននិយាយថា គាត់មិនបានគោរពថ្ងៃឈប់សម្រាកទេ ព្រោះពួកគេគិតថា ការលីគ្រែរបស់គាត់គឺដូចជាការធ្វើការដែរ ។ បុរសនោះបានពន្យល់ថា គាត់ទើបតែបានជាសះស្បើយ ហើយបុរសដែលបានព្យាបាលគាត់ បានប្រាប់គាត់ឲ្យយកគ្រែរបស់គាត់ទៅ ។
យ៉ូហាន ៥:១០–១១
អ្នកដឹកនាំបានរកឃើញថា គឺព្រះយេស៊ូវដែលបានព្យាបាលបុរសនោះ និងបានប្រាប់គាត់ឲ្យលីគ្រែរបស់គាត់នៅថ្ងៃឈប់សម្រាក ។ ពួកគេខឹងសម្បានឹងព្រះយេស៊ូវ ហើយចង់សម្លាប់ទ្រង់ ។ ព្រះយេស៊ូវបានមានបន្ទូលប្រាប់ពួកគេថា ទ្រង់កំពុងធ្វើអ្វីៗដែលព្រះវរបិតារបស់ទ្រង់ដែលគង់នៅស្ថានសួគ៌ បានបង្រៀនទ្រង់ឲ្យធ្វើតែប៉ុណ្ណោះ ។
យ៉ូហាន ៥:១៥–១៧