Fakahā
ʻE Toe Hāʻele Mai ʻa Sīsū Kalaisi
Ko e mata meʻa-hā-mai ʻa Sione ki he ʻamanaki lelei ʻia Sīsū Kalaisí
Naʻe maʻu ʻe he ʻAposetolo ko Sioné ha mata meʻa-hā-mai makehe. Naʻá ne mamata kia Sīsū Kalaisi, ʻa ia naʻá Ne fakahaaʻi kia Sione ha ngaahi meʻa lahi fekauʻaki mo e kuohilí mo e kahaʻú. Naʻá ne talaange kia Sione ke ne hiki ʻa e ngaahi meʻa naʻá ne mamata ki aí. Naʻe ʻafioʻi ʻe Sīsū naʻe fai ʻe he Kāingalotú honau lelei tahá ke muimui ʻiate Ia. Naʻe finangalo ʻa Sīsū ke nau maʻu ha ʻamanaki lelei ʻokú Ne mālohi ange ʻi he kovi ʻi he māmaní.
Fakahā 1:1–2, 9–11, 13–15, 19; 2–3
Naʻe mamata ʻa Sione ʻi heʻene mata meʻa-hā-maí ki ha tohi naʻe ʻikai lava ke fakaava ʻe ha taha. Pea naʻe mamata ʻa Sione ki ha lami naʻá ne fakafofongaʻi ʻa Sīsū Kalaisi; naʻá Ne lava ʻo fakaava ʻa e tohí. Naʻe ʻilo ʻe Sione kimuʻa pea fakatupu ʻa e māmaní, naʻe fili ʻe he Tamai Hēvaní ʻa Sīsū ke hoko ko hotau Fakamoʻuí. Ko e konga mahuʻinga taha ʻeni ʻo e palani ʻa e ʻOtuá, pea ko Sīsū pē te Ne lava ʻo fakahokó.
Naʻe mamata foki ʻa Sione ki ha fuʻu talākoni naʻá ne fakafofongaʻi ʻa Sētane. Naʻe ʻikai saiʻia ʻa Sētane ʻi he palani ʻa e ʻOtuá. Naʻe kamataʻi ha tau ʻi he langí. Ko e tokolahi taha ʻo e fānau fakalaumālie ʻa e Tamai Hēvaní naʻa nau tui kia Sīsū Kalaisi mo fili ke muimui kiate Ia. Ka naʻe fili ha niʻihi ʻo kinautolu ke muimui ʻia Sētane. Koeʻuhí ko ʻenau filí, naʻe pau ke nau mavahe mei hēvani.
Naʻe mamata ʻa Sione, naʻe hokohoko atu hono tauʻi ʻe Sētane mo hono kau muimuí ʻa Sīsū mo Hono kau muimui ʻi he māmaní. Naʻa nau feinga ke kākaaʻi ʻa e kakaí ke ʻoua te nau tui ki he ongoongolelei ʻa e Fakamoʻuí. Naʻe lahi e taú, fakaʻauhá, mo e puké.
Fakahā 6; 8–9; 12:17; 13:11–18; 17–18
Ka naʻe fekauʻi mai ʻe he Tamai Hēvaní ha kau ʻāngelo mei he langí mo e ongoongolelei ʻo Sīsū Kalaisí, koeʻuhí ke lava ʻo vahevahe ia mo e tokotaha kotoa pē ʻi he māmaní.
ʻE tui ha kakai ʻe niʻihi kia Sīsū mo tauhi ʻEne ngaahi fekaú, ʻo hangē ko ia naʻe hoko ʻi he langí. ʻE tokoni ʻenau fakamoʻoni kia Sīsuú ke nau ikunaʻi e tau mo Sētané.
Naʻe mamata ʻa Sione ʻe toe hāʻele mai ʻa Sīsū Kalaisi ki he māmaní. Te Ne hoko ko e Tuʻi ʻo e māmaní kotoa. He ʻikai toe maʻu ʻe Sētane ha mālohi. Koeʻuhí ko Sīsū, he ʻikai ke toe ʻi ai ha loto-mamahi pe mamahi. Ko e kakai kotoa pē ʻoku tui kia Sīsū mo tauhi ʻa e ngaahi fuakava mo Iá, te nau nofo mo Ia mo e Tamai Hēvaní ʻo taʻengata.