Ko e Loto ʻa ha Kakai ke Tauteaʻi ha Fefine Naʻe Faiangahala
“ʻAlu, pea ʻoua ʻe toe faiangahala”
ʻI ha pongipongi ʻe taha, naʻe ʻalu ʻa Sīsū Kalaisi ki he temipale ʻi Selusalemá. Naʻe haʻohaʻo takai ha kakai tokolahi ʻiate Ia ke fanongo ki Heʻene akonakí.
ʻI he lolotonga e akonaki ʻa Sīsuú, naʻe ʻomi ʻe ha kau taki ʻe niʻihi ʻo e kakai Siú ha fefine kia Sīsū. Naʻe maʻu ia ʻokú ne maumauʻi ha taha ʻo e ngaahi fekau ʻa e ʻOtuá. Fakatatau ki he laó, naʻe totonu ke mate ʻa e fefiné ʻaki hano tolo makaʻi ia ʻe he kakaí.
Naʻe ʻeke ange ʻe he kau tangatá kia Sīsū pe ko e hā ʻoku totonu ke fai ki he [fefiné]. Naʻa nau feinga ke tauheleʻi ʻa Sīsū. Naʻa nau ʻiloʻi he ʻikai ke Ne finangalo ke fakamamahiʻi ʻa e fefiné. Ka ʻo kapau ʻe pehē ʻe Sīsū ʻoku ʻikai totonu ke tauteaʻi ʻa e fefiné, te nau lava leva ʻo pehē naʻe ʻikai ke Ne talangofua ki he fonó.
Ka naʻe ʻikai ke fai ʻe Sīsū ha tali kiate kinautolu. Naʻá ne punou hifo ki he kelekelé ʻo tohi ʻi he kelekelé. Naʻe toe fehuʻi ange ʻe he kau tangatá kiate Ia pe ko e hā ʻoku totonu ke nau faí.
Fāifai, pea tuʻu hake ʻa Sīsū ʻo vakai takai ki he kau tangatá. Naʻá ne talaange kapau kuo teʻeki ai faiangahala ha taha ʻiate kinautolu, pea ko ia te ne fuofua toʻo ʻa e maká ʻo tolongi ʻa e [fefiné].
Pea toe punou hifo ʻa Sīsū ʻo hoko atu ʻene tohi ʻi he kelekelé. Naʻe ʻiloʻi kotoa ʻe he kau tangatá kuo nau faiangahala foki mo kinautolu. Naʻa nau mavahe tahataha atu.
Naʻe vakavakai holo ʻa Sīsū ʻo mamata ko e fefiné toko taha pē ʻoku kei ʻi aí. Naʻá Ne ʻeke ange kiate ia pe ko fē e kakai kotoa naʻa nau loto ke tauteaʻi iá. Naʻá ne talaange kiate Ia kuo nau ʻosi mavahe kotoa. Naʻe talaange ʻe Sīsū ki he fefiné, “ʻAlu, pea ʻoua ʻe toe faiangahala.” Talu mei he taimi ko iá mo e tui ʻa e fefiné kia Sīsū.
Sione 8:9–11; Liliu ʻa Siosefa Sāmitá, Sione 8:11; ʻi he Sione 8:11, futinouti f.