Ngaahi Mana lolotonga ʻa e Fononga ʻa Paula ki Lomá
ʻOku tāpuakiʻi ʻe he ʻEikí ʻa ʻEne tamaioʻeikí
Naʻe fakahā ʻe he Laumālié kia Paula ke ʻalu ki Selusalema. Naʻe tokolahi ha kakai ʻi ai naʻe ʻikai ke nau saiʻia ʻi he meʻa naʻe akoʻi ʻe Paula fekauʻaki mo Sīsū Kalaisí. Naʻa nau puke pōpula ia pea haʻi ʻaki ha ngaahi sēini. Naʻe fakamatala ʻe Paula ki he tokotaha kotoa pē ʻa e taimi naʻá ne mamata ai ki ha maama mei he langí, fanongo ki he leʻo ʻo Sīsuú, pea papitaisó.
Ngāue 21:4, 12–13, 27–40; 22:1–16
Naʻe fakahū pōpula ʻa Paula. Lolotonga ʻene ʻi aí, naʻe hā ʻa Sīsū kiate ia ʻo folofola, “Paula, ke ke fiemālie.” Naʻá Ne pehē ʻe fakamoʻoni ʻa Paula kiate Ia ʻi Loma.
Naʻe ʻave ʻa Paula ki he ʻao ʻo ha kau kōvana mo ha tuʻi. Naʻá ne fakamoʻoniʻi loto-toʻa ʻa Sīsū Kalaisi ki he kau pule mālohi ko ʻení. Naʻá ne loto ke tui ʻa e tokotaha kotoa kia Sīsū.
Ngāue 24:10–27; 25:6–8, 17–19; 26:1–29
Naʻe fekauʻi ʻe he tuʻí ʻa Paula ki Loma ke fakamaauʻi ʻe Sisa, ko e ʻemipolá. Naʻe fononga vaka ʻa Paula mo ha kau pōpula kehe, pea nau afe ʻi ha ngaahi feituʻu. ʻI ha feituʻu ʻe taha, naʻe ʻiloʻi ʻe Paula ʻe vavé ni mai ʻa e faʻahitaʻu momokó. Kapau te nau hoko atu, te nau ʻi ha tuʻunga fakatuʻutāmaki lahi. Naʻá ne talaange ki he kau kauvaká ke nau tatali kae ʻoua kuo tokamālie ʻa e ʻeá.
Naʻe ʻikai ke tui ha taha ia kia Paula, ko ia naʻa nau kei folau pē. Naʻe tō mai ha fuʻu afā lahi, pea naʻe fetāʻaki ʻa e vaká ʻe he peaú ʻi ha ngaahi ʻaho lahi. Naʻe ʻikai ke nau lava ʻo sio ki he laʻaá pe ko e ngaahi fetuʻú. Naʻa nau fakakaukau te nau mate ʻi he matangí.
ʻI ha pō ʻe taha, naʻe ʻaʻahi ha ʻāngelo ʻa e ʻOtuá kia Paula peá ne pehē, “ʻE Paula, ʻoua naʻá ke manavahē.” Naʻe pehē ʻe he ʻāngeló ʻe aʻu ʻa Paula ki Loma, ʻo hangē ko e talaʻofa ʻa e ʻEikí. Naʻá ne pehē ʻe maluʻi ʻe he ʻOtuá ʻa e tokotaha kotoa pē ʻi he vaká—he ʻikai mate ha taha ʻiate kinautolu.
Naʻe tala ʻe Paula ki he tokotaha kotoa pē ʻa e meʻa naʻe lea ʻaki ʻe he ʻāngeló. Naʻe talaange ʻe Paula, “Ke mou fiemālie, he ʻoku ou tui ki he ʻOtuá.”
Hili ha ngaahi ʻaho mei ai, naʻe maumau ʻa e vaká pea ngoto. Kae hangē ko e talaʻofa ʻa e ʻāngeló, naʻe ʻikai mate ha taha ʻi he vaká. Naʻa nau kakau kotoa ki ha motu naʻe ui ko Melita.
Naʻe angaʻofa ʻa e kakai naʻe nofo ʻi Melitá kia Paula mo e niʻihi kehe mei he vaká. Naʻa nau tafu ha afi koeʻuhí ke māfana ʻa e tokotaha kotoa pē.
Fakafokifā pē, naʻe haʻu ha ngata mei he afí ʻo uʻu ʻa Paula ʻi he nimá. Ka naʻe ʻikai lavea ʻa Paula. Naʻá ne tupeʻi pē ʻa e ngatá. Naʻe ofo ʻa e kakaí!
Naʻe tuku ʻe ha tangata ko Pupilio ke nofo ʻa Paula ʻi hono ʻapí. Naʻe puke lahi ʻa e tamai ʻa Pupilió. Naʻe hilifaki ʻe Paula hono ongo nimá kiate ia ʻo fakaʻaongaʻi ʻa e mālohi ʻo e ʻOtuá ke fakamoʻui ia.
Naʻe nofo ʻa Paula ʻi ha māhina ʻe tolu ʻi Melita. Naʻe tokoniʻi ia ʻe he ʻEikí ke ne fakahoko ha ngaahi mana lahi, ʻo tāpuakiʻi mo fakamoʻui ʻa e kakai naʻe puké. Pea hangē pē ko e talaʻofa ʻa e ʻEikí, naʻe fononga ʻa Paula ki Loma.
Naʻe kei nofo pōpula pē ʻa Paula lolotonga ʻene ʻi Lomá. Ka naʻe fakaʻatā ʻe heʻene kau leʻó ʻa e kakaí ke nau ʻaʻahi kiate ia. Naʻe akonaki ʻa Paula fekauʻaki mo Sīsū Kalaisi ki ha taha pē ʻe fie fanongo. Naʻá ne faitohi foki ki he kāingalotu ʻo e Siasí ʻi ha ngaahi feituʻu lahi. ʻOku ʻi he Fuakava Foʻoú ha niʻihi ʻo e ngaahi fetohiʻaki pe ngaahi tohi ko ʻení.