Ko e Teunga Tau Kakato ʻo e ʻOtuá
Ko e nofo malu fakalaumālié
Naʻe akoʻi ʻe Paula ki he Kāingalotu ʻi ʻEfesoó, ʻoku tau kau kotoa ʻi ha tau fakalaumālie mo e koví. Hangē pē ko e kau sōtia ʻoku tui teunga tau ke maluʻi honau sinó, te tau lava ʻo tui ʻa e teunga tau fakalaumālie ʻo e ʻOtuá ke maluʻi hotau laumālié.
Naʻe fakafehoanaki ʻe Paula ʻa e teunga tau ʻo ha sōtia ki he ngaahi meʻa ʻokú ne maluʻi fakalaumālie kitautolú. Hangē ko ʻení, naʻá ne pehē ʻoku hangē ʻa e moʻoní ko ha noʻo pe leta ʻi hotau kongalotó.
Hokó, naʻe pehē ʻe Paula ʻoku hangē ʻa e anga māʻoniʻoní ko ha sifa-fatafata ʻokú ne maluʻi hotau lotó.
ʻOku hangē ʻa e ongoongolelei ʻo Sīsū Kalaisi ʻo e melinó ko e sū ʻoku tau tui ke maluʻi ʻaki hotau vaʻé.
ʻOku hangē ʻetau tui kia Sīsū Kalaisí ko ha pā ʻokú ne maluʻi kitautolu meia Sētane, ʻo hangē pē ko hono maluʻi ʻe ha pā ʻa e kau sōtiá mei he ngaahi ngahau ʻa honau ngaahi filí.
Naʻe pehē ʻe Paula ʻoku hangē ʻa e fakamoʻuí ko ha tatā ʻokú ne maluʻi hotau ʻulú mo e ʻatamaí.
Naʻe faifai pea pehē ʻe Paula ʻoku hangē ʻa e Laumālié mo e folofola ʻa e ʻOtuá, ko ha heletaá.
ʻI he taimi ʻoku tau tui ai ʻa e konga kotoa pē ʻo e teunga tau ʻo e ʻOtuá, te tau lava ʻo tuʻu loto-toʻa ke fakafepakiʻi ʻa e ngaahi loi mo e ʻahiʻahi ʻa e tēvoló. Naʻe foaki mai ʻe he ʻOtuá ʻa e teunga tau ko ʻení ke tokoni ke malu mo mālohi ai hotau laumālié.