Maʻake 14–15; Luke 22–23; Sione 18–19
ʻOku Puke Pōpula ʻa Sīsū
Ko Hono Fakamaauʻi ʻo e ʻAlo ʻo e ʻOtuá
Hili e lotu mo e mamahi ʻa Sīsū ʻi Ketisemaní, naʻe aʻu atu ʻa Siutasi mo ha kau leʻo tokolahi ʻo e kau Siú. Naʻe hoko ʻa Siutasi ko e taha ʻo e Kau ʻAposetoló. Naʻá ne ʻiloʻi naʻe faʻa hāʻele ʻa Sīsū ki he ngoue ko ʻení. Naʻe totongi ʻe he kau taki Siú ʻa Siutasi ke tokoni ange kiate kinautolu ke nau maʻu ʻa Sīsū ka nau lava ʻo ʻave Ia.
ʻI he feinga ʻa e kau leʻó ke ʻave ʻa Sīsuú, naʻe toʻo hake ʻe Pita ha heletā. Naʻá ne tuʻusi e telinga ʻo e tamaioʻeiki ʻa e taulaʻeiki lahí.
Naʻe folofola ange ʻa Sīsū kia Pita ke tuku ʻene heletaá. Naʻe folofola ange ʻa Sīsū naʻe fiemaʻu ke Ne fai ʻa e meʻa naʻe finangalo ʻa ʻEne Tamaí ke faí.
Naʻe ala ʻa Sīsū ki he telinga ʻo e tamaioʻeikí pea fakamoʻui ia.
Naʻe ʻave ʻe he kau leʻó ʻa Sīsū ki he fale ʻo e taulaʻeiki lahí. Naʻe ʻi ai foki mo ha kau taki Siu kehe. Naʻa nau fie ʻilo ha ʻuhinga ke tāmateʻi ai ʻa Sīsū. Naʻa nau ʻomi ha kakai ke nau tala ha ngaahi loi fekauʻaki mo Ia.
Naʻe faifai pea fehuʻi ange ʻe he taulaʻeiki lahí kia Sīsū pe ko e ʻAlo Ia ʻo e ʻOtuá. Naʻe folofola ʻa Sīsū, “Ko au ia.”
Naʻe ʻita heni ʻa e taulaʻeiki lahí mo e kau taki kehé. Naʻa nau taaʻi ʻa Sīsū, ʻaʻanu kiate Ia, mo fakakata ʻaki Ia. Naʻa nau felotoi ʻoku totonu ke tāmateʻi Ia.
Lolotonga ʻa e ʻi he fale ʻo e taulaʻeiki lahí ʻa Sīsuú, naʻe tatali ʻa Pita ʻi tuʻa. Naʻá ne tangutu ʻi he veʻe afí ke ne māfana. Naʻe tuʻo tolu ʻa e pehē ʻe he kakaí naʻa nau ʻiloʻi ʻa Pita ko e taha ʻo e kau ākonga ʻa Sīsuú. Ka ʻi he taimi kotoa pē, naʻe pehē ʻe Pita naʻe ʻikai ke ne ʻiloʻi ʻa Sīsū.
Naʻe ʻuʻua leva ʻa e motuʻa moá, pea naʻe manatuʻi ʻe Pita ʻa e meʻa naʻe folofola ange ʻe Sīsuú: ʻe fakaʻikaiʻi tuʻo tolu ʻe Pita Ia. Naʻe ʻalu ʻa Pita mo ne tangi.
Naʻe ʻave ʻe he kau taki Siú ʻa Sīsū kia Pailato ko e kōvana Lomá. Naʻe haʻu foki mo ha kakai tokolahi. Naʻe fiemaʻu ʻe he kau takí ʻa Pailato ke ne tāmateʻi ʻa Sīsū. Naʻa nau talaange kia Pailato naʻe ui ʻe Sīsū Ia ko e tuʻi ʻo e kakai Siú.
Maʻake 15:1–3; Luke 23:2; Sione 18:28–31
Naʻe fehuʻi ange ʻe Pailato kia Sīsū pe ko e tuʻi Ia ʻo e kakai Siú. Naʻe folofola ange ʻa Sīsū, “ʻOku ʻikai ʻo māmani hoku puleʻangá.” Naʻá Ne fakamatalaʻi naʻá Ne haʻu ki he māmaní ke akoʻi e moʻoní ki he kakaí.
Naʻe pehē ʻe Pailato naʻe ʻikai ke ne tui kuo fai ʻe Sīsū ha meʻa hala. Ka naʻe tokolahi ha kakai naʻa nau kaila, “Tutuki ia.” Naʻe fakakaukau ʻa Pailato ke ne fai e meʻa naʻa nau fiemaʻú pea fekau ke tāmateʻi ʻa Sīsū.