Māʻata mo Mele
Ko hono fili ʻo e meʻa ʻoku mahuʻinga tahá
Naʻe nofo ʻa Māʻata ʻi ha kolo naʻe ui ko Pētani. ʻI he taimi naʻe omi ai ʻa Sīsū mo ʻEne kau ākongá ki Pētaní, naʻe talitali lelei kinautolu ʻe Māʻata ki hono ʻapí.
Lolotonga e ako ʻa Sīsuú, naʻe femoʻuekina ʻaupito pē ʻa Māʻata ʻi hono tokoniʻi ʻene kau fakaafé. Naʻe tangutu ofi hono tokoua ko Melé kia Sīsū mo fakafanongo ki Heʻene ngaahi leá.
Naʻe ʻikai ke fiefia ʻa Māʻata ʻi heʻene fai toko taha pē ʻa e ngāué. Naʻá ne fakakaukau ʻoku totonu ke tokoni ange ʻa Mele kae ʻoua ʻe fanongo ia kia Sīsū. Naʻe kole ʻe Māʻata kia Sīsū ke talaange kia Mele ke tokoni ange kiate ia.
Naʻe lava ke ʻafioʻi ʻe Sīsū ʻa e ngāue lahi ʻa Māʻatá. Naʻá Ne talaange naʻá Ne fakatokangaʻi ʻene hohaʻa ki ha ngaahi meʻa lahi.
Naʻe fakamatalaʻi ange ʻe Sīsū ʻoku ʻi ai ha ngaahi meʻa ʻe niʻihi ʻoku mahuʻinga ange ia ʻi ha ngaahi meʻa kehe. Naʻá Ne pehē, naʻe fai ʻe Mele ha fili ʻoku lelei ke fanongo ki Heʻene ngaahi folofolá. He ko e ngaahi meʻa ko ia naʻá ne ako meia Sīsuú he ʻikai teitei mole ia meiate ia.