Haʻu ʻo Mamata
Ko hono fakaafeʻi ha kaungāmeʻa ke muimui ʻia Sīsū
Ko ha tangata ko Filipe ko e taha ia ʻo e kau muimui ʻo Sīsuú. Naʻá ne ʻiloʻi ko Sīsū ʻa e Fakamoʻuí. Naʻe fiemaʻu ʻe Filipe ke ʻiloʻi foki ʻe hono kaungāmeʻa ko Natanielá ʻa Sīsū.
Naʻe ʻiloʻi ʻe Nataniela naʻe hā ʻi he folofolá ʻe ʻomi ʻe he ʻOtuá ha Fakamoʻui. Naʻe talaange ʻe Filipe kuó ne ʻilo ʻa e Fakamoʻuí—ko Hono huafá ko Sīsū, mei Nāsaleti.
ʻI he kamatá naʻe ʻikai tui ʻa Nataniela kiate ia. Naʻe ʻikai ke ne fakakaukau ʻe haʻu ʻa e Fakamoʻuí mei Nāsaleti. Naʻá ne fehuʻi, “ʻE tupu ha lelei mei Nāsaleti?” Naʻe tali ange ʻe Filipe, “Haʻu ʻo mamata.”
Naʻe ʻalu ʻa Nataniela mo Filipe ke feʻiloaki mo Sīsū. ʻI he mamata ʻa Sīsū ki heʻena haʻú, naʻá Ne folofola ko ha tangata lelei mo faitotonu ʻa Nataniela. Naʻe ʻohovale ʻa Nataniela. Kuo teʻeki ke ne fetaulaki mo Sīsū kimuʻa. Naʻe ʻiloʻi fēfē ia ʻe Sīsuú?
Naʻe talaange ʻe Sīsū kia Nataniela kimuʻa pea talanoa ʻa Filipe kiate iá, naʻe fakatokangaʻi ia ʻe Sīsū ʻoku tangutu ʻi ha lalo fiki.
Naʻe ʻiloʻi heni ʻe Nataniela ko Sīsū ʻa e ʻAlo ʻo e ʻOtuá. Naʻe talaange ʻe Sīsū kia Nataniela te ne mamata ki ha ngaahi meʻa lalahi—hangē ko e haʻu ʻa e kau ʻāngeló mei he langí—koeʻuhí pē ko ʻene tuí.